1Sam 14 - Hdi

Dra ŋuɗufa Yunataŋ

¹ Ma sana fitik, ka Yunataŋ zwaŋa Sawulu nda duhwala ni ta klanatá huzla vula ni mantsa: « Sawi, ka tsughwaɗadapta u ha ta vata bakwa gwal vula la Filisti ta a ɓlu a, » kaʼa. Ama snanam a ta da ni wa.

² Ta nzaku Sawulu ta mukuma Givgha, mista fwa rimuŋ ma Migruŋ, nda sludziha ta maga mkuʼ dərmək (600) kawadaga nda tsi.

³ Hada Ahiya zwaŋa Ahituv zwaŋama ni ma Ikavut zwaŋa Pinhas, zigha Iliya mnda dra skwi ŋa Yawe ma Silu. Tsatsi ta kla ifut ma tsa fitik ya. Sna a mnduha kazlay na laghu la Yunataŋ kəʼa wa.

⁴ Nda ma tsa zlərɗa ta zbə Yunataŋ ŋa lagha liŋtá tsa bakwa gwal vula la Filisti ya, mamu sana sliʼiŋha pala, Butsets hga sani, Sene hga sani.

⁵ Nzuŋ təv mazlay sani ma tsa sliʼiŋa pala ya mbəŋ nda Mikmas, nzuŋ nda təv maghura sani, mbəŋ nda Gevagh.

⁶ Ka Yunataŋ nda tsa duhwala ni ta klanatá huzla vula ni ya mantsa: « Sawi, lab u la dikw da vla bakwa na gwal kul tsaku fafaɗa taŋ na. Ka waya ká skwi dzaʼa laʼuf la Yawe ta hul, kabga haɗ skwi dzaʼa pyaftá Yawe ka mbanaftá mndu wu, dər má kiʼa mbsak, dər má dagala tsi, » kaʼa.

⁷ Ka tsa duhwal ta klanatá huzla vula ni ya nda tsi mantsa: « Maga manda ya kura ŋuɗufa gha, ksa ta ndana gha. Wana yu kawadaga nda kagha, nda fa vgha ɗa ŋa dzaʼa mista gha, » kaʼa.

⁸ Ka Yunataŋ mantsa: « Ndanana, mbaɗa nda təv na mnduha na, ka nghaŋta həŋ ta uʼu! kaʼa.

⁹ Ka ka həŋ mantsa: “Sladawa slada ha ka ɓhadaghata ŋni da kaghuni!” ka həŋ nda uʼu ya, nzaghuta u, haɗ u dzaʼa lafi nda da həŋ wa.

¹⁰ Ama ka ka həŋ mantsa: “Safwa sa da aŋni!” ka həŋ ya, lafa u, kabga vla vla Yawe ta həŋ ma dzva u nda tsa. Tsaya ŋizla u, » kaʼa.

¹¹ Ka sab həŋ bɗaŋay his his ta wa ira la Filisti. Ka la Filisti mantsa: « Waʼa la Hebru ta sabi ta ɗifa ma ghurum, » ka həŋ.

¹² Ka zgwana ma tsa baku ya nda Yunataŋ, nda ya nda tsa mnda klanatá huzla vulu ya mantsa: « Safwa sa da aŋni, ka zgun kuni, » ka həŋ. Ka Yunataŋ nda tsa duhwal ta klanatá huzla vulu ya mantsa: « Ŋla mista ɗa, vla vla Yawe ta həŋ ma dzva la Israʼila, » kaʼa.

¹³ Ka laf Yunataŋ ta tsakam ta tsakam, nda tsa duhwal ta klanatá ghuzla vulu mista ni ya. Ɓhadaghata taŋ da tsa vli ya, ka ɗatsatá Yunataŋ ta la Filisti ka zlambanaptá həŋ ta haɗik, ta dzaʼa tsa duhwal ta klanatá huzla vulu ya nda kɗiŋtá həŋ nda hula ni.

¹⁴ Ma tsa taŋtaŋa vulu ya ná, ka rwanatá i Yunataŋ nda tsa duhwal ta klanatá huzla vulu ya ta mnduha ta kla hisambsak, ta zwaŋa daɓi prək ka hvata sla ka vaghu.

¹⁵ Ka hlutá zləŋ katakata ta bakwa la Filisti, nda inda mnduha ta wanaftá həŋ. Ka hlutá zləŋ ta bakwa gwal vulu, nduk nda gwal ta ɓadza vli tani. Inda taŋ ka hlutá zləŋ ta həŋ ka wutsatá həŋ ta vgha. Ka gigiɗavaftá haɗik. Lazglafta ka ghəŋa ni ta famtá tsa zləŋ ya ma həŋ.

¹⁶ Ta nghay nghay sludziha Sawulu ta nghapta ta wa lilwa ma Givgha təv kwakwara la Biŋyamiŋ, ta tatamakwa sludziha la Filisti ka hwaya.

¹⁷ Ka Sawulu nda tsa mnduha ta vata ni ya mantsa: « Hagaŋwa haga ta vgha, ka mbəɗafta kuni ta vgha ŋa snaŋta ka i wa ta labi mataba mu, » kaʼa. Ka hagaŋtá lu, ba i Yunataŋ nda duhwal ta hlanatá huzla vulu yeya kul nghavata.

¹⁸ Ka Sawulu nda Ahiya, mnda dra skwi ŋa Lazglafta mantsa: « Gavaganagha gava ta akwata Lazglafta, » kaʼa. Tsaw ma tsa fitik ya ná, mataba la Israʼila akwata Lazglafta.

¹⁹ Ta gwaɗ Sawulu ta gwaɗa nda tsa mnda dra skwi ŋa Lazglafta ya ná, ta sgavaghatá sliʼavafta vli kuɗukuts ma ghuɓa la Filisti. Ka Sawulu nda mnda dra skwi ŋa Lazglafta mantsa: « Ma dəgəl ka tagha! » kaʼa.

²⁰ Ka tskavatá i Sawulu nda inda mnduha kawadaga nda tsi, ka lagha həŋ dikw da ghwata vulu. Ka zlaɓavaftá inda la Filisti katakata, ka psluvtá vgha taŋ nda kafaya taŋ.

²¹ Daga manda ghalya, mamu la Hebru si ta laghwi mista la Filisti, ka laf həŋ da ghuɓu kawadaga nda həŋ. Hada, ka galaptá həŋ ta vgha, ka gwaftá vgha kawadaga nda la Israʼila, nda Sawulu, nda ya nda Yunataŋ.

²² Ka snaŋtá inda tsa la Israʼila si ta ɗifaghuta ma kwakwar ta ghwá la Ifrayim ya kazlay ta hwaya la Filisti kəʼa, ka liŋtá həŋ ta həŋ guli ka pslatá həŋ.

²³ Baɗ tsa fitik ya, ka katatá Yawe ta la Israʼila. Ka vulu lu ta tsa vulu ya ha ka tsughwaɗaghata ta ɓla Betʼaveŋ.

Waɗata Sawulu ta waɗu ta hwaya ta hwaya

²⁴ Ka nzakw tsa vaghu ya ka vagha hərfakwa la Israʼila, kabga habana haba Sawulu ta mnduha nda ma waɗu kazlay na: « Nda ksiʼa mndu ta zaŋtá skwi ma kɗaku hawu, ta kul planamtá yu ta ghumaha ɗa, » kaʼa. Haɗ mndu ta ɗaŋtá skwa zay wa.

²⁵ Ka ɓhadaghatá inda mnduha da sana həga fu. Hada, mamu zuɗum kulam ta haɗik.

²⁶ Ta sliʼadamtá mnduha da tsa həga fu ya, wyya ká zuɗum ta mbəzaku, ama haɗ mndu ta ɗaŋta, ka fadamtá dzvu da wi wu, kabga ta zləŋay mnduha ta tsa waɗu waɗa lu ya.

²⁷ Ama sna a Yunataŋ ta tsa waɗu pgham da ni ta mnduha dida ya wa. Ka fadaptá tsi ta dafa ma dzva ni, ka tsəghamta da zalama zuɗum, ka fadamta da wa ni. Ka tsaɗatá ira ni tsiɗiɗ.

²⁸ Ka sani mataba tsa mnduha ya nda tsi mantsa: « Pgham pgha da gha ta sludziha ma waɗu ka ŋəɗaŋəɗa kazlay na: “Nda ksiʼa mndu dzaʼa fadamtá skwa zay da wi gita,” kaʼa. Tsaya kəl mnduha ka hərfuta, » kaʼa.

²⁹ Ka Yunataŋ mantsa: « Kəɓa mnduha ta kəɓa da ɗa. Nghawa ta tsaɗatá ira ɗa ɓa tapanar yu ta na zuɗum na.

³⁰ Ka si má ta tapanatá mnduha ta skwi zləɗa həŋ ta ghuma taŋ gita ná, má fərtu fərta la Filisti pəsla lu, » kaʼa.

³¹ Baɗ tsa fitik ya, ka pslatá sludziha la Israʼila ta la Filisti, sliʼafta ma Mikmas dikw da Ayaluŋ. Ka hərfuta həŋ katakata,

³² ka pghaftá həŋ ta vgha ta skwa zləɗu. Ka hlaftá həŋ ta rina fisik, nda slaha, nda rva slaha, ka hanay ta haɗik, ka zay nda ndiri ndiri.

³³ Ka lagha lu da mnanatá Sawulu, ka lu nda tsi mantsa: « Waʼa mnduha ta ga dmaku ŋa Yawe nda ma za skwi ndiri ndiri! » ka lu. Ka Sawulu mantsa: « Mbəɗana mbəɗa kuni ta hul ta Yawe! Taŋwaliɗikwa taŋwala ndana ndana ta pala dagala, » kaʼa.

³⁴ Ka Sawulu mantsa: « Tamwa ta ta vgha ma ghuɓa sludziha, ka mnanafta kuni ta inda mndu ŋa klaɗiktá sla ni, ka rina fisika ni a tsi, ŋa hanata hadna. Tahula tsa, laviŋ lava kuni ta zay. Tsaya ná, ganata a kuni ta dmaku ta Yawe nda ma zutá sluʼi ndiri ndiri wu, » kaʼa. Ga rviɗik, ka kladaghatá dər wa ta sla ni, ka lagha hnata ma tsa vli ya.

³⁵ Ka dzihwaftá Sawulu ta gwir ŋa Yawe. Tsaya taŋtaŋ gwir baf tsi ŋa vlaŋtá sgit ta Yawe.

³⁶ Ka Sawulu mantsa: « Lama la nda na rviɗik na lanistá la Filisti! Ka pəslata mu ta həŋ, ka zləɗata mu ta həŋ ha tsaɗatá vli. Haɗ lu dzaʼa zlanatá mndu dər turtuk nda hafu wu, » kaʼa. Ka həŋ mantsa: « Maga ta skwi ya ta zɗəgaghata, » ka həŋ. Ama ka mnda dra skwi ŋa Lazglafta mantsa: « Ɗawaŋma ɗawa karaku da Lazglafta, » kaʼa.

³⁷ Ka ɗawaŋtá Sawulu da Lazglafta, kaʼa mantsa: « Ka laha yu da liŋtá la Filisti ra? Dzaʼa vla vla ka ta həŋ ma dzva la Israʼila ra? » kaʼa. Ama baɗ tsaya, zlghanaf a Lazglafta ta wi wa.

³⁸ Ka Sawulu mantsa: « Gavagaghawa gava da hadna, kaghuni demdem, la mali ta ghəŋa sludziha. Psapwa psa ka nghanata kuni, ka ma wu gata mu ta dmaku gita ya.

³⁹ Ta waɗa waɗa yu nda hga Yawe nda hafu mida ya ta mbanaftá la Israʼila, dər má ta ghəŋa dmaku turtuk ga zwaŋa ɗa Yunataŋ tsi, dzaʼa dza dza lu, » kaʼa. Mataba inda mnduha, haɗ mndu ta zlghanaftá wi wa.

⁴⁰ Ka Sawulu nda la Israʼila tama mantsa: « Kaghuni demdem la Israʼila, nzaghuwa nza ta slərpu, ta nzaghutá iʼi nda zwaŋa ɗa Yunataŋ ta sana slərpu, » kaʼa. Ka mnduha nda Sawulu mantsa: « Maga ta skwi ta zɗəgaghata, » ka həŋ.

⁴¹ Ka Sawulu nda Yawe mantsa: « Lazglafta la Israʼila, maraŋ mara ta kahwathwata! » kaʼa. Ka ɗikwaftá lu nda ma vzaftá Urim nda Tumim ta i Yunataŋ nda Sawulu, slanagha a lu ta dmaku da sanlaha ma mnduha wa.

⁴² Ka Sawulu mantsa: « Vzafwa vza ta vindima ta ghəŋa iʼi nda zwaŋa ɗa Yunataŋ, » kaʼa. Ka ɗikwaftá lu ta Yunataŋ.

⁴³ Ka Sawulu nda Yunataŋ mantsa: « Rusaɗif rusa ta skwi maga ka, » kaʼa. Ka rusanaftá Yunataŋ, kaʼa mantsa: « Mantsa nzakwa ni, tapana tapa yu kiʼa ta zuɗum nda wa dafa ma dzva ɗa. Wana yu, nda fa vgha ɗa ŋa mtaku, » kaʼa.

⁴⁴ Ka Sawulu mantsa: « Ka tsaɗigha tsa Lazglafta ta guma katakata ka dza a lu ta kagha, a Yunataŋ! » kaʼa wahata.

⁴⁵ Ka mnduha nda Sawulu mantsa: « Nu! Yunataŋ ta zanaktá ghwa katakata ta la Israʼila ya dzaʼa dzata lu ra? Kadzeŋkadzeŋ! Ta waɗa waɗa ŋni nda hga Yawe nda hafu mida, haɗ swidi ma ghəŋa ni dər turtuk dzaʼa dɗadata ta haɗik wu, kabga nda kata mnda Lazglafta magata tsi ta tsa slna baɗ tsaya, » ka həŋ. Ka katatá mnduha ta Yunataŋ, dza a lu wa.

⁴⁶ Ka kwalaghuta Sawulu da liŋtá la Filisti, ka vraghatá tsaha ya ta haɗika taŋ.

Ga mghama Sawulu

⁴⁷ Manda lama Sawulu da ga mgham ta ghəŋa la Israʼila ka dihavatá tsi, ka vulu tsi ta vulu nda inda ghumaha ni ta wanafta, i la Muwav, nda la Ghamuŋ, nda la Idum, nda mghamha la Tsuva, nda ya nda la Filisti. Inda təv ya ta mbəɗavata tsi ná, ta za za ta ghwa!

⁴⁸ Ka maraŋtá tsi ta mbrakwa ni, ka zatá tsi ta ghwa ta ghəŋa la Ghamalek, ka zluʼaptá tsi ta la Israʼila ma dzva gwal ta zləɗatá həŋ.

⁴⁹ Wya hga zwana Sawulu: I Yunataŋ, nda Yisvi, nda Malkiʼsuwa. Merav mali mataba kwagha ni his, Mihal sagəŋ.

⁵⁰ Hga markwa Sawulu ná, tsaya Ahinugham makwa Ahimaghats. Mali ta ghəŋa bakwa gwal vula ni guli ná, tsaya Avner, zwaŋa Ner, dasliʼiŋa Sawulu.

⁵¹ Kis, da ni ma Sawulu, Ner, da ni ma Avner. Hahəŋ zwana Aviʼel.

⁵² Ta inda fitika gay Sawulu ta mgham ná, ka vulu həŋ ta vulu nda kuzla nda kuzla nda la Filisti. Inda nghaŋta Sawulu ta mndu ya nda mbra ta laviŋtá vulu ya ná, ksafta ni ka famta mataba gwal vula ni.