2Mgh 8 - Hdi

Vranavatá skwa makwa la Sunem

¹ Ka Ilisa nda tsa marakw vranam tsi ta hafu da zwaŋa ni ya mantsa: « Sliʼaf sliʼa nda la ga ghuni ka dzaʼa ka da sana vli ya laviŋ ka ta dzaʼa. Dzaʼa klak kla Yawe ta maya, dzaʼa sla sla maya ta haɗika Israʼila ka vaku ndəfáŋ, » kaʼa.

² Ka sliʼaftá tsa marakw ya ka magata manda ya mnana mnda Lazglafta. Ka laghu tsi kawadaga nda la ga taŋ, ka nzatá həŋ ka vaku ndəfáŋ ta haɗika la Filisti.

³ Ma kɗakwa tsa vaku ndəfáŋ ya, ka vragaghuta tsa marakw ya ma haɗika la Filisti. Ka lagha tsi da mgham da ɗawa katu ŋa vranavata həga ni nda vwaha ni.

⁴ Ma tsa fitik ya, ta ghwa yiva taŋ i mgham nda Gehazi, duhwala mnda Lazglafta, kaʼa ta ɗaway da tsi mantsa: « Rusaɗif rusa ta inda skwiha ka mandərmimi dagala dagala maga Ilisa, » kaʼa.

⁵ Ta rusay rusay Gehazi ŋa mgham ká Ilisa vranamtá hafu ma mndu nda mta, ta lagha tsa marakw vranam tsi ta hafu ma zwaŋa ni ya da mgham, da ɗawa katu ŋa vranavatá həga ni nda vwaha ni. Ka Gehazi mantsa: « Rvera ɗa, wana vərɗa tsa marakw ya, wana tsa zwaŋa ni vranam Ilisa ta hafu mida ya guli, » kaʼa.

⁶ Ka ɗawaŋtá mgham da tsa marakw ya. Ka rusanaftá tsi. Ka mnanaftá mgham ta ya turtuk ma maliha mataba gwal ta maganatá slna ni, kaʼa nda tsi mantsa: « Vranava vra ta na marakw na ta inda si skwa ni, planaha lu ta skwi ya si ta mutsu lu ta tsa vwaha ni ya daga baɗ fitika zlaŋta ni ta na haɗik na ha ka sagha ta gita, » kaʼa.

Mnaŋta Ilisa ta gay Hazaʼel ta mgham ta ghəŋa la Aram

⁷ Ma sana fitik, ka sliʼaftá Ilisa ka laghu da Damas. Tsaw ɗughwana a Benʼhadat, mghama la Aram wa. Ka mnanatá lu ta mgham kazlay sagha sa mnda Lazglafta ha da hadna kəʼa.

⁸ Ka mgham nda Hazaʼel mantsa: « Klaf kla ta skwa mbəhu ka dzaʼa ka slanaghatá mnda Lazglafta. Ka mnanata ka, ka ɗawaŋtá tsi ta ndana Yawe ka dzaʼa mbaku yu ma na ɗaŋwa ɗa na ri, ka ki tsi ya, » kaʼa.

⁹ Ka laghu Hazaʼel da slanaghata Ilisa. Ka klaftá tsi ma dzvu ta skwa mbəhu, inda skwiha ɗina ɗina ma Damas prək ka hlay ŋalibwaha fwaɗ mbsak. Ka lagha tsi da kəma Ilisa, kaʼa mantsa: « Zwaŋa gha Benʼhadat mghama la Aram ta ghuniɗikta da kagha, ŋa ɗawaŋta: “Dzaʼa mbaku yu ma na ɗaŋwa ɗa na re, ari ki na,” kaʼa, » kaʼa.

¹⁰ Ka Ilisa nda tsi mantsa: « La da mnanata kazlay na “dzaʼa mbaku ka,” kəʼa. Aŋ mndani, si mniha mna Yawe kazlay “dzaʼa mtaku,” kəʼa sizlay, » kaʼa.

¹¹ Ka nzatá mnda Lazglafta ndeezla ka faftá iri ta Hazaʼel, ha ka ksuta hula. Ka taw tsi ta taw.

¹² Ka Hazaʼel mantsa: « Kabgawu ta kəl rvera ɗa ka taw na? » kaʼa. Ka Ilisa mantsa: « Nda sna yu ta ghwaɗaka skwi dzaʼa ka maganata la Israʼila. Dzaʼa fafiŋ fa fa ka ta luwaha taŋ nda ŋaŋa ma matsaka huzlu, ka pslatá zwana duhwalha taŋ nda kafay, ka huʼanaptá zwana taŋ kwitikw kwitikw, ka tatanaptá huɗa miʼa taŋ nda huɗi, » kaʼa.

¹³ Ka Hazaʼel mantsa: « Wa iʼi kwalva gha, dzaʼa magatá skwi manda tsa, ta iʼi kri na? » kaʼa. Ka Ilisa zlghanaftá wi mantsa: « Yawe ta mariɗiŋta kazlay dzaʼa nzakway ka ka mghama la Aram kəʼa, » kaʼa nda tsi.

¹⁴ Ka zlanatá Hazaʼel ta Ilisa ka laghwi da Benʼhadat, ka ɗawaŋtá tsi da tsi: « Waká Ilisa nda kagha kay? » kaʼa. Kaʼa mantsa: « Dzaʼa mbaf mba ka ma ɗaŋwa gha, kaʼa nda iʼi » kaʼa.

¹⁵ Ga mahtsima ni, ka klafta Hazaʼel ta bargwa, ka tsughumamta ma imi, ka zlatanamta ma kuma ta mgham, ka mtuta tsi. Ka nzatá Hazaʼel ka mgham ma vla ni.

Gá mghama Yəhuram ma Yuda

¹⁶ Ta mahutafa vakwa Yuram, zwaŋa Ahav, ta ga mgham ta ghəŋa la Israʼila, ka nzatá Yəhuram, zwaŋa Yəhusafat, ka mghama la Yuda.

¹⁷ Hkən mbsak his mida ima ni ta nzatá tsi ka mgham. Tghas vakwa ni ta ga mgham ma Ursalima.

¹⁸ Ka ksaftá tsi ta saɗa mghamha la Israʼila manda ŋa la ga Ahav, kabga makwa Ahav klaf tsi. Ka mag tsi ta ghwaɗaka skwi ta wa ira Yawe.

¹⁹ Ama va a Yawe ta zaɗanatá la Yuda wu, dabga kwalva ni Dawuda tanaf tsi ta imi ta sləməŋ nda mnay kazlay dzaʼa gɗa gɗa yu ta vlaŋtá pitirla, mantsa ya zivira ni guli kəʼa ya.

²⁰ Ta fitika gá mghama Yəhuram, ka ganavatá la Idum ta sidi ta gá mghama la Yuda, ka famtá həŋ ta ŋa taŋ mgham.

²¹ Ka laghu Yəhuram da Tsaghir nda inda mwata plisha ni. Ka wanaftá la Idum tsatsi nda maliha ta ghəŋa muta plisha ni, ama ka ndaptá həŋ ga rviɗik, ka hwayaghutá mnduha dzagha taŋ.

²² Daga ma tsa fitik ya, ka ganavatá la Idum ta sidi ta gá mghama la Yuda, mantsa ya nzakwa ni ha gita. Ma va tsa fitik ya ganavatá la Livna ta sidi ta la Yuda guli.

²³ Pɗakwa slnaha Yəhuram, nda inda skwiha ya maga tsi ná, vivindam vivinda lu ma ɗelewera vinda slnaha mghamha la Yuda.

²⁴ Ka laghu Yəhuram da dzidzíha ni, ka paɗamtá lu ta vata dzidzíha ni ma luwa Dawuda. Ka lam zwaŋa ni Ahaziya da gá mgham ma vla ni.

Gá mghama Ahaziya ma Yuda

²⁵ Ta maghwaŋpəɗ hisa vakwa Yuram, zwaŋa Ahav, mghama la Israʼila ta pala, ka nzatá Ahaziya, zwaŋa Yəhuram ka mghama la Yuda.

²⁶ Hisambsak his mida ima Ahaziya ta nzatá tsi ka mgham. Turtuk vakwa ni ta gá mgham ma Ursalima. Ghataliya hga ma ni, zigha Ghumri, mghama la Israʼila.

²⁷ Ka ksaftá tsi ta saɗa la ga Ahav, ka mag tsi ta ghwaɗaka skwi ta wa ira Yawe manda ŋa la ga Ahav, kabga klafta ni ta makwa ni.

²⁸ Ka laghu Ahaziya kawadaga nda Yuram, zwaŋa Ahav da vulu nda Hazaʼel, mghama la Aram ma Ramut ma Gilghat. Ka balanatá la Aram ta Yuram.

²⁹ Ka vraghatá mgham Yuram da luwa Yizrəghel, da zughula vgha ni balana la Aram ma Ramut ma vəl vulu nda Hazaʼel, mghama la Aram ya. Ka laha Ahaziya, zwaŋa Yəhuram, mghama la Yuda da Yizrəghel da nghanaghatá Yuram, zwaŋa Ahav, kabga nda bala katakata.