2Mgh 10 - Hdi

Pslata Yehu ta la ga Ahav

¹ Ndəfáŋ mbsak zivira Ahav ta nzakw ma Samari. Ka vivindaftá Yehu ta ɗelewerha, ka tsəghadaghata da Samari ŋa maliha ma Yizrəghel, nda la galata mndu, nda gwal ta nghapta ka zivira Ahav, kaʼa nda həŋ mantsa:

² « Tsəhala da kaghuni zivira daŋahəga ghuni, nda mwata plisha, nda plisha, nda luwa ya ŋam lu ma matsaka huzlu, nda huzla vulu ya, na gi tsuʼafta ghuni ta na ɗelewer na ya,

³ ka zbapta kuni ta ya nda ra mataba zivira daŋahəga ghuni, ka fafta kuni ta dughurukwa ga mghama da ni. Tahula tsa, ka vula kuni ta vulu ŋa katá həga mghama ghuni, » kaʼa.

⁴ Ka zləŋ həŋ ta zləŋ katakata, ka həŋ mantsa: « His mghamha kul ŋaŋta da tsi, waká amu dzaʼa ŋafta na? » ka həŋ.

⁵ Ka ghunaftá mali ta ghəŋa həga ga mgham, nda mali ta ghəŋa luwa, nda la galata mndu, nda gwal ta nghapta ka zivira Ahav ta mndu ŋa mnanatá Yehu kazlay: « Kwalvaha gha ŋni, dzaʼa magay ŋni ta inda skwi dzaʼa ka mnaŋnata. Haɗ sana mndu dzaʼa ŋni fafta ka mgham ta dughurukwa gá mgham wu, maga manda ya ta zɗəgaghata, » ka həŋ.

⁶ Ka vindəglanaftá Yehu ta mahisa ɗelewer ta həŋ, kaʼa mantsa: « Ka mista ɗa kuni, nda fa vgha ghuni ŋa sna gwaɗa da iʼi katsi, ɗaɗatsaghuwa ɗaɗatsa ta ghəŋa inda zivira rvera ghuni, ka hlaɗikta kuni mahtsim ta na luwa na ma Yizrəghel, » kaʼa. Tsaw tsa zwana mgham ndəfáŋ mbsak ya ná, ga maliha ma luwa dagapta lu ta həŋ ŋa galay taŋ ta həŋ.

⁷ Na gi ɓhadaghata tsa ɗelewer ya da dzva taŋ, ka hlaftá həŋ ta tsa zivira mgham ndəfáŋ mbsak ya, ka ghwaghwanafta. Ka pghamtá həŋ ta ghəŋha taŋ ma tughbaha, ka tsəghanaftá Yehu ma Yizrəghel.

⁸ Ka lagha mnda ghunay da mnanata, kaʼa mantsa: « Wana hlaghakta lu ta ghəŋha zivirha mgham, » kaʼa. Ka Yehu mantsa: « Tsakanawa tsaka ma vliha his ta wi tgha tva sami da luwa, ka nzakwa həŋ ha ga sərɗək, » kaʼa.

⁹ Ka sab Yehu ga sərɗək, ka sladata ta kəma inda mnduha, kaʼa mantsa: « Haɗ skwi ga kaghuni wa. Iʼi nda ghəŋa ɗa ta kalaftá hiɗaku ŋa dzatá daŋahəga ɗa, ka dzata yu. Ama wa ta pslatá nanaha na demdem na?

¹⁰ Snaŋwa sna tama kazlay na, haɗ gwaɗa mna Yawe ta ghəŋa la ga Ahav dzaʼa dɗata ta haɗik wa. Hɗanam hɗa Yawe ta skwi ya mna tsi nda ma wa kwalva ni Iliya, » kaʼa.

¹¹ Ka pslatá Yehu ta sanlaha ta pɗaku ma la ga Ahav ma Yizrəghel, nda inda maliha ni, nda graha ni, nda gwal dra skwi ŋa lazglafta. Haɗ ya zlana tsi nda hafu dər turtuk wa.

¹² Tahula tsa, ka ksaftá Yehu ta tvi ŋa dzaʼa da Samari. Ta tvi, ɓhadaghar tsi da sana vli ta hgə lu ka Betʼeketa gwal ngha rini,

¹³ ka guyatá Yehu nda zwana ma ni ma Ahaziya, mghama la Yuda, ka ɗawaŋtá tsi: « Wa kaghuni na? » kaʼa. Ka həŋ zlghaftá wi mantsa: « Aŋni zwana ma ni ma Ahaziya ya. Sa da ganaghatá zgu ta zwana mgham nda zwana markwa mgham ŋni, » ka həŋ.

¹⁴ Ka Yehu mantsa: « Hlafwa hla ta həŋ nda hafu nda hafu, » kaʼa. Ka hlaftá lu ta həŋ nda hafu nda hafu, ka ghwaghwanaftá lu ta həŋ, ka pghaghata da vavrəm ma Betʼeket. Fwaɗ mbsa his mida həŋ. Haɗ ya zlana Yehu dər turtuk ma həŋ wa.

Gmakwa i Yehu nda Yunadav

¹⁵ Ka sliʼaftá tsi hada, ka guyatá tsi nda Yunadav, zwaŋa Rehav ta sagha da guyay. Ka ganaghatá tsi ta zgu, kaʼa ɗawaŋta da tsi mantsa: « Ta rfu ŋuɗufa gha nda iʼi manda ɗaslakwa na ŋa ɗa nda kagha na ra? » kaʼa. Ka Yunadav zlghaftá wi mantsa: « Aŋi, » kaʼa. « Ka si mantsa tsi, yaha ta dzva gha, » kaʼa. Ka vlaŋtá Yunadav ta dzvu, ka tɗadaftá Yehu ta vata ni da mwata plis ni,

¹⁶ kaʼa nda tsi mantsa: « Sawi mista ɗa, ka ngha ka ta ŋavata ta ŋavata yu ka vulu ŋa Yawe, » kaʼa. Ka klaghatá tsi mista ni ma mwata plisa ni.

¹⁷ Ɓhadaghata taŋ da Samari, ka pslatá Yehu ta inda la Ahav ta pɗaku ma luwa. Ka zaɗanatá tsi ta həŋ nekwnekw manda ya mna gwaɗa Yawe nda ma wa Iliya.

Hlanata Yehu ta pla ghəŋ ŋa Baghal

¹⁸ Tahula tsa, ka tskanatá Yehu ta inda la Samari, kaʼa nda həŋ mantsa: « Kiʼa nda kiʼa yeya maganata Ahav ta slna ta Baghal, ama ŋulum dzaʼa maganata Yehu ta slna.

¹⁹ Ndanana, hagagiɗighawa haga ta inda anabiha Baghal, nda inda gwal ta maganatá slna, nda inda mnduha ni ta dranatá skwi. Yaha mndu da pɗavaghuta dər turtuk, kabga ta kumay yu ta vlatá skwa pla ghəŋ dagala ŋa Baghal. Dər wa dzaʼa pɗavaghuta, nzata a nda hafu wu, » kaʼa. Tsaw hiɗakwa ni magaf Yehu ŋa zaɗanatá inda gwal ta maganatá slna ta Baghal.

²⁰ Ka Yehu mantsa: « Hgawa hga ta tska vgha dagala ŋa tsəlɓa vlaŋtá glaku ta Baghal, » kaʼa. Ka hgatá lu.

²¹ Ka ghwanaftá Yehu ta gwal ghunay ta inda haɗika la Israʼila. Ka sliʼaktá inda gwal ta maganatá slna ta Baghal. Haɗ mndu dər turtuk ta pɗavaghuta wa. Ka sliʼadamtá həŋ da həga Baghal, ka ndəghanaftá tsa həga ya hesl.

²² Ka Yehu nda mndu ya ma dzva ni lguta tsəlɓu ŋa Baghal mantsa: « Hlagap hla ta lgut ŋa inda gwal ta maga slna ŋa Baghal, » kaʼa. Ka hləganaptá tsa mndu ya ta həŋ.

²³ Ka lam i Yehu nda Yunadav, zwaŋa Rehav da tsa həga Baghal ya, kaʼa nda gwal ta maganata slna ta Baghal mantsa: « Vitsanawa vitsa ɗina, ŋa grafta ghuni kazlay haɗ kwalva Yawe mataba ghuni wu, ta ghəŋa kaghuni ta maganata slna ta Baghal yeya kəʼa, » kaʼa.

²⁴ Ka lam i Yehu nda Yunadav da vla skwa pla ghəŋ nda ya ŋa dray tsuh tsuh ŋa Baghal. Tsaw pgha pgha Yehu mabli tani ta mnduha tghas mbsak, kaʼa mnanatá həŋ mantsa: « Ka mamu mndu ta zliŋtá ya dər turtuk ma tsa mnduha pghaghunam yu ma dzva ghuni ya katsi, tsatsi dzaʼa mtaku ma vla ni, » kaʼa.

²⁵ Kɗakwa taŋ ta vlatá skwa pla ghəŋ ŋa dray tsuh tsuh, ka Yehu nda sludziha, nda maliha taŋ mantsa: « Lamwa la ka pslata kuni ta həŋ, yaha yaha ya dər turtuk da ndapta, » kaʼa. Ka pslatá həŋ ta həŋ nda kafay. Ka vazigiŋtá sludziha nda maliha taŋ ta mbliha taŋ dzibil. Tahula tsa, ka zadamtá həŋ da huɗa həga Baghal.

²⁶ Ka klagaptá həŋ dzibil ta pala dzugwa lu ma həga Baghal, ka driŋta nda vu.

²⁷ Ka dzaɓanaptá həŋ ta tsa pala dzugwa lu ya, ka pəsliŋtá həŋ ta tsa həga Baghal ya, ka niŋta ka dra ha gita.

Gá mghama Yehu ma Israʼila

²⁸ Mantsa ya ka Yehu zaɗanatá vla glaku ŋa Baghal ma Israʼila.

²⁹ Ama mbəɗana a ta hul ta dmakwa Yaruvgham, zwaŋa Nəvat ta hlamtá la Israʼila dida ya wu, tsaya ta nzakway ka tsəlɓu ŋa mamakwa sla ka dasu ma Betel nda ya ma Daŋ ya.

³⁰ Ka Yawe nda Yehu mantsa: « Tsəhala maga maga ka ta skwi nda ma hɗamtá skwi tɗukwa ta wa ira ɗa, ka maganatá ka ta skwi manda va ya kumaŋ yu ta la Ahav ya, dzaʼa gay zivira gha ta mgham ta ghəŋa la Israʼila ha ka labi ta zigha mafwaɗ, dzaʼa nzaf nza həŋ ta dughurukwa ga mgham, » kaʼa.

³¹ Ama sna a Yehu ta zlaha Yawe, Lazglafta la Israʼila nda hya hya ŋuɗufa ni wa. Mbəɗana a ta hul ta dmakwa Yaruvgham ta hlamtá la Israʼila dida ya wa.

³² Ma va tsa fitik ya, ka zlraftá Yawe ta htanaghutá kwakwara la Israʼila. Ta inda kuraghuta mukuma, ka ghəzlaftá Hazaʼel, mghama la Aram ta la Israʼila.

³³ Zlrafta ni ta Yardeŋ nda təv safa fitik, ha ka laghu da luwa Gharugher ta wa zala Arnuŋ, tsaya inda kwakwar tida la Gilghat nda la Basaŋ, nda kwakwara la Gat, nda la Rubeŋ, nda la Mənase ya.

³⁴ Pɗakwa slnaha Yehu, nda inda skwi ya maga tsi, nda glakwa mbrakwa ni ná, vivindam vivinda lu ma ɗelewera vinda slnaha mghamha la Israʼila.

³⁵ Ka laghu Yehu da dzidzíha ni, ka paɗamtá lu ma Samari. Ka lam zwaŋa ni Yəhuʼahaz da gá mgham ma vla ni.

³⁶ Hisambsak tghas mida vakwa Yehu ta ga mgham ta ghəŋa la Israʼila ma Samari.