1Rus 19 - Hdi

Zata Dawuda ta ghwa ta ghəŋa la Ghamuŋ

¹ Tsəɓakw fitik tahula tsa, ka mtutá Nahas mghama la Ghamuŋ, ka lam zwaŋa ni da gá mgham ma vla ni.

² Ka Dawuda mantsa: « Dzaʼa magana maga yu ta zɗaku ta Hanuŋ, zwaŋa Nahas, kabga magiha maga da ni ta zɗaku, » kaʼa. Ka ghunaftá Dawuda ta gwal ghunay da taŋ ŋa zgwaŋtá Hanuŋ ma mtatá da ni. Ka ɓhadaghata kwalvaha Dawuda da Hanuŋ ta haɗika la Ghamuŋ ŋa zgwaŋta.

³ Ka maliha la Ghamuŋ nda Hanuŋ mantsa: « Ta ndan ka ná, ŋa vla sgit ŋa da gha ghunagaghata Dawuda ta mnduha da zgwa kagha ra? Nza a ŋa snaŋtá haɗik, ka vitsapta ŋa hwanzaɓanapta a ghunaghakta tsi ta kwalvaha ni wu ra? » ka həŋ.

⁴ Mantsa tama, ka hlaftá Hanuŋ ta tsa kwalvaha Dawuda ya, ka hatsanatá ghumayha taŋ, ka ghwaghwanaghutá lgutha taŋ ha ta wa mndər ta wa mndər ka vriŋtá həŋ

⁵ Ka lagha lu rusa tsa gwaɗa ta tsa mnduha ya ŋa Dawuda, ka ghunaftá tsi ta mndu da gmaku nda həŋ, kabga hlu hla hula katakata ta hahəŋ. Ka tsəghaftá mgham ta lwi ŋa taŋ, kaʼa mantsa: « Nzawa nza ma Yeriku karaku ha ka ɗayglagata ghumayha ghuni. Tahula tsa ŋa vragaghata ghuni, » kaʼa.

⁶ Ta nghə la Ghamuŋ ná, tsawaɗanaf tsawaɗa həŋ ta ŋuɗuf ta Dawuda nda tsa skwi maga həŋ ya. Ka ghunaftá Hanuŋ nda la Ghamuŋ ta kiluʼa tsedi dəmbuʼ hkən mbsak (30.000) ŋa platá mwata plis nda gwal ta ŋla plis da la Aram ta kwakwara Mesuputami, nda la Aram ma Maghaha, nda ya ma Tsuva.

⁷ Ka hlaftá həŋ ta mwata plis dəmbuʼ hkən mbsak his mida (32.000), ŋa play nda pla, nda mghama Maghaha nda gwal vula ni ŋa dzaʼa mista taŋ, ka lagha tsa mnduha ya fatá ghuɓa taŋ mbəŋ nda Medəvaʼ. Ka sliʼagaptá la Ghamuŋ ma luwaha taŋ ka laghu ta wa vulu.

⁸ Snaŋtá Dawuda ta tsaya, ka ghunaftá tsi ta Yuʼav nda inda bakwa bikwira vulu.

⁹ Ka sliʼagaptá la Ghamuŋ ka dzaftá vgha ŋa vulu ta tva lami da luwa taŋ, ta nzaghutá tsa mghamha ta sliʼadaghata ya ma mtak hahəŋ nda ghəŋa taŋ.

¹⁰ Ka nghə Yuʼav ná, dzaʼa vulay ta vulu nda təv kəma, nda ya nda təv hul. Ka ɗagəglaptá tsi ta mbirimha mataba bikwirha vula la Israʼila, ka dzaftá tsi ta həŋ mbəŋ nda la Aram.

¹¹ Ka fanamtá tsi ma dzvu ta zwaŋama ni Avisay ta pɗakwa sludziha, ŋa payavata mbəŋ nda la Ghamuŋ.

¹² Ka Yuʼav nda tsi mantsa: « Ka mbriɗigha mbra la Aram ya, ka sagha ka da kata iʼi. Ala ka la Ghamuŋ ta mbraghaghatá kagha ya guli, dzaʼa katay iʼi ta kagha.

¹³ Mbra ta vgha, maranaŋ u mara ta tatá us ta ira u ŋa mnduha u, nda ya ŋa luwaha Lazglafta u, ka maga Yawe ta skwi ya ta zɗəganata! » kaʼa.

¹⁴ Ka gavadaghatá Yuʼav nda bakwa ni ŋa liŋta nda vulu ta la Aram. Ka hwayaftá tsaha ya ta kəma ni.

¹⁵ Nghanata la Ghamuŋ ta hwayafta la Aram, ka hwayaftá hahəŋ guli ta kəma Avisay, zwaŋama ni ma Yuʼav, ka vraghutá həŋ da luwa. Ka vraghatá Yuʼav da Ursalima.

¹⁶ Kəʼa ka la Aram ná, za za la Israʼila ta ghwa ta ghəŋ taŋ. Ka ghunaftá həŋ ta gwal ghunay ŋa hgaktá la Aram ta ɓla zala Yufratis. Suvak mala gwal vula la Hadadghezer ta kla kəma.

¹⁷ Ka mnanatá lu ta Dawuda. Ka tskanatá tsi ta sludziha la Israʼila demdem, ka sliʼaftá həŋ ka tsughwaɗaptá Yardeŋ. Ɓhadaghata ni da həŋ, ka dzaftá tsi ta həŋ ŋa vulu nda la Aram, ka liŋtá həŋ ta Dawuda nda vulu.

¹⁸ Ka hwayaftá sludziha la Aram ta kəma la Israʼila. Ka pslatá Dawuda ta sludziha la Aram, gwal ta ŋla mwata plis dəmbuʼ ndəfáŋ (7.000), nda gwal vulu nda səla dəmbuʼ fwaɗ mbsak (40.000). Ka dzatá tsi ta Suvak, mala gwal vulu guli.

¹⁹ Nghay kwalvaha Hadadghezer ta zata la Israʼila ta ghwa ta ghəŋa taŋ ná, ka dzraftá həŋ ta nzakw nda zɗaku nda Dawuda, ka sku həŋ ta htsiŋ da tsi. Vəgla a la Aram ta katglaŋta la Ghamuŋ ta həŋ wa.