2Rus 10 - Hdi

Təŋanavata Rəhavgham ta ghəŋ ta mnduha

¹ Ka lagha Rəhavgham da Səkem, kabga ma Səkem tskavata inda la Israʼila ŋa famta ka mgham.

² Ta ma Masar Yaruvgham, zwaŋa Nəvat karaku, ma tsa vli ɗifaghu tsi ka hwaya mgham Salumuŋ ya, ka snaŋtá tsi ta tsa tska vgha ya, ka vragaghutá tsi.

³ Ka ghunaftá lu ta mndu da hgaktá Yaruvgham. Ka sliʼaftá Yaruvgham nda inda la Israʼila, ka lagha slanaghatá Rəhavgham, ka həŋ nda tsi mantsa:

⁴ « Nanaf na da gha ɗuk ta ndəgakwa zuk ŋni, ndanana tama, htaŋnaghu hta ta ndəgakwa tsa slna da gha, nda ɗukwata ndəgakwa tsa zuk faŋnagha tsi ya, dzaʼa maga gha maga ŋni ta slna, » ka həŋ.

⁵ Ka Rəhavgham zlghanaftá wi ta həŋ mantsa: « Vragaghawa vra slaɗighata ma fitik hkən, » kaʼa. Ka laghu tsa mnduha ya.

⁶ Ka ɗawaŋtá mgham Rəhavgham ta hiɗaku da la galata mndu si ta maganatá slna ta da ni Salumuŋ ma nzakwa ni si ta nda hafu. Kaʼa nda həŋ mantsa: « Kinawu ká yu dzaʼa zlghanaftá wi ta tsa mnduha ya, ka kaghuni na? » kaʼa.

⁷ Ka həŋ nda tsi mantsa: « Ka magana maga ka ta zɗaku ta na mnduha na, ka tsuʼaf tsuʼa ka ta həŋ ɗina, ka nda zɗaku dzaʼa zlgha ka ta wi ŋa taŋ katsi, dzaʼa gɗava gɗa həŋ ka kwalvaha gha ŋa ɗekɗek, » ka həŋ.

⁸ Ama kulaf a Rəhavgham ta tsa hiɗaku vlaŋ tsa la galata mnduha ya wa. Ka laghu tsi da gwaɗganatá kamtaghuha ni galagaf həŋ kawadaga ta maganatá slna.

⁹ Ka ɗawaŋtá tsi da həŋ, kaʼa mantsa: « Kinawu ká yu dzaʼa zlghanaftá wi ta tsa mnduha ya, ka kaghuni na? “Htaŋnaghu hta ta na ɗukwata zuk faŋnagha da gha ka mbraku na,” ka həŋ na na? » kaʼa.

¹⁰ Ka tsa kamtaghuha ni galagaf həŋ kawadaga ya nda tsi mantsa: « Tsa mnduha ta taw kazlay na: Htaŋnaghu hta ta na ɗukwata zuk faŋnagha da gha ka mbraku na kəʼa, ta ɗaw həŋ ya ná, wya ká ka zlghanaftá wi ta həŋ: “Mal zwaŋa ndəfiŋa ɗa glakwa ni ka hulsisha da ɗa.

¹¹ Mantsa nzakwa ni, faghunagha fa da ɗa ta ɗukwata zuk ta ndəgaku, ama iʼi, dzaʼa sgəglaghunagha sga yu ɗuk katakata ta ndəgakwa ni. Nda krupi si ta zlaha tsatsi ta kaghuni, ama iʼi, nda krupi nda kfur ta wa ni dzaʼa zlaha yu ta kaghuni!” » kaʼa.

¹² Ka lagha Yaruvgham nda inda mnduha slanaghatá Rəhavgham baɗ mahkəna fitik, manda va tsa si mna mgham kazlay na: « Vragaghawa vra slaɗighata baɗ mahkəna fitik, » kəʼa ya kay.

¹³ Ka zlghanaftá mgham Rəhavgham ta wi ta tsa mnduha ya nda sidi nda sidi, ka zlanavatá tsi ta tsa hiɗakwa la galata mndu ya.

¹⁴ Ka zlghanaftá tsi ta wi ta mnduha nda hiɗaku ya vlaŋ duhwalha, kaʼa nda həŋ mantsa. « Faghunagha fa da ɗa ta ɗukwata zuk ta ndəgaku, ama iʼi, dzaʼa sgəglaghunagha sga yu ɗuk katakata ta ndəgakwa ni. Nda krupi si ta zlaha tsatsi ta kaghuni, ama iʼi, nda krupi nda kfur ta wa ni dzaʼa zlaha yu ta kaghuni! » kaʼa.

¹⁵ Mantsa tama, fana a mgham ta sləməŋ ta mnduha ka sna skwi ta ɗaw həŋ da tsi wu, kabga Lazglafta ta mbəɗanaftá tsa skwi ta magaku ya, ŋa hɗamta Yawe ta gwaɗa ya mnana tsi ta Yaruvgham, zwaŋa Nəvat, nda ma wa Ahiya mnda la Silu.

Gatá sida la Israʼila nda ga mazlay

¹⁶ Nghadapta inda la Israʼila ná, fana a mgham ta sləməŋ ta həŋ ka sna skwi ta ɗaw həŋ wu, ka mnduha zlghanaftá wi ta mgham mantsa: « Nahgani ŋa ŋni nda Dawuda na? Haɗ ŋni ta zuvustá həga nda tsa zwaŋa Yisay ya wa! Ariwa la Israʼila, ka vra dər wa dzagha ni! Ndanana, nghap ngha ka həga gha a Dawuda! » ka həŋ. Ka varaghutá la Israʼila demdem dzagha taŋ.

¹⁷ Ta ghəŋa la Israʼila ta nzakway ma luwaha la Yuda kweŋkweŋ yeya ta snaŋta kazlay na Rəhavgham mgham kəʼa.

¹⁸ Ka ghunaftá mgham Rəhavgham ta Haduram, mali ta ghəŋa gwal maga slna mbraku mbraku, ama ka zlambatá la Israʼila, ka mtutá tsi. Ka gi ŋlaftá mgham Rəhavgham ta mwata plisa ni ka hwayaghuta da ɗifaghuta ma Ursalima.

¹⁹ Mantsa ya ganavata la Israʼila ta sidi ta la ga Dawuda, ha gita.