2Mgh 12 - Hdi

Gá mghama Yuʼas ma Yuda

¹ Ndəfáŋ ima Yuʼas ta nzatá tsi ka mgham.

² Ta mandəfáŋa vakwa Yehu ta gá mgham lafa Yuʼas ta pala, fwaɗ mbsak vakwa ni ta gá mgham ma Ursalima. Tsivya hga ma ni, makwa la Bəʼerseva.

³ Ka mag Yuʼas ta skwi tɗukwa ta wa ira Yawe ma nzakwa ni nda hafu, kabga ta taghay Yəhuyada, mnda dra skwi ŋa Lazglafta ta skwi ŋa ni.

⁴ Kulam nda tsa, hlu a vliha tskal tskala wa. Ka gɗatá mnduha ta pla ghəŋ, nda dra urdi ŋa dray nda dra ta tsa vliha tskal tskala ya.

Payafta Yuʼas ta həga Yawe

⁵ Ka Yuʼas nda mnda dra skwi ŋa Lazglafta mantsa: « Inda tsedi faghu lu ta klakta lu da həga Yawe, tsa tsedi tsatsaf lu ta inda mndu ŋa klakta taɓta ya tsaf lu ya, nda tsedi ta vlatá mndu nda kumay ni ya,

⁶ ka zlgha gwal dra skwi ŋa Lazglafta ta tsa tsedi ya da mnda ni ta tskay, ka hla həŋ ŋa paya vliha ta ɓadzuta nda ra ka payay ta slanaghata lu ma həga Lazglafta, » kaʼa.

⁷ Ama ha ka labi ta mahisambsak hkən mida vakwa Yuʼas ta ga mgham, ta payaŋ a gwal dra skwi ŋa Lazglafta ta vli ta ɓadzuta ta həga Yawe wa.

⁸ Ka hgaftá mgham Yuʼas ta Yəhuyada, nda sanlaha ma gwal dra skwi ŋa Lazglafta guli, kaʼa nda həŋ mantsa: « Kabgawu kwal kuni payaftá vliha ta ɓadzuta ta raku ka payanata ma həga Yawe na? Ndanana, yaha kuni da zlghəgəltá tsedi da mnduha ghuni ta tskay, ama ka vla kuni ŋa paya həga Yawe, » kaʼa.

⁹ Ka tsuʼaftá gwal dra skwi ŋa Lazglafta ta kwal zlghəgəltá tsedi da mnduha, nda kwal kul nghəglanaghatá paya həga Lazglafta.

¹⁰ Ka klaftá Yəhuyada, mnda dra skwi ŋa lazglafta ta sana akwati, ka zlratá ghurum ta paɗuwa ni, ka fata ta vata gwir nda ga zeghwi ta lam lu da həga Yawe. Mbaɗa gwal dra skwi ŋa Lazglafta ta ngha tsa wi tgha ya ka pghay dida ta inda tsedi ta hlakta lu da həga Yawe.

¹¹ Nghay taŋ ta tskata tsedi ŋulum ma tsa akwati ya, ta lagha la mndu ta vindanatá vindi ta mgham kawadaga nda mali ta ghəŋa gwal dra skwi ŋa Lazglafta mbəɗaftá tsa tsedi ma həga Yawe ya, ka hahabafta.

¹² Kɗakwa taŋ ta mbəɗafta ya, ŋa vlaŋta taŋ ta maliha ta ghəŋa gwal ta maga slnaha ma həga Yawe. Ta hlay həŋ ta tsa tsedi ya ŋa pla gwal ta maga slna ma həga Yawe, ta nzakway ka gwal tsa dzaʼuwa,

¹³ nda gwal ba həga brik, nda gwal fiɗa pala, nda ya ŋa skwa udzuha, nda fifiɗatá palaha nda ra ŋa paya həga Yawe, nda ya ŋa pla inda hamata slnaha ta nghanatá paya həga Lazglafta.

¹⁴ Ama tsa tsedi ta hladaghata lu da həga Yawe ya ná, haɗ lu ta klay ŋa tsa glifiŋha ka kfura tsedi, nda maŋaha, nda kliwtirha, nda talakwaha, nda dər wati ma huzla ka dasu nda ya ka kfura tsedi ya wa.

¹⁵ Ta vlaŋtá maliha ta wa slnaha lu ŋa klay taŋ ŋa paya həga Yawe.

¹⁶ Haɗ lu dzaʼa ɗaway da tsa mnduha vlaŋ lu ta tsa tsedi ŋa vlay ŋa mnduha ta maga slna ya, ta skwi ta mag həŋ nda tsi wu, kabga nda tva ni ta maga həŋ.

¹⁷ Tsedi ya ta vlata lu ŋa pla ghəŋa paya tvi, nda ya ŋa pla ghəŋa ɗawa pla dmaku ya, fa a lu ta tsaha ya da akwata həga Yawe wu, nghanatá gwal dra skwi ŋa Lazglafta tsaha ya.

Kɗavakta ga mghama Yuʼas

¹⁸ Ma tsa fitik ya, ka lagha Hazaʼel, mghama la Aram zlaganavatá luwa Gat, ka zata. Tahula tsa, ka kuratá tsi ta dzaʼa zlaganavatá Ursalima nda vulu.

¹⁹ Ka hlaftá Yuʼas, mghama la Yuda ta inda huzlaha, ya si pghana dzidzíha ni i Yəhusafat, nda Yəhuram, nda Ahaziya, mghamha la Yuda ta Yawe, nda ya si pghana tsatsi guli, nda inda dasu si ma dzuguva ɗifa skwa gadghəl ma həga Yawe, nda ŋa həga gá mgham, ka tsəghanafta demdem ta Hazaʼel, mghama la Aram. Ka vraghutá tsi ka zlanatá Ursalima.

²⁰ Pɗakwa slnaha Yuʼas, nda inda skwiha maga tsi, vivindam vivinda lu ma ɗelewera vinda slnaha mghamha la Yuda.

²¹ Ka sliʼavaftá kwalvaha ni, ka kalaftá hiɗaku, ka dzatá həŋ ta Yuʼas ma Betʼmilu, ta tva laha nda ma Sila.

²² Kwalvaha ni i Yuzavat, zwaŋa Simghat, nda Yəhuzavat, zwaŋa Sumer ta dzata, ka mtutá tsi. Ka paɗamtá lu ta vata dzidzíha ni ma luwa Dawuda. Ka lam zwaŋa ni Amatsiya da gá mgham ma vla ni.