1Rus 24 - Hdi

Bakwa gwal dra skwi ŋa Lazglafta nda slna taŋ

¹ Wya dagata zivira Haruna ka baku ka baku: Zwana Haruna na: I Nadav, nda Avihuʼ, nda Ilghazar, nda Itamar həŋ.

² Ka rwutá i Nadav nda Avihuʼ ka tiŋlaghuta da taŋ, yaya a həŋ ta zwani wa. Ka vlaŋtá lu ta slna dra skwi ŋa Lazglafta ta i Ilghazar nda Itamar.

³ Tahula tsa, ka dagaptá i Dawuda kawadaga nda Tsaduk ma mndəra la Ilghazar, nda Ahimelek ma mndəra la Itamar ta zivira Haruna ka baku ka baku, taɓta slna taŋ ta mag həŋ.

⁴ Kəʼa ka lu ná, malaghu mala ndəghatá maliha mataba mndəra la Ilghazar ka ya ma mndəra la Itamar. Mantsa tama, ka dagəglanaptá lu ta həŋ. Ma mndəra la Ilghazar, ghwaŋpəɗ mkuʼ mala ga həgaha. Ma mndəra la Itamar guli, tghas mala ga həgaha.

⁵ Ka dagaptá lu ta həŋ nda vindima, kabga mamu maliha ta maga slna ma vli nda ghuɓa, nda gwal ta maga slna ŋa Lazglafta guli mataba mndəra la Ilghazar, nda ya mataba mndəra la Itamar.

⁶ Ka vindaftá Səmaghya zwaŋa Netaŋʼel, mnda vindi mataba la Levi ta həŋ ta kəma mgham, nda maliha, nda Tsaduk mnda dra skwi ŋa Lazglafta, nda Ahimelek, zwaŋa Aviyatar, nda mala ga həgaha gwal dra skwi ŋa Lazglafta, nda la Levi. Ta zbap zba lu ta həga turtuk mataba la Ilghazar, turtuk mataba la Itamar.

⁷ Wya hga maliha zabap lu nda vindima: Taŋtaŋa ni Yəhuyariv, mahisa ni Yədaghiya,

⁸ mahkəna ni Harim, mafwaɗa ni Səghurim,

⁹ mahutafa ni Malkiya, mamkuʼa ni Miyamiŋ,

¹⁰ mandəfáŋa ni Hakuts, matghasa ni Aviya,

¹¹ matəmbaya ni Yəhusuwa, maghwaŋa ni Səkaŋyahu,

¹² maghwaŋpəɗ ndeŋa ni Ilyasiv, maghwaŋpəɗ hisa ni Yakim,

¹³ maghwaŋpəɗ hkəna ni Hupa, maghwaŋpəɗ fwaɗa ni Yesevʼav,

¹⁴ maghwaŋpəɗ hutafa ni Bilga, maghwaŋpəɗ mkuʼa ni Imer,

¹⁵ maghwaŋpəɗ ndəfáŋa ni Hezir, maghwaŋpəɗ tghasa ni Hapitsets,

¹⁶ maghwaŋpəɗ təmbaya ni Pətahya, mahisambsaka ni Yəhezkeʼel,

¹⁷ mahisambsak ndeŋ mida ni Yahiŋ, mahisambsak his mida ni Gamul,

¹⁸ mahisambsak hkən mida ni Dəlayahu, mahisambsak fwaɗ mida ni Maghazyahu.

¹⁹ Tsaya dagatá vgha taŋ ma slna taŋ, ŋa lami da həga Yawe, taɓta tva skwi ŋa magay ya vla dzidza taŋ Haruna, manda va ya mnanaf Yawe, Lazglafta la Israʼila ya.

Sanlaha ma zivira la Levi

²⁰ Wya sanlaha zivira la Levi ta uʼa taŋ: Ma la Ghamram, Suvaʼel. Ma la Suvaʼel, Yehdəyahu.

²¹ Ma la Rəhavya, Yisiya mala ga həga.

²² Ma la Yitshar, Səlumut. Ma la Səlumut, Yahat.

²³ Ma la Hevruŋ, Yəriya taŋtaŋ ni, Amarya mahis, Yahaziʼel mahkən, Yəkamgham mafwaɗ.

²⁴ Ma la Ghuziʼel, Mika. Ma la Mika, Samir.

²⁵ Zwaŋama ni ma Mika, Yisiya. Ma la Yisiya, Zakari.

²⁶ Zwana Mərari, i Mahli nda Musi. Ma la Yaghaziyahu, Benu.

²⁷ Zwana Mərari ta sabi ma Yaghaziyahu, i Benu, nda Suham, nda Zakur, nda Ghivri.

²⁸ Ma la Mahli, Ilghazar kul mutsaftá zwaŋa zgun ya.

²⁹ Ma la Kis, Yərahmeʼel.

³⁰ Zwana Musi, i Mahli, nda Gheder, nda Yəremut. Tsaha ya zwana la Levi ta uʼa taŋ ta uʼa taŋ.

³¹ Ka vzaftá hahəŋ guli ta vindima manda ŋa zwana ma taŋ, zivira Haruna, ta kəma i mgham Dawuda nda Tsaduk, nda Ahimelek, nda mala ga həgaha gwal dra skwi ŋa Lazglafta, nda ŋa la Levi. Ka vzatá mala ga həgaha guli manda ŋa sagəŋa ni gudzekw ya.