2Mgh 25 - Hdi

Wanafta Nevuhadnetsar ta Ursalima nda vulu

¹ Ta matəmbaya vakwa Tsidkiya ta gá mgham, baɗ maghwaŋa fitik ma maghwaŋa tili, ka lagha Nevuhadnetsar, mghama Babila kawadaga nda inda gwal vula ni da dɗanaghatá Ursalima. Ka fatá tsi ta ghuɓa ni nda ta kəma ni, ka sŋanavata tsi ta haɗik ka wanaftá luwa.

² Ka wanaftá tsi ta tsa luwa ya nda vulu ha ka lagha ta maghwaŋpəɗ ndeŋa vakwa Tsidkiya ta gá mgham.

³ Baɗ matəmbay ma tila mafwaɗ, ka kuzlaku maya katakata ma luwa, ta haɗ skwi ŋa zaŋta mnduha wa.

⁴ Ka zlraptá lu ta ghurum ma matsaka luwa. Ka hwayaghutá inda gwal vulu girviɗik nda ta wa tgha ma takataka matsakha his ta vata gavaka mgham dər má wanaf wa la Babila ta luwa. Ka ksaghatá mgham Tsidkiya nda sludziha ni ta tvi nda ma daɓa Gharava.

⁵ Ka zbiŋtá sludziha la Babila ta mgham, ka ksaftá həŋ ma daɓa Yeriku. Ka gazlaghutá inda sludziha ni, ka zlanavata.

⁶ Ka ksaftá tsa la Babila ya drus ta mgham, ka kladafta da mghama Babila ma Rivla. Ka tsanaghatá həŋ ta guma hada.

⁷ Ka ghwaghwanaftá həŋ ta zwana Tsidkiya ta wa ira ni, ka tsatsakwaslanaptá Nevuhadnetsar ta iriha Tsidkiya, ka habaftá tsi nda zləɓatá ziɗa ka ghuva tili, ka klaghata da Babila.

Tasiŋtá həga Yawe

⁸ Baɗ mandəfáŋa fitik ma mahutafa tili, ta maghwaŋpəɗ təmbaya vakwa Nevuhadnetsar ta gá mgham ta ghəŋa la Babila, ka lagha Nəvuzaradaŋ, mali ta ghəŋa gwal ta nghapta, kwalva mghama Babila, ka lami da Ursalima.

⁹ Ka dariŋtá tsi ta həga Yawe, nda həga gá mgham, nda inda həgaha ma Ursalima. Ka fafiŋtá tsi ta inda həgaha gwal dagaladagala ma luwa.

¹⁰ Ka tasiŋtá inda sludziha la Babila ta pgha tsa mali ta ghəŋa gwal ta nghapta ya ta matsakha ta wamtá Ursalima.

¹¹ Ka hlaghatá Nəvuzaradaŋ, mali ta ghəŋa gwal ta nghapta ka vuʼa ta pɗakwa mnduha ma luwa Ursalima, nda gwal ta vlatá ghəŋa taŋ ŋa mghama Babila, nda inda pɗakwa mnduha.

¹² Ama ka zlanatá tsa mali ta ghəŋa gwal ta nghapta ya ta sanlaha ma la ka pɗu dgər ma luwa ŋa hva, nda ya ŋa nghapta ka vwahha inabi.

¹³ Ka dzaɓiŋtá la Babila ta guguɗiha his ka ghuva tili ma həga Yawe, nda ameleŋkiha, nda glifiŋ dagala ka ghuva tili fa lu ma tsa həga ya. Ka hlaghatá həŋ ta tsa ghuva tili ya da Babila.

¹⁴ Ka hlaghatá həŋ guli ta hutayha, nda pelha, nda maŋaha, nda leghwaha, nda inda huzla ka ghuva tili ta mag lu ta slna nda həŋ ma həga Yawe.

¹⁵ Ka hlaghatá mali ta ghəŋa gwal ta nghapta guli ta inda huzlaha ka dasu ka dasu nda ya ka kfura tsedi: Ta nzakway ka hutayha, nda leghwaha wutsikanatá skwi.

¹⁶ Tsa guguɗiha his, nda glifiŋ dagala, nda ameleŋkiha si mamagaf Salumuŋ ŋa həga Yawe ya, laviŋ a lu ta graftá ndəgakwa ghuva tila tsa huzla ya wa.

¹⁷ Mitər təmbay slrakwa ya turtuk ma tsa guguɗiha ya. Mamu dzugwa ta ghəŋa ni ka mitər nda rita slada ni. Nda rka rka ni nda madagalgal nda ya nda skwiha manda rimuŋ ta wanafta. Inda taŋ ka ghuva tili. Manda tsaya tsa mahisa guguɗi ya, nda madagalgala ni tani.

¹⁸ Ka ksaghatá tsa mali ta ghəŋa gwal ta nghapta ya ta Səraya, mali ta ghəŋa gwal dra skwi ŋa Lazglafta, nda Tsəfaŋyahu, mnda dra skwi ŋa Lazglafta ka sagəŋ mista ni, nda gwal hkən ta ngha wi tgha həga Yawe.

¹⁹ Ka ksaftá tsi ma luwa ta mapsla, mala gwal vulu, nda mnduha hutaf mataba gwal ta vla hiɗaku ŋa mgham, slanagha lu ma luwa, nda mnda vindanata vindi ta mala gwal vulu. Hlamtá mnduha ta tsa haɗik ya da sludzi slna ni. Ka hlaftá tsi guli ta mnduha mkuʼ mbsak mataba mnduha slanagha lu ta həŋ ma luwa.

²⁰ Ka hlaghatá Nəvuzaradaŋ, mala gwal ta nghapta ta həŋ da mghama Babila ma Rivla.

²¹ Ka pslatá mghama Babila ta həŋ ma Rivla ta haɗika Hamat. Manda tsaya hlaghata lu ka vuʼa ta la Yuda diʼiŋ nda haɗika taŋ.

Gədalyahu, guvna la Yuda

²² Ka fanaghatá Nevuhadnetsar, mghama Babila ta Gədalyahu zwaŋa Ahikam, zigha Safaŋ ka guvna ta ghəŋa pɗakwa mnduha, gwal zlana tsi ma haɗika la Yuda ya.

²³ Snaŋta maliha bakuha gwal vulu nda mnduha taŋ kazlay na: Fam fa mghama Babila ta Gədalyahu ka guvna kəʼa, ka lagha həŋ slanaghatá Gədalyahu ma Mitspa. Tsaha ya i Yismaghel, zwaŋa Nətaŋya, nda Yuhanaŋ, zwaŋa Kareyah, nda Səraya, zwaŋa Taŋhumet mnda la Nətufa, nda Yaʼazaŋyahu, zwaŋa mnda la Maghaha, kawadaga nda mnduha taŋ.

²⁴ Ka waɗanatá Gədalyahu ta həŋ nda mnduha taŋ, kaʼa nda həŋ mantsa: « Ma zləŋ kuni ta maliha la Babila. Nzawa nza ta na haɗik na, ka maganata kuni ta slna ta mghama Babila, dzaʼa nza nza kuni ləŋləŋ, » kaʼa.

²⁵ Ama ta mandəfáŋa tili, ka lagha Yismaghel, zwaŋa Nətaŋya, zigha Ilisama, ma mndəra la ka mgham kawadaga nda mnduha ghwaŋ, ka dzatá həŋ ta Gədalyahu. Pslaha həŋ ta la Yuda, nda la Babila kawadaga nda tsi ma Mitspa.

²⁶ Ka hwayaftá inda mnduha, nda zwani tani, nda galata mndu tani, nda maliha gwal vulu tani, ka laghwi da Masar, kabga zləŋafta taŋ ta la Babila.

Zligiŋtá Yəhuyakiŋ ma gamak

²⁷ Ta mahkən mbsaka ndəfáŋ mida vaku manda klaghatá Yəhuyakiŋ, mghama la Yuda ka vuʼa, baɗ mahisambsak ndəfáŋ mida ma tila maghwaŋpəɗ his, ka tawatá Ivilʼmərudah, mghama Babila ta taŋtaŋa vakwa ni ta gá mgham ta hiɗahiɗa ta Yəhuyakiŋ, mghama la Yuda, ka zligiŋtá tsi ma gamak.

²⁸ Ka gwaɗ Ivilʼmərudah ta gwaɗa zɗaku nda Yəhuyakiŋ, ka vlaŋtá tsi ta glaku, ka malaghutá ŋa sanlaha ma mghamha kawadaga nda tsi ŋaghu lu ma Babila.

²⁹ Ka suɗiŋtá Yəhuyakiŋ ta lguta ga vuʼa ma gamak tida, ka zə tsi ta skwa zay ta kuwata ɗafa mghama Babila ha kɗavakta nzakwa ni nda hafu.

³⁰ Mantsa tama, Ivilʼmərudah mghama Babila ta nghapta ka Yəhuyakiŋ inda fitik ma nzakwa ni nda hafu.