1Sam 1 - Hdi

Kəɓata nzakw ma həga ga Ilkana

¹ Mamu sana mnda la Tsuf ma Rama ta ghwá la Ifrayim, Ilkana hga ni, zwaŋa Yəruham, zigha Ilihu, zigha ndindliŋa Tuhu, zigha papaha Tsuf. Mnda la Ifrata ya.

² His miʼa ni: Hana hga sani, Penina hga mahisa ni. Mamu zwana Penina, ama haɗ ŋa Hana wa.

³ Inda vaku tsa mndu ya ta sliʼafta ma luwa ni, ka ŋlu da Silu da tsəlɓu ta kəma Yawe mghama gwal vulu, nda ya da planatá ghəŋ. Ma tsa fitik ya, zwana Iliya, i Hufni nda Pinhas, gwal dra skwi ŋa Lazglafta hada.

⁴ Sagha fitika vlay Ilkana ta pla ghəŋ ya, ta snu sna ta vla mayakha ŋa markwa taŋ Penina nda inda zwana ni nda kwagha ni.

⁵ Ama ŋa Hana ya, mayak his ta hlanafta tsi, kabga ɗvu ɗva ta Hana, aŋ mndani tsíŋ tsa Yawe ka dzəghəŋ.

⁶ Mbaɗa waɗa ni ka va zlurgway ŋa ŋranaftá ŋuɗuf, kabga vəl níŋta Yawe ka dzəghəŋ.

⁷ Inda vaku ta dzaʼa Hana da həga Yawe ya ná, gi zlurgway ni manda va tsaya, ha ka taway Hana ta taw, ka zlanavatá za skwa zay.

⁸ Ka zəʼala taŋ Ilkana nda tsi mantsa: « Hana, kabgawu ta kəl ka ka taw, ka zlanatá za skwa zay na? Kabgawu ta kəl ka ka ɓasa ŋuɗuf na? Malaghu a yu ma kagha ta zwani ghwaŋ wu ra? » kaʼa.

⁹ Ta sana vaku, tahula zuta taŋ ta skwa zay nda skwa say ma Silu, ka sliʼaftá Hana. Ta nzakw Iliya mnda dra skwi ŋa Lazglafta ta dughuruk ta wa tgha həga Yawe.

¹⁰ Ɗahuɗaha ŋuɗufa Hana katakata, ka mag tsi ta duʼa da Yawe nda taw nda taw ka ŋəɗa ŋəɗa.

¹¹ Ka fatá tsi ta waɗu. Kaʼa mantsa: « Ari Yawe mghama gwal vulu, ka nghaga ngha ka ka ghuya ɗaŋwa kurɗa gha, ka havap hava ka ka iʼi, ka zanap a ka ta kurɗa gha wu, ka vlaŋtá ka ta kurɗa gha ta zwaŋa zgun katsi ná, dzaʼa vlaŋ vla yu ta Yawe ha kɗavakta hafa ni. Haɗ paka dzaʼa lafi ta ghəŋa ni wu, » kaʼa.

¹² Ma tsa nzəɗavata ni ta maga tsa duʼa ya ta kəma Yawe, ta vitsay vitsay Iliya ta wubisima ni.

¹³ Ta gwaɗa Hana ma ŋuɗufa ni, wubisima ni yeya ta gigɗaku. Snava a lwa ni wa. Marakw nda ghuya ya, ka Iliya klafta.

¹⁴ Ka Iliya nda tsi mantsa: « Ha ŋa yawu dzaʼa gɗata ka ma ghuyaku na? La da lɓanatá ghuyakwa gha ma sana vli! » kaʼa.

¹⁵ Ka Hana zlghaftá wa ni mantsa: « Rvera ɗa, mantsa a wu, marakw nda gurɗa ŋuɗufa ni yu, ima inabi a su yu, ka dər skwi ta ghuya mndu wu, pgha ŋuɗufa ɗa ya ta pghə yu ta kəma Yawe.

¹⁶ Ma nghə ka ta kurɗa gha manda ghwaɗaka marakw. Ghuyatá ghəŋa ɗa, nda skwi ta ŋuɗufa ɗa kəl yu ka nzəɗavata dagala ta gwaɗa, » kaʼa.

¹⁷ Ka Iliya nda tsi mantsa: « La nda vgha ta zɗakwa gha makwa ɗa, má ka tsuʼaghaf tsuʼa Lazglafta la Israʼila ta skwi ɗawaŋ ka da tsi! » kaʼa.

¹⁸ Kaʼa mantsa: « Má ka mutsaf mutsa kurɗa gha ta zɗakatahuɗi ta wa ira gha! » kaʼa. Ka laghu tsa marakw ya, ka zutá tsi ta skwa zay, ta nda suʼanakata kuma a wa.

Yatá Samuyel

¹⁹ Ga mahtsima ni, ka tsavaftá Ilkana nda la ga taŋ wrək sərɗək, ka tsəlɓata ta kəma Yawe. Tahula tsa, ka vraghutá həŋ dzagha taŋ ma Rama. Ka lam Ilkana da markwa taŋ Hana, ka havaptá Yawe ka tsa marakw ya.

²⁰ Ma tsa vaku ya, ka zlghaftá Hana ta huɗi, ka yatá tsi ta zwaŋa zgun. Ka tsanaftá tsi ta hgu ka Samuyel, manda mnay kazlay: « Da Yawe ɗawafta yu, » kəʼa.

²¹ Tahula tsa, ka laf Ilkana nda inda gwal ga taŋ tani da pla ghəŋ ma vaku ŋa Yawe, nda ya ŋa hɗamtá skwi ya waɗa tsi.

²² Ama laf a Hana wu, kaʼa nda zəʼala taŋ na: « Tsata ɗa ta zwaŋ ta uʼa ya ná, dzaʼa kladaf kla yu maraŋta ta kəma Yawe, ŋa nzata ni hada ŋa ɗekɗek, » kaʼa.

²³ Ka zəʼala taŋ Ilkana nda tsi mantsa: « Maga ta skwi ya nghadap ka ɗina. Kəzlaf kəzla ta tsiŋta gha ta zwaŋ ta uʼa. Má hɗamta Yawe yeya katsi ta gwaɗa ni! » kaʼa. Ka nzatá tsa marakw ya tama hada, ka sa uʼa ŋa zwaŋa ni ha ka sagha fitika tsiŋta ni ta zwaŋ ta uʼa.

²⁴ Manda tsiŋta ni ta zwaŋ ta uʼa, ka kladanaftá tsi mista ni da Silu. Ka klaftá tsi ta lghəŋ hkən viŋa ni, nda tsəɗatá hpu ka kiluʼ hisambsak, nda hulama ima inabi. Ka kladaghatá tsi ta tsa zwaŋ ya da həga Yawe ma Silu dər ma ta kiʼa tsi.

²⁵ Ka ghwanaftá həŋ ta tsa lghəŋ ya ŋa pla ghəŋ, ka kladaghatá həŋ ta tsa zwaŋ ya da Iliya.

²⁶ Ka Hana mantsa: « Rvera ɗa, wya dzvu! Ta waɗa gha waɗa yu, iʼi tsa marakw si ta sladu ta vata kagha hadna, ka maga duʼa da Yawe ya kay ya.

²⁷ Ŋa mutsa na zwaŋ na maga yu ta tsa duʼa ya, ka tsuʼaɗiftá Yawe ta skwi ɗawaŋ yu da tsi.

²⁸ Iʼi guli ná, ta vlaŋ vla yu ta Yawe, ŋa nzakwa ni ŋa Yawe ha kɗavakta hafa ni, » kaʼa. Ka tsəlɓatá həŋ hada ta kəma Yawe.