1Sam 13 - Hdi

Vula la Israʼila nda la Filisti

¹ Hkən mbsak ima Sawulu ta zlraftá tsi ta ga mgham. His vakwa ni ta ga mgham ta ghəŋa la Israʼila.

² Ka zabaptá Sawulu ta sludziha dəmbuʼ hkən (3.000) mataba la Israʼila: Dəmbuʼ his (2.000) gwal ta nzata kawadaga nda Sawulu ma Mikmas, nda ya ta ghwá Betel. Dəmbuʼ (1.000) ya, kawadaga nda Yunataŋ, ma Givgha ma kwakwara Biŋyamiŋ. Pɗakwa sanlaha ma sludziha ya, ka vriŋtá tsi ta həŋ dzagha taŋ.

³ Ka zaɗanatá Yunataŋ ta vla bakwa gwal vula la Filisti si ma Gevagh. Ka snanaghatá tsi ta la Filisti. Ka ghwanaftá Sawulu ta mnduha ŋa vaya duli ta inda haɗik, ŋa snanamtá la Hebru ŋa sliʼagapta taŋ da vulu.

⁴ Ka snanaghatá tsi ta inda la Israʼila kazlay na zaɗana zaɗa Sawulu ta vla gwal vula la Filisti, ka tsawaɗanaftá tsi ta ŋuɗufa la Filisti, kəʼa. Ka lagha inda sludziha tskavata ta vata Sawulu ma Gilgal.

⁵ Ka tskaftá la Filisti guli ta vgha ŋa vulu nda la Israʼila: Dəmbuʼ hkən mbsak (30.000) mwata plisa taŋ, dəmbuʼ mkuʼ (6.000) gwal ta ŋla plis, nda ndəghata sludziha guli manda wutak ta wa drəf. Ka laf həŋ fatá ghuɓa taŋ ma Mikmas, nda təv safa fitik ma Betʼaveŋ.

⁶ Nghay la Israʼila ná, nda ratsa həŋ, ndusanava ndusa lu ta həŋ, ka laghu həŋ da ɗifa ma galighaha, nda mubukha, nda ya ta ghurumha, nda ya ma dzaŋha, nda ya ma gudzuvruŋha, nda ya ma vavrəmha.

⁷ Ka tsughwaɗaghatá sanlaha ma la Hebru ta Yardeŋ ŋa ɗifaghuta ma haɗika Gat, nda ya ma Gilghat. Sawulu ya, ta ma Gilgal tsatsi karaku, ka ghudzaku inda sludziha ni ta wanafta ta ghudzaku.

⁸ Ka kəzlaftá Sawulu ta fitik ndəfáŋ, manda fitik ya tsaf Samuyel, ama lagha a Samuyel da Gilgal wu, ka gazl mnduha ta vata Sawulu.

⁹ Ka Sawulu mantsa: « Klagaɗighawa skwa pla ghəŋ ŋa dray tsuh tsuh, nda skwa pla ghəŋa zɗaku, » kaʼa. Ka vlatá tsi ta skwa pla ghəŋ ŋa dray tsuh tsuh.

¹⁰ Nda kɗakwa ni ta vlatá tsa skwa pla ghəŋ ŋa dray tsuh tsuh ya, nda sagha Samuyel. Ka sab Sawulu da guyay ŋa tsuʼafta.

¹¹ Ka Samuyel mantsa: « Nahgani na maga ka na? » kaʼa. Ka Sawulu mantsa: « Manda nghay ɗa ta gazla mnduha ka zlaɗivata, kagha guli sagha a nda fitik ni wu, tskava tska la Filisti guli ma Mikmas,

¹² ka yu mantsa: “Ndanana, dzaʼa sa sa la Filisti laɗista ma Gilgal, ta kul ndəɓanatá yu ta dzvu da Yawe,” ka yu. Mantsa tama, ka draftá yu ta ŋuɗuf, ka vlatá skwa pla ghəŋ ŋa dray tsuh tsuh, » kaʼa.

¹³ Ka Samuyel nda Sawulu mantsa: « Manda təkda ndanata ka ta ndanu! Sna a ka ta zlaha Yawe, Lazglafta gha ta mnaghafta wa. Ka má maga maga ka, má dzaʼa vla vla Yawe ta tvi ŋa gay la ga ghuni ta mgham ŋa ɗekɗek ta ghəŋa la Israʼila.

¹⁴ Ama ndanana, haɗ ga mghama gha dzaʼa gɗavata wu. Zbaf zba Yawe ta mndu taɓta ya ta kum ŋuɗufa ni, ka fatá tsi ŋa nzakway ka mali ta ghəŋa mnduha ni. Dzaʼa magaku mantsa, kabga maga a ka ta skwi mnaghaf Yawe wu, » kaʼa.

¹⁵ Ka sliʼaftá Samuyel ma Gilgal ka ŋlaghata da Givgha ta kwakwara la Biŋyamiŋ. Ka mbəɗaftá Sawulu ta sludziha kawadaga nda tsi: Ta magay həŋ ta mkuʼ dərmək (600).

¹⁶ Ka nzatá i Sawulu, nda zwaŋa ni Yunataŋ, nda sludziha kawadaga nda tsi ma Gevagh ta kwakwara la Biŋyamiŋ, ta fatá la Filisti ta ghuɓa taŋ ma Mikmas.

¹⁷ Ma sana fitik, ka sab sana ghuɓu ma ghuɓa la Filisti, gwal ɓadza vli. Ka dgavaptá həŋ ka zlərma hkən. Ka laghu taŋtaŋa zlərma nda təv Ufra, ma kwakwara Sughal,

¹⁸ ta laghu mahisa zlərma nda təv Betʼhuruŋ, ta laghu mahkəna zlərma nda ta tvi ta mukuma ta nzədanaghatá didiŋa Pakaʼu ghuvi ta wa mtak.

¹⁹ Ma tsa fitik ya, haɗ ɗəghata slru ma inda haɗika la Israʼila wu, kabga ka la Filisti na: « Pyafma pya ta la Hebru yaha həŋ da slargəltá kafay nda gupa, » ka həŋ.

²⁰ Inda la Israʼila ná, ta la da la Filisti həŋ da tala pitsakwa sla taŋ, nda pitsakwha taŋ, nda kaləkha taŋ, nda slpaɗaha taŋ, nda vuɗuha taŋ.

²¹ Ŋa tala pitsakwa slaha taŋ, nda pitsakwha taŋ ná, his ma dgatá sulay hkən ta plata həŋ. Mantsa ya guli, ka dzaʼa talay həŋ ta dundursa, nda kalək, nda madzakara, nda slpaɗa, ka kfura ghəzla sla a tsi ná, turtuk ma dgatá sulay hkən ta plata həŋ.

²² Mantsa tama, ma sana fitik ta vulu, haɗ kafay nda gupa, da sludziha kawadaga nda i Sawulu nda Yunataŋ wa. Ta ghəŋa i Sawulu nda zwaŋa ni Yunataŋ yeya nda tsi.

²³ Ka sab sana bakwa sludza la Filisti da nzata ma zlərɗa vli ma Mikmas.