1Sam 11 - Hdi

Zata Sawulu ta ghwa ta ghəŋa la Ghamuŋ

¹ Tahula tsa, ka lagha Nahas mghama la Ghamuŋ fatá ghuɓa ni ma luwa Yaves ma Gilghat ka ŋamta nda vulu. Ka inda la Yaves ma Gilghat nda tsi mantsa: « Dzraf dzra ta wi nda aŋni, dzaʼa magay ŋni ta slna ŋa gha, » ka həŋ.

² Ka tsa Nahas ya nda həŋ mantsa: « Ta tsuʼay yu ta dzraftá wi nda kaghuni ta ghəŋa skwi turtuk: Nda ma paslanapta ɗa ta ira zeghwa inda kaghuni. Mantsa ya dzaʼa pghanaghata yu ta hula ta inda la Israʼila, » kaʼa.

³ Ka galata mnduha mataba la Yaves nda tsi mantsa: « Zlaŋnaŋ zla ta fitik ndəfáŋ ka ghwanafta ŋni ta gwal ghunay ta inda kwakwara la Israʼila. Ka haɗ mndu dzaʼa kataŋnafta wu katsi, dzaʼa sliʼagap sliʼa ŋni, ka vlata ghəŋa ŋni ŋa gha, » ka həŋ.

⁴ Ka ɓhadaghatá tsa gwal ghunay ya da Givgha, luwa Sawulu. Ka kladaghatá həŋ ta tsa gwaɗa ya snanamtá inda mnduha. Ka hlaftá mnduha ta wi, ka wahu.

⁵ Ma tsa fitik ya vrakta Sawulu ma vwah mista slaha ni, kaʼa mantsa: « Nahgani ya ta wahu mnduha na? » kaʼa. Ka rusanaftá lu ta skwi mna la Yaves.

⁶ Na gi snaŋta Sawulu ta tsa gwaɗaha ya, ka saha Sulkuma Lazglafta suw ta ghəŋa ni, ka gufaftá ŋuɗufa ni katakata.

⁷ Ka hlaftá tsi ta slaha his, ka ɗatsanapta, ka tsaghaftá tsi nda ma dzva tsa gwal ghunay ya ta inda kwakwara la Israʼila nda mnay kazlay na: « Inda mndu dzaʼa kwal kul sliʼafta da vulu mista i Sawulu nda Samuyel ná, mantsa ya dzaʼa ɗatsanapta lu ta slaha ni, » kaʼa. Ka hlutá zləŋa Yawe ta mnduha, ka laghu həŋ manda mndu turtuk.

⁸ Ka tskanatá Sawulu ta həŋ ma Bezek, ka mbəɗaftá tsi ta həŋ: Dəmbuʼ hkən dərmək (300.000) la Israʼila nda təv mazlay, dəmbuʼ hkən mbsak (30.000) ma mndəra gwal nda təv la Yahuda.

⁹ Ka həŋ nda tsa gwal ghunay si ta lagha ya mantsa: « Wya ka kuni dzaʼazlay nda la Yaves ma Gilghat: Mahtsim ɗək fitik ma ghəŋ, dzaʼa mbaku kuni, » ka həŋ. Ka klaghatá tsa gwal ghunay ya ta tsa gwaɗa ya ŋa la Yaves. Ka rfu həŋ ta rfu.

¹⁰ Ka la Yaves nda la Amuru mantsa: « Mahtsim, dzaʼa sliʼadap sliʼa ŋni da kaghuni, ka maga kuni ta skwi ya kumaŋ kuni nda aŋni, » ka həŋ.

¹¹ Ga mahtsima ni, ka dagaptá Sawulu ta mnduha ka zlərma hkən. Ka sliʼamtá həŋ da ghuɓa ghumaha taŋ ma kɗaku vli tsaɗaku. Ka pslə həŋ ta la Ghamuŋ ha ka lafa fitik da ghəŋ. Ka siskata gwal ta ndiri ta vgha, haɗ mndu ta nzata ka guyavata his wa.

¹² Ka mnduha nda Samuyel mantsa: « Ga tsa mnduha si ta kwalaghuta nghaŋtá Sawulu ta ga mgham ta ghəŋa taŋ ya kay na? Hləgaŋnaghawa həŋ ka pslata ŋni ta həŋ, » ka həŋ.

¹³ Ama ka Sawulu mantsa: « Haɗ mndu dzaʼa lu da dzata ma mndərga na fitik na wu, kabga gita zanata Yawe ta ghwa ta la Israʼila, » kaʼa.

¹⁴ Ka Samuyel nda mnduha mantsa: « Saghawa sa, mbaɗma da Gilgal ŋa grafta mu hada kazlay Sawulu mghama mu kəʼa, » ka həŋ.

¹⁵ Ka sliʼaghatá inda mndu da Gilgal, ka famtá Sawulu ka mgham ta kəma Yawe, ma Gilgal. Ka vlatá həŋ ta pla ghəŋa zɗaku ta kəma Yawe. Ka rfu Sawulu kawadaga nda inda la Israʼila ta rfu katakata.