1Rus 20 - Hdi

Klaghuta Dawuda ta luwa Raba

¹ Sagha sana vaku, ta fitik ta sab mghamha da vulu, ka lab Yuʼav kawadaga nda ndəghata sludziha, zaɗanatá haɗika la Ghamuŋ. Ka fatá həŋ ta ghuɓa taŋ ta hula luwa Raba ka ŋamta nda vulu. Ama ta nzaghutá Dawuda ma Ursalima. Ka kwaraftá Yuʼav ta luwa Raba, ka tasiŋta.

² Ka klaptá Dawuda ta salawara ga mgham ma ghəŋa mghama taŋ, ka fanamtá lu ma ghəŋ. Tsa salawar ya ná, magaf nda dasu ta maga kiluʼ hkən mbsak lu, ka tsərslaptá gata ni nda palaha ɗina ɗina. Ka hlaghatá tsi guli ta skwa zləɗu dagala si ma tsa luwa ya.

³ Ka kasaghatá tsi ta mnduha ma tsa luwa ya, ka pghamtá həŋ tkweʼ da maga slna nda zarta, nda kalək, nda ya nda slpaɗa. Ka mag Dawuda manda tsaya ŋa inda luwaha la Ghamuŋ. Tahula tsa, ka vraghatá tsi da Ursalima kawadaga nda inda sludziha ni.

Vuluha nda la Filisti

⁴ Tahula tsa, ka slatá vulu ma Gezer mataba la Israʼila nda la Filisti. Ma tsaya, ka dzatá Sibəkay mnda la Husa ta Sipay, sana mndu ma mndəra la Rafa, ka sku la Filisti ta htsiŋ.

⁵ Ka sləglatá vulu nda la Filisti, ka dzatá Ilhanaŋ, zwaŋa Yaghir ta Lahmi, zwaŋama ni ma Guliyat, mnda la Gat, ka guram gupa ni nda matala ga lgut.

⁶ Ka sliʼiglaftá vulu ma Gat. Mamu sana mndu hada nda slra, mkuʼ mkuʼ zwana dzva ni, nda səlaha ni tani, hisambsak fwaɗ mida gwagwata ni. Sab ma mndəra la Rafa tsatsi guli.

⁷ Ka gag tsi ta la Israʼila. Ka dzatá Yunataŋ, zwaŋa Simghaʼ, zwaŋama ni ma Dawuda.

⁸ Tsa mnduha la Gat ya ná, ma mndəra la Rafa saba həŋ. I Dawuda nda sludziha ni ta pslata həŋ.