2Mgh 7 - Hdi

¹ Ka Ilisa mantsa: « Snawa sna ta gwaɗa Yawe. Wya ka Yawe mnata: “Ta na luwa na mahtsim, dzaʼa mutsaf mutsa lu ta skwaptá kuɗisla hpu ka sulay turtuk, nda tughba urz ka sulay turtuk ta wa tgha luwa Samari kaʼa,” » kaʼa.

² Ka mali ma sludziha ya faf mgham ta ghəŋ tida nda mnda Lazglafta mantsa: « Dər má Yawe ka ghəŋa ni dzaʼa gwaniŋtá ghurumha ta luwa ná, dzaʼa magaku tsa skwi mna ka ya ra? » kaʼa. Ka Ilisa mantsa: « Dzaʼa nda ngha ka nda ira gha, ama zaŋta a ka wu, » kaʼa.

Hwayapta la Aram ma ghuɓa taŋ

³ Mamu sana mnduha fwaɗ nda ghwaɗaka lku ta həŋ ta nzaku ta wi tgha tva lami da luwa, ka həŋ mataba taŋ mantsa: « Kabgawu ŋa nzata mu hadna ha ka kəzla rwakwa mu na?

⁴ Ka “lama la da luwa,” ka mu, wya maya hada, dzaʼa rwaku mu. Dər “nzama nza hadna,” ka mu, dzaʼa rwaku mu. Mbaɗma vlatá ghəŋa mu ma ghuɓa la Aram! Ka zlama zla həŋ nda hafu, dzaʼa nza nza mu nda hafu. Ka psla psla həŋ ta amu katək, dzaʼa rwaku mu, » ka həŋ.

⁵ Ka sliʼaftá həŋ beeghwa fitik ka dzaʼa da ghuɓa la Aram. Ta ɓhadaghatá həŋ ta wa ghuɓu, ta haɗ mndu wa.

⁶ Ka fatá Yawe ta snaŋta la Aram ta ghudzaga mwataha plis, nda plisha, nda hlawa ndəghatá sludziha, ka həŋ mataba taŋ mantsa: « Pgham pgha mghama la Israʼila ŋa vulu nda amu ta mghamha la Het, nda mghamha la Masar ŋa guyata nda amu, » ka həŋ.

⁷ Ka gazlaghutá həŋ beeghwa fitik ka laghwi, ka zlaŋtá tumpulha taŋ, nda plisha taŋ, nda kəɗihha taŋ, ka zlaŋtá ghuɓu manda va nzakwa ni, ka hwahwayaghutá həŋ ŋa kata hafa taŋ.

⁸ Ka ɓhadaghatá tsa mnduha fwaɗ nda ghwaɗaka lku ta həŋ ya ta wa ghuɓu, ka lam həŋ da ya turtuk ma tumpul, ka za skwa zay, ka sa skwa say. Ka hlaftá həŋ ta tsedi, nda dasu, nda lgutha ka laghwi da ɗiɗifanata. Ka vradaghatá həŋ, ka lami həŋ da sana tumpul, ka hlaftá həŋ ta huzlaha, ka laghwi həŋ da ɗiɗifanata.

⁹ Ka həŋ mataba taŋ mantsa: « Maga a mu ta skwi nda tva ni wa. Nana fitik gita na ná, fitika lfiɗa gwaɗa ya. Ka nza nza mu tsəriɗ ka kəzla tsaɗata vli ga sərɗək katsi ná, dzaʼa ksaf ksa dmaku ta amu. Sawuwa, mbaɗma ka mnanaŋta mu ta gwal ga mgham, » ka həŋ.

¹⁰ Ka lagha həŋ hgaŋtá gwal ngha wi tgha luwa ka rusanafta, ka həŋ mantsa: « Lagha la ŋni, ka lam ŋni da ghuɓa la Aram, lay haɗ mndu wa. Haɗ lwa mndu dər kuzleh wu, ta ghəŋa plisha nda kəɗihha ta hba yeya, ta nzakwa ni tumpulha manda va vla taŋ, » ka həŋ.

¹¹ Ka hgaŋtá gwal ngha wi tgha ta sana mndu ŋa dzaʼa mnanatá gwal ma huɗa həga gá mgham.

¹² Ka sliʼavatá mgham girviɗik, kaʼa nda kwalvaha ni mantsa: « Ta kumay yu ta mnaghunatá skwi payu la Aram ta ghəŋa amu. Nda sna həŋ kazlay ma maya mu katakata kəʼa, kəl həŋ ka sliʼapta ma ghuɓu ka laghwi da ɗiɗifaghuta ma vwah, ka həŋ ma ghəŋa taŋ na: “Ka sliʼagap sliʼa həŋ ma luwa ná, ŋa dɗanaghata mu ta həŋ, ka hlafta həŋ ta ndiri ta ndiri, ka laghwa mu da luwa,” ka həŋ, » kaʼa.

¹³ Ka sani ma kwalvaha ni mantsa: « Ghunafma ghuna ta mnduha ka dzaʼa həŋ hlaftá plisha hutaf ta pɗaku ma luwa, ka dzaʼa həŋ nghanatá skwi ya ta magaku. Ka mamu skwi dzaʼa slanaghata həŋ, dzaʼa nda nza manda va ŋa ndəghata la Israʼila ta nzaku ma luwa na, kabga ta wa hɗak nzata nzakwa na amu na. Ghunafma ghuna ta həŋ, ka ngha mu! » ka həŋ.

¹⁴ Ka hlaftá lu ta mwataha plis his nda plisha taŋ ghunagha mgham ŋa dzaʼa zbiŋtá sludziha la Aram. « Lawa la nghanatá skwi ta magaku, » kaʼa nda həŋ.

¹⁵ Ka laghu həŋ zbiŋtá həŋ ha da zala Yardeŋ. Ka slaslanaghatá həŋ ta tvi ta ndəghata lgutha, nda huzlaha pghiŋ la Aram ma vəl hwaya taŋ. Ka vragaghata tsa gwal ghunay ya rusanaftá mgham.

¹⁶ Ka sliʼadaghatá mnduha ma luwa Samari da zləɗatá ghuɓa la Aram. Ka mutsaftá lu ta skwaptá kuɗisla hpu ka sulay turtuk, nda tughba urz ka sulay turtuk, taɓta gwaɗa ya mna Yawe.

¹⁷ Vlaŋ vla mgham ta tvi ta tsa mali ma sludziha ni ya faf tsi ta ghəŋ tida ya, ŋa ngha skwi dzaʼa magaku ta wi tgha. Ama ka diŋlanaptá mnduha ta wi tgha, ka mtuta tsi, manda ya mna mnda Lazglafta ma fitika lagha mgham da tsi ya kay.

¹⁸ Si mnana mna mnda Lazglafta ta mgham kazlay: « Dzaʼa laviŋ lava lu ta mutsaftá tughba urz ta sulay turtuk, dzaʼa skwap skwa lu ta kuɗisla hpu, ta sulay turtuk mahtsim ta na luwa na ma luwa Samari, » kəʼa ya kay.

¹⁹ Ma tsa fitik ya, ka tsa mali ma sludziha ya si nda mnda Lazglafta na: « Dər má Yawe ka ghəŋa ni dzaʼa gwaniŋtá ghurumha ta luwa ná, dzaʼa magaku tsa skwi mna ka ya ra? » kaʼa sizlay. Ka Ilisa nda tsi mantsa: « Dzaʼa nda ngha ka nda ira gha, ama zaŋta a ka wu, » kaʼa.

²⁰ Tsaya skwi ta slanaghatá tsa mndu ya. Ka diŋlanaptá mnduha ta wi tgha, ka mtutá tsi ya.