1Rus 21 - Hdi

Mbəɗay Dawuda ta mbsaka mnduha

¹ Ma sana fitik, ka zbə Halaway ta maganatá ghwaɗaka skwi ta la Israʼila. Ka tiŋwaftá tsi ta Dawuda ŋa mbəɗaftá mbsaka la Israʼila.

² Ka Dawuda nda Yuʼav nda ya nda maliha ta ghəŋa mnduha mantsa: « Lawa la, ka mbəɗafta kuni ta mbsaka la Israʼila daga ma Daŋ ha da Bəʼerseva, ka mnihata kuni, ka snaŋta yu ta mbsaka taŋ, » kaʼa.

³ Ka Yuʼav tama mantsa: « Má ka sganagha sga Yawe ta mnduha ni dərmək dərmək (100) mghama ɗa, rvera ɗa! kwalvaha gha a həŋ demdem wu ra? Ama kabgawu ta ndana ka ta snaŋtá mbsaka taŋ na? Kabgawu dzaʼa kəl ka ka klanaktá la Israʼila ta skwi ŋa gatá dmaku na? » kaʼa.

⁴ Ama ka ndiʼatá mgham ka ŋɗaŋɗa ta ghəŋa skwi mnaf tsi. Ka sliʼaftá Yuʼav, ka ksaftá tvi ka ra inda la Israʼila. Ka vraghutá tsi da Ursalima.

⁵ Ka vlaŋtá Yuʼav ta Dawuda ta mbsaka mbəɗatá mnduha. Inda la Israʼila mbəɗaf lu ná, məleŋwi turtuk nda dəmbuʼ dərmək (1.100.000) mnduha viɗviɗ prək ka vulu. Da la Yuda guli, dəmbuʼ fwaɗ dərmək nda ndəfáŋ mbsak (470.000) mnduha viɗviɗ prək ka vulu.

⁶ Mbəɗaf a həŋ mataba taŋ ta i la Levi nda la Biŋyamiŋ wu, kabga zɗəgana a tsa gwaɗa mgham ya ɗekɗek ta Yuʼav wa.

⁷ Zɗəgana a tsa skwi ya ta Lazglafta wu, ka tsanaghatá tsi ta guma ta la Israʼila.

⁸ Ka Dawuda nda Lazglafta mantsa: « Dmaku dagala ya ga yu ma magata ɗa ta tsa skwi ya! Ndanana, kdəkkdək pliha pla ta dmakwa ɗa ya maga yu, iʼi kwalva gha, kabga ma ga təkda magata yu! » kaʼa.

⁹ Ka gwaɗganatá Yawe ta Gat, slayaŋa Dawuda, kaʼa mantsa:

¹⁰ « La da mnanatá Dawuda: “Wya ka Yawe: Hkən skwiha ta pghaghata yu. Zbaʼa zba ta ya turtuk mataba taŋ, nda tsi dzaʼa dzughusta yu,” » kaʼa.

¹¹ Ka lagha Gat da slanaghatá Dawuda, kaʼa nda tsi mantsa: « Ka Yawe na: “Wya skwiha ŋa zbaʼata gha ta ya turtuk mataba taŋ:

¹² Vaku hkən nda maya re, ari tili hkən ta hwaya da ghuma mista gha nda kafay re, ari fitik hkən nda kafaya Yawe, nda zləmnda ta haɗik, nda duhwala Yawe ŋa zaɗa vli ma inda kwakwara la Israʼila a na?” Ndanap ndana ka nghadapta ka ta skwi dzaʼa yu zləghanaftá wi ta mndu ya ta ghuniɗikta, » kaʼa.

¹³ Ka Dawuda nda Gat mantsa: « Nda kəɓa yu katakata. Kay, ta dər zləmbamta ɗa ma dzva Yawe, kabga dagala tawa hiɗahiɗa da tsi. Ama yaha yu zləmbamta ma dzva mnduha, » kaʼa.

¹⁴ Mantsa tama, ka ghunədanaghatá Yawe ta zləmnda ta la Israʼila, ka rwutá mnduha dəmbuʼ ndəfáŋ mbsak (70.000) ma Israʼila.

¹⁵ Ka ghunaftá Lazglafta ta duhwala ni da Ursalima ŋa zaɗanata. Ta nghə Yawe ná, ta zaɗay zaɗay, ka hag tsi ta madər ta ghəŋa tsa zləmnda ya. Kaʼa nda tsa duhwala ni ta zaɗa vli ya mantsa: « Prək tsa! Klaghu kla ta dzva gha tama! » kaʼa. Tsaw ndusa nda blikwa Urnaŋ, mnda la Yəbus, ta sladu tsa duhwala Yawe ya.

¹⁶ Kəʼa ka Dawuda klaŋtá ghəŋ ná, ka nghaŋtá tsi ta duhwala Yawe ta sladu ma takataka haɗik nda luwa, nda tsəhatá kafay, tɗanagha tsi ta dzvu ta ghəŋa Ursalima. Ka pghavatá i Dawuda nda la galata mndu ta buhu ta vgha, ka zlambatá həŋ zluzlumbruh ta haɗik.

¹⁷ Ka Dawuda nda Lazglafta mantsa: « Iʼi a ta mnay kazlay mbəɗaftá mnduha kəʼa wu ra? Iʼi ta gatá dmaku, iʼi turtukwa ɗa ta guvtá krughuvi. Mnda ngha tuwak ta guvtá krughuvi, ama nana bra tuwakha na, nahgani maga həŋ? Yawe, Lazglafta ɗa, ta iʼi nda la ga ini fafta ka ta dzvu, kdəkkdək, ma zlana ka ta na zləmnda na ta ghəŋa mnduha gha! » kaʼa.

Dzihwanafta Dawuda ta gwir ta Yawe

¹⁸ Ka mnanatá duhwala Yawe ta Gat ŋa gwaɗganatá Dawuda, ŋa ŋladafta Dawuda da dzihwanaftá gwir ta Yawe ta blikwa Urnaŋ mnda la Yəbus.

¹⁹ Ka laf Dawuda, taɓta gwaɗa ya mnana Gat nda hga Yawe.

²⁰ Ta ɗga alkama Urnaŋ, ka mbəɗavatá tsi, ka nghaŋtá tsi ta duhwala Lazglafta. Mamu zwana ni fwaɗ kawadaga nda tsi, ka ɗiɗifaghutá həŋ.

²¹ Ka lagha Dawuda da Urnaŋ, ka klaŋtá Urnaŋ ta ghəŋ, ka nghaŋtá tsi ta Dawuda, ka sab tsi ma blikwi, ka tsəlɓatá tsi, ka dzadatá kuma ta haɗik ta kəma Dawuda,

²² Ka Dawuda nda Urnaŋ mantsa: « Skwaɗip skwa ta vla na blikwi na, ka banafta yu ta gwir ta Yawe, kada hlata na zləmnda ta dɗanaghatá mnduha na. Skwaɗip skwa dər kidaghi tseda ni, » kaʼa.

²³ Ka Urnaŋ nda Dawuda mantsa: « Kla rvera ɗa, maga manda ya ta zɗəgaghata! Ta vla vla yu guli ta slaha ŋa pla ghəŋ ŋa dray tsuh tsuh, mbəlaʼuwha ya ná, ŋa hasuʼu, alkama ya guli ná, ŋa mbəha nimaya, vla vla yu demdem, » kaʼa.

²⁴ Ama ka mgham Dawuda nda Urnaŋ mantsa: « Mantsa a wu! Dzaʼa skway yu dər kidaghi tseda ni. Haɗ yu dzaʼa klay ŋa Yawe ta skwa gha, ka vlatá mbəhu ka skwa pla ghəŋ ŋa dray tsuh tsuh a tsi ta skwi kul skwatá yu nda skwa wu! » kaʼa.

²⁵ Mantsa tama, ka vlaŋtá Dawuda ta Urnaŋ ta sulaya dasu mkuʼ dərmək (600) ŋa skwa tsa vla blikwi ya.

²⁶ Ka dzihwaftá Dawuda hada ta gwir ŋa Yawe. Ka valatá tsi ta skwiha pla ghəŋ ŋa dray tsuh tsuh, nda skwiha pla ghəŋa zɗaku. Ka hgaŋtá tsi ta Yawe, ka zlghanaftá tsi ta wi nda vu ta saha daga ta luwa ta tsa gwira pla ghəŋ ŋa dray tsuh tsuh ya.

²⁷ « Vradanam kafaya gha da kupaka ni, » ka Yawe nda tsa duhwala ni ya.

²⁸ Ma tsa fitik ya, manda nghanata Dawuda ta zlghanafta Yawe ta wi ta blikwa Urnaŋ mnda la Yəbus, ka gɗatá tsi ta vla skwiha ŋa pla ghəŋ hada.

²⁹ Ma tsa fitik ya, həga tumpul ŋa Yawe si magaf Musa ma mtak, nda gwira pla ghəŋ ŋa dray tsuh tsuh ná, si ta vli tskala ma Givghuŋ nzakwa ni.

³⁰ Tsaw laviŋ a Dawuda ta dzaʼa ɗawa ndana Lazglafta hada wu, kabga ganaf ga tsa kafaya duhwala Yawe ya ta zləŋ.