1Rus 9 - Hdi

Mnduha ta vragaghuta ma Babila da Ursalima

¹ Ka mbəɗaftá lu ta inda mbsaka la Israʼila, ka vivindamta ma ɗelewera mghamha la Israʼila. Hlagha hla lu ta la Yuda da Babila, dabga ganata taŋ ta dmaku ta Yawe.

² Taŋtaŋa mnduha ta vrəgladaghata ta haɗika za həga taŋ, ma luwaha taŋ ná, tsaha ya la Israʼila, nda gwal dra skwi ŋa Lazglafta, nda la Levi, nda kwalvaha həga Lazglafta.

³ Wya la Yuda, nda la Biŋyamiŋ, nda la Ifrayim, nda la Mənase ta nzata ma Ursalima:

⁴ Ma mndəra la Yuda na: Mamu Ghutay, zwaŋa Ghamihut, zigha Ghumri, zigha ndindliŋa Imri, la Bani mataba la ta uʼa Perets.

⁵ Mataba la Silu ta uʼa taŋ: Ghasaya ta nzakway ka zumali, nda zwana ni.

⁶ Mataba la Zerah ta uʼa taŋ na: I Yəghuʼel nda zwana ma taŋ, mkuʼ dərmək nda təmbay mbsak (690) həŋ.

⁷ Ma mndəra la Biŋyamiŋ na: Mamu Salu, zwaŋa Məsulam, zigha Hudavya, zigha ndindliŋa Hasənuʼa,

⁸ nda Yivnəya, zwaŋa Yəruham, nda Ila, zwaŋa Ghuzi, zigha Mihri, nda Məsulam, zwaŋa Səfatya, zigha Rəghuʼel, zigha ndindliŋa Yivniya,

⁹ nda zwana ma taŋ taɓta mndəra taŋ: Təmbay dərmək nda hutaf mbsak mkuʼ mida (956) mndəra la Biŋyamiŋ ta nzata ma Ursalima. Inda tsa mnduha mbəɗaga lu ya ná, mala ga həgaha həŋ ta uʼa taŋ ta uʼa taŋ.

¹⁰ Mataba gwal dra skwi ŋa Lazglafta na: I Yədaghiya, nda Yəhuyariv, nda Yahiŋ,

¹¹ nda Ghazariya, zwaŋa Hilkiya, zwaŋa Məsulam, zwaŋa Tsaduk, zwaŋa Mərayut, zwaŋa Ahituv, ta nzakway ka mali ta ghəŋa həga Lazglafta,

¹² nda Ghadaya, zwaŋa Yəruham, zwaŋa Pashur, zwaŋa Malkiya, nda Maghsay, zwaŋa Ghadiʼel, zwaŋa Yahzera, zwaŋa Məsulam, zwaŋa Mesilemit, zwaŋa Imer,

¹³ nda zwana ma taŋ, nda mala ga həgaha ta klafta mnduha nda sgit ta həŋ, dəmbuʼ nda ndəfáŋ dərmək nda mkuʼ mbsak (1.760), ta maga slna ma həga Lazglafta.

¹⁴ Mataba la Levi na: Mamu Səmaghya zwaŋa Hasuv, zwaŋa Ghazrikam, zwaŋa Hasavya, ta nzakway ka zivira Mərari,

¹⁵ nda Bakbakar, nda Heres, nda Galal, nda Mataniya zwaŋa Mihaʼ, zwaŋa Zihri, zwaŋa Asaf,

¹⁶ nda Ghuvadiya zwaŋa Səmaghya, zwaŋa Galal, zwaŋa Yədutuŋ, nda Berehiya zwaŋa Asaʼ, zwaŋa Ilkana ta nzakw ma zwana luwaha la Nətufa ya.

¹⁷ Gwal ta ngha wa tgha na: I Salum, nda Ghakuv, nda Talmuŋ, nda Ahimaŋ, nda zwana ma taŋ. Salum mala taŋ.

¹⁸ Ha ndana zivira taŋ ta ngha wa tgha ga mgham, nda təv safa fitik. Dzidzíha taŋ si ta ngha wa tgha ghuɓa la Levi.

¹⁹ Salum, zwaŋa Kureʼ, zigha Ivyasaf, zigha ndindliŋa Kurah, nda sanlaha ma la Kurah, ŋa taŋ slna ngha wa tgha tva lami da tumpula guyaku, manda ŋa dzidzíha taŋ si ta ngha ka tva lami da ghuɓa Yawe ya,

²⁰ nda Pinhas, zwaŋa Ilghazar si mala taŋ ghalya. Si kawadaga Yawe nda tsi.

²¹ Zakari zwaŋa Məselemiya, si mnda ngha wa tgha tva lami da tumpula guyaku.

²² His dərmək nda ghwaŋpəɗ his (212) mbsaka inda tsa gwal si zabap lu ŋa ngha wa tgha tva lami ya. Ka vivindaf lu ta həŋ taɓta mbəɗa mndəra mnduha ma zwana luwaha taŋ. I Dawuda nda Samuyel ka slayaŋ ta pghamtá həŋ ma slna taŋ ŋa magay taŋ nda fatá ghəŋ ta həŋ.

²³ Hahəŋ nda zivira taŋ gwal ngha wa tgha həga Yawe, tsaya həga tumpula guyaku.

²⁴ Ta slərpuha fwaɗ ta nza nzata tsa gwal ngha wa tgha ya: Nda təv safa fitik ya, nda təv dɗakwa fitik ya, nda təv mazlay ya, nda təv maghura ya.

²⁵ Ta sagha sa sanlaha ma zwana ma taŋ ma zwana luwaha taŋ tazlay da zlghaŋtá həŋ ka fitik ndəfáŋ.

²⁶ Ama tsa maliha fwaɗ mataba gwal ta ngha wa tgha, la Levi ya ná, ta nza nza həŋ tasl hada, hahəŋ ta ngha dzuguviha, nda dzuguviha ɗifa skwa gadghəl ma həga Lazglafta.

²⁷ Ta han nda hana həŋ ta vata həga Lazglafta ta nghay, kabga hahəŋ ta nghay, ka gwaniŋta taŋ ta tghaha inda sərɗək.

²⁸ Sanlaha mataba taŋ ta ngha huzla maga slna, ta mbəɗaf mbəɗa həŋ ta hladamta həŋ nda ya ta hlagapta həŋ.

²⁹ Sanlaha guli ta ngha pɗakwa huzla, nda huzla vli nda ghuɓa, nda hpu kəzlitit, nda ima inabi, nda rɗi, nda urdi ŋa dray nda dra, nda hamata urdi.

³⁰ Ama sanlaha ka midala ma gwal dra skwi ŋa Lazglafta ta laɓa tsa urdiha ya.

³¹ Mataba la Levi ná, Matitiya, zumala Salum mnda la Kurah mali ta fatá ghəŋ tasl ŋa da gatu.

³² Sanlaha ma la Levi mataba la Kehat ná, da buradi ka pghata ta kəma Yawe inda Sabat ŋa taŋ.

³³ Gwal fa laha, mala ga həgaha mataba la Levi ná, ma ŋa taŋ dzuguviha hahəŋ. Vla a lu ta sana slna ŋa taŋ wu, kabga nda vaghu tani, nda rviɗik tani həŋ ta maga slna.

³⁴ Hahəŋ mala ga həgaha la Levi, mala ga həgaha taɓta saba mndəra taŋ. Si ta nzakw ma Ursalima həŋ.

La Sawulu

³⁵ Yəghiʼel ta thaftá Givghuŋ, ka nzatá tsi ma luwa Givghuŋ. Maghaha hga markwa taŋ,

³⁶ Ghavduŋ hga zumala ni, ka fiŋtá Tsur, nda Kis, nda Baghal, nda Ner, nda Nadav,

³⁷ nda Gədur, nda Ahyu, nda Zakari, nda Miklut.

³⁸ Miklut ta yatá Simʼam. Ka nzatá hahəŋ guli ndusa nda zwana ma taŋ ma Ursalima.

³⁹ Ner ta yatá Kis, Kis ta yatá Sawulu, Sawulu ta yayatá i Yunataŋ, nda Malkiʼsuwa, nda Avinadav, nda Isbaghal.

⁴⁰ Zwaŋa Yunataŋ na: Mərivʼbaghal ya. Mərivʼbaghal ta yatá Mika.

⁴¹ Zwana Mika na: I Pituŋ, nda Melek, nda Tahreyagh həŋ.

⁴² Ahaz ta yatá Yaghra, Yaghra ta yayatá i Ghalemet, nda Ghazmavet, nda Zimri. Zimri ta yatá Mutsaʼ,

⁴³ Mutsaʼ ta yatá Biŋghaʼ, Biŋghaʼ ta yatá Rfaya, Rfaya ta yatá Ilghasa, Ilghasa ta yatá Atsel.

⁴⁴ Ka yayatá Atsel ta zwani mkuʼ, wya hga taŋ: I Ghazrikam, nda Buhru, nda Yismaghel, nda Səghariya, nda Ghuvadiya, nda Hanaŋ həŋ. Tsaha ya zwana Atsel.