2Rus 1 - Hdi

Ɗaway Salumuŋ ta ɗifil ŋa gá mgham

¹ Ka dihanatá Salumuŋ zwaŋa Dawuda kahwathwata ta gá mghama ni. Ka nzatá Yawe, Lazglafta ni kawadaga nda tsi, ka kapanafta katakata.

² Ka gwaɗganatá Salumuŋ ta inda la Israʼila, katkata ni, maliha ta ghəŋa bakwa gwal vulu dəmbuʼ dəmbuʼ (1.000), nda maliha ta ghəŋa bakwa gwal vulu dərmək dərmək (100), nda gwal tsa guma, nda gwal dagaladagala ma inda la Israʼila ta nzakway ka la zəʼala həgaha.

³ Ka laghu Salumuŋ kawadaga nda tsa guyatá ghəŋa mnduha demdem ya ta vli tskala ma Givghuŋ, kabga hada tumpula guyaku nda Lazglafta, tsa magaf Musa kwalva Yawe ma mtak ya.

⁴ Ama ghada ghada Dawuda ta klaftá akwata Lazglafta ma Kiriyatʼyegharim, ka kladafta da Ursalima da tsa vli payanaf tsi ya, kabga dzugwana dzugwa ta tumpul hada.

⁵ Gwira ghuva tili magaf Betsalʼel zwaŋa Uri, zigha Hur ya ná, ka fata tsi ta kəma həga tumpula Yawe. Hada ma Givghuŋ lagha i Salumuŋ nda guyatá ghəŋa mnduha da ɗawa ndana Yawe.

⁶ Hada, ka laf Salumuŋ ta gwira ghuva tili ta kəma tumpula guyaku, ka vlatá tsi ŋa Yawe ta skwa pla ghəŋ ŋa dray tsuh tsuh dəmbuʼ (1.000) ta tsa gwir ya.

⁷ Ta tsa rviɗik ya, ka zlagaptá Lazglafta da Salumuŋ, kaʼa nda tsi mantsa: « Ɗawiha ɗawa ta skwi ta kum ka, ka vlaghata yu, » kaʼa.

⁸ Ka Salumuŋ nda Lazglafta mantsa: « Magana maga ka ta zɗaku dagala ta da ɗa Dawuda, ka famtá ka ta iʼi ka mgham ma vla ni.

⁹ Ndanana, Yawe, Lazglafta, má ka hɗam hɗa tatá imi ta sləməŋ tanaf ka ta da ɗa Dawuda, tsəhala kagha ta famta iʼi ka mgham ta ghəŋa mnduha ta ndəghuta katakata manda gninika haɗik ya.

¹⁰ Vliha vla tama ta ɗifil nda mahizl, kada snaŋta yu ta gá mgham ta ghəŋa na mnduha na! Ka haɗ tsi mantsa wu, wa dzaʼa laviŋtá gá mgham ta ghəŋa mnduha gha, na mnduha dagala na na? » kaʼa.

¹¹ Ka Lazglafta nda Salumuŋ mantsa: « Tsəhala tsaya skwi ɗvaŋ ŋuɗufa gha katək ya, nzakw ka gadghəl, nda nzakw ka galipi, nda glaku, nda rwuta ghumaha gha, nda slravaghata hafa gha a ta ɗaw ka ya wu, ama ɗifil nda mahizl ta ɗaw ka katək, kada laviŋta ka ta gaftá mgham ta ghəŋa mnduha ɗa, gwal fa yu ta kagha ŋa gá mgham ta ghəŋa taŋ ya,

¹² vlagha vla yu ta ɗifil nda mahizl. Dzaʼa vlagha vla yu ta gadghəl, nda nzakw ka galipi, nda glaku, ya ta kul walaŋta mghamha ta tiŋlaghutá kagha ta mutsafta, manda ya dzaʼa kwal gwal tahula kagha ta mutsafta guli, » kaʼa.

¹³ Tahula tsa, ka sliʼaftá Salumuŋ ma tsa vli tskala ma Givghuŋ ma vla tumpula guyaku ya, ka vraghata da Ursalima, ka gə tsi ta mgham ta ghəŋa la Israʼila.

Gadghəla Salumuŋ

¹⁴ Ka tskanatá Salumuŋ ta mwata plisha dəmbuʼ nda fwaɗ dərmək (1.400), nda gwal ŋla plis dəmbuʼ ghwaŋpəɗ his (12.000). Ka paghatá tsi ta həŋ ma luwaha ta pghə tsi ta mwata plisha ni, nda ya ma Ursalima ndusa nda vla nzakwa mgham.

¹⁵ Ka nanaftá mgham ta kfura tsedi nda dasu guli ma Ursalima manda ndəghata dzir, nda udzuha sedra manda ndəghata ghurafa sla ta ɗayaku ta kuɗuŋurha.

¹⁶ Ma Masar nda ya ma Keve ta tsakalakta Salumuŋ ta plisha ni. Gwal ta tsakala ŋa mgham ta dzawakta ma Keve taɓta tsedi ta tsanafta lu ta həŋ.

¹⁷ Mwata plis turtuk ta skwagafta lu ma Masar ná, sulay mkuʼ dərmək (600) dzva ni, plis turtuk guli, sulay dərmək nda hutaf mbsak (150) dzva ni. Manda va tsaya ta hlagapta həŋ ŋa inda mghamha la Het, nda mghamha la Aram.

Payay Salumuŋ ta vgha ŋa ba həga Lazglafta

¹⁸ Ka kuratá Salumuŋ ta baftá həga ŋa vlaŋtá sgit ta Yawe, nda həga gá mghama vərɗa tsatsi.