2Rus 12 - Hdi

Liŋta Sisak mghama Masar ta la Yuda

¹ Dihanata Rəhavgham ta gá mghama ni, ka mutsaftá mbraku ná, ka zlanavatá tsi kawadaga nda la Israʼila demdem ta zlaha Yawe.

² Ta mahutafa vakwa Rəhavgham ta gá mgham, ka laf Sisak mghama Masar guk liŋtá luwa Ursalima nda vulu, kabga magana a həŋ ta skwi tɗukwa ta Yawe wa.

³ Ka sliʼaftá Sisak ma Masar nda mwataha plisa ni dəmbuʼ nda his dərmək (1.200), nda gwal ŋla plis dəmbuʼ mkuʼ mbsak (60.000), kawadaga nda gwal vulu kul mbəɗavata. Mataba taŋ, mamu gwal vula la Libi, nda la Suki, nda la Kus.

⁴ Ka hlaghutá tsi ta luwaha ma matsaka huzla la Yuda, ka ɓhadaghatá tsi ha da Ursalima.

⁵ Ma tsa fitik ya, ka sliʼaftá anabi Səmaghya ka lagha slanaghatá Rəhavgham nda maliha la Yuda, si ta tsukavata ma Ursalima gavadaghar Sisak, kaʼa nda həŋ mantsa: « Wya gwaɗa ta mnə Yawe: “Zlaɗiva zla kuni. Iʼi guli ta zlavaghuna zla yu ma dzva Sisak kaʼa,” » kaʼa.

⁶ Ka hanaganatá maliha la Israʼila nda mgham tani ta ghəŋ, ka həŋ mantsa: « Raŋta ni ya ta Yawe! » ka həŋ.

⁷ Nghanata Yawe ta hanatá ghəŋa taŋ, ka gwaɗgəlganatá Yawe da Səmaghya: « Ka si hanagana hana həŋ ta ghəŋa taŋ ya, haɗ yu dzaʼa zaɗanatá həŋ wa, tewtew dzaʼa kataŋta yu ta həŋ. Haɗ gufatá ŋuɗufa ɗa dzaʼa lanaghatá la Ursalima nda ma dzva Sisak wa.

⁸ Ama dzaʼa nzakway həŋ ka vuʼa ni, mantsa tama, dzaʼa nda sna həŋ ta dgata magihatá slna nda maganatá slna ta gá mgham ma ghəŋa haɗik, » kaʼa.

⁹ Ka laf Sisak mghama Masar da guyata nda vulu nda Ursalima. Ka hlaghatá tsi ta skwa gadghəl ma həga Yawe, nda ya ma həga ga mgham. Ka hlaghatá tsi nekwnekw. Ka hlaghatá tsi ta inda zalamha ka dasu ka dasu ya si mamagaf Salumuŋ

¹⁰ Ka magaftá mgham Rəhavgham da vla taŋ ta zalamha ka ghuva tili, ka pghanamta ma dzvu ta maliha ta ghəŋa gwal ngha wi tgha həga ga mgham.

¹¹ Inda fitika lagha mgham da həga Yawe ya, hlafta tsa gwal nghapta ya ta tsa zalamha ya, tahula tsa ŋa hladamta taŋ da dzuguva gwal ta nghapta.

¹² Manda hanaganata Rəhavgham ta ghəŋ, ka mtanatá Yawe ta gufatá ŋuɗufa ni, zaɗiŋ a ɗekɗek wa. Mataba va tsaya ná, ta mamu skwiha ɗina ɗina ma Yuda.

Kwanaha gá mghama Rəhavgham

¹³ Ka dihanatá mgham Rəhavgham ta gá mghama ni ma Ursalima, ka gə tsi ta mgham. Fwaɗ mbsak ndeŋ mida ima Rəhavgham ta nzatá tsi ka mgham. Ghwaŋpəɗ ndəfáŋ vakwa ni ta gá mgham ma Ursalima, luwa ya zbap Yawe mataba inda mndəra la Israʼila ŋa nzakwa hga ni. Naghama hga ma ni ma Rəhavgham, makwa la Ghamuŋ ya.

¹⁴ Ka mag tsi ta ghwaɗaka skwi, kabga fa a ta ŋuɗufa ni ka zba Yawe wa.

¹⁵ Zlrafta slnaha Yaruvgham nda kɗavakta ni tani ná, vivindam vivinda lu ma ɗelewera vinda slna anabi Səmaghya, nda Ghidu ka slayaŋ ya, ta slə lu ta vindatá hga mndəra mnduha ya. Ka gɗavatá vulu mataba i Rəhavgham nda Yaruvgham.

¹⁶ Ka laghu Rəhavgham da dzidzíha ni, ka paɗamtá lu ma luwa Dawuda. Ka lam zwaŋa ni Aviya da gá mgham ma vla ni.