2Rus 14 - Hdi

¹ Ka mag Asa ta skwi ta zɗəganata, tɗukwa ta wa ira Yawe, Lazglafta ni.

² Ka hliŋtá tsi ta gwirha sanlaha ma lazglaftaha nda vliha tskal tskala, ka dzaɓiŋtá tsi ta palaha dzagwa lu, ka ghwadiŋtá tsi ta udzuha skwa wuyay Asera.

³ Kaʼa nda la Yuda mantsa: « Zbawa zba ta ndana Yawe, Lazglafta dzidzíha ghuni, ka ksa kuni ta slna nda gwaɗa ni nda ya nda zlahuha ni, » kaʼa.

⁴ Ka hliŋtá tsi ma inda luwaha la Yuda ta vliha tskal tskala nda gwirha ŋa dra urdi. Ka nzatá gá mgham ləŋləŋ ta tsatsi.

⁵ Ka babamtá tsi ta luwaha ma matsaka huzlu ma Yuda, kabga ma zɗaku tsa haɗik ya. Haɗ vulu ta slanaghata ma tsa vakuha ya wu, kabga vlaŋ vla Yawe ta mbiʼa vgha.

⁶ Ka Asa nda la Yuda mantsa: « Babafma baba ta na luwaha na, ka ŋaŋamta mu ma matsaka huzlu, nda həgaha nda slara nda slara, nda parawalha nda kra wa tghaha taŋ. Ta ka ŋa mu na luwa na, kabga zbaŋ zba mu ta ndana Yawe, Lazglafta mu. Zbaŋ zba mu, ka vlamatá tsi ta mbiʼa vgha dər ndiga ndiga, » kaʼa. Ka zlraftá həŋ ta bay, ka katsaftá həŋ.

⁷ Dəmbuʼ hkən dərmək (300.000) mnduha la Yuda ka gwal vula Asa ta laviŋtá kla zalam dagala nda gupa. Dəmbuʼ his dərmək nda tghas mbsak (280.000) mnduha la Biŋyamiŋ ta laviŋtá kla zwaŋa zalam nda ha hava. Gwal viɗviɗ ma vulu həŋ demdem.

⁸ Ka liŋtá Zerah mnda la Kus ta həŋ nda vulu. Ka lagha tsi nda gwal vulu mleŋwi (1.000.000) nda mwata plis hkən dərmək (300), ka ɓhadaghatá həŋ ha da Maresa.

⁹ Ka lab Asa da guyay, ka dzaftá həŋ ta vgha ŋa vulu ma didiŋa Tsəfata, ndusa nda Maresa.

¹⁰ Ka wahu Asa ta wahu da Yawe, Lazglafta ni, kaʼa mantsa: « Yawe, kagha turtukwa gha ta laviŋta kataŋtá mndu nda hta mbrakwa ni nda mndu nda mbra. Sawi da kataŋnata, Yawe, Lazglafta ŋni, kabga ta kagha dihafta ŋni ta vgha, nda hga gha sagha ŋni da guya na mleŋwi mleŋwa mnduha na! Yawe, kagha Lazglafta ŋni. Yaha mndu da zata ghwa ta ghəŋa kagha! » kaʼa.

¹¹ Ka dzuŋtá Yawe ta la Kus ta wa ira i Asa nda la Yuda, ka tatá la Kus ta vgha nda hwaya.

¹² Ka hwayiŋtá Asa nda mnduha ni ta həŋ ha da Gerar, ka pslatá həŋ ta la Kus, kataf a həŋ ta hafa taŋ wu, kabga huʼanap huʼa lu ta həŋ ta kəma Yawe nda sludziha ni. Ka hlaghatá həŋ ta skwa zləɗu katakata.

¹³ Ka zaɗanatá həŋ ta inda luwaha ndusa ndusa nda Gerar, kabga hanam ha Yawe ta zləŋ ta mnduha. Ka zləɗatá həŋ ta inda tsa luwaha ya, ka mutsaftá həŋ ta skwa zləɗu ta fərtuta.

¹⁴ Ka líŋta həŋ guk ta ghuɓa gwal ngha rini, ka hlaghatá həŋ ta rina fisik ta ndəghuta katakata, nda ŋalibwaha. Tahula tsa, ka vraghata həŋ da Ursalima.