1Rus 16 - Hdi

¹ Tahula ɓhadanaghatá tsa akwata Lazglafta ya, ka kladamtá lu fata ma huɗa tsa tumpul dzugwa Dawuda ya, ka valatá lu ta kəma Lazglafta ta skwiha pla ghəŋ ŋa dray tsuh tsuh, nda skwiha pla ghəŋa zɗaku.

² Manda kɗiŋta Dawuda ta vlatá tsa pla ghəŋha ŋa dray tsuh tsuh ya, nda pla ghəŋha zɗaku ya, ka tfanaghatá tsi ta wi ta mnduha nda hga Yawe.

³ Tahula tsa, ka daganaftá tsi ta inda la Israʼila, zgwana tani, nda miʼaha tani, ŋa inda mndu ta tumbura buradi, nda gatuʼa dibinaʼu, nda gatuʼa inabi.

Fay la Levi ta laha zləzləva Yawe

⁴ Ka pghamtá tsi ta sanlaha ma la Levi ŋa maga slna ta kəma akwata Yawe ŋa gɗata ta ndəɓa dzvu, nda rfay, nda zləzləvay ta Yawe, Lazglafta la Israʼila.

⁵ Tsa mnduha ya na: I Asaf mali, mahis Zakari, nda Ghaziʼel, nda Səmiramut, nda Yəhiʼel, nda Matitiya, nda Iliʼav, nda Benaya, nda Ghuvetʼidum, nda Yəghiʼel. Hahəŋ gwal dza htimbil, nda kəzliŋkəzliŋ. Asaf mnda ghudza ndeŋndeŋ.

⁶ Ka gɗatá i Benaya nda Yahaziʼel gwal dra skwi ŋa Lazglafta ta vya duli ta kəma akwata dzratá wa Lazglafta.

⁷ Baɗ tsaya zlrafta Dawuda ta pghatá i Asaf nda zwana da ni ŋa zləzləva Yawe.

⁸ Zləzləvawa Yawe, hgawa hga ta hga ni, mnaŋwa mna mataba sanlaha ma mndəra mnduha ta slnaha ni!

⁹ Fawa fa ta laha ŋa ni, zləzləvawa zləzləva nda huzla skalu! Rusawa rusa ta inda slnaha ni ka mandərmimi!

¹⁰ Ghərɓawa ta ghərɓaku ma hga ni nda ghuɓa, rfu da kaghuni, kaghuni gwal ta zba Yawe.

¹¹ Zbawa zba ta Yawe, nda mbrakwa ni tani, gɗawa gɗa ta zba həga kuma inda fitik!

¹² Havakwa hava ta skwa mandərmimiha maga tsi, nda mazəmzəmha ni, nda gumaha tsa tsi,

¹³ kaghuni zivira Israʼila, kwalva ni, kaghuni, zwana Yakubu ya zabap tsi!

¹⁴ Tsatsi Yawe, Lazglafta mu, ghəŋa haɗik tender ta tsə tsi ta guma ghəŋa ni.

¹⁵ Havawa hava inda fitik ta dzratá wa ni, nda tatá imi ta sləməŋ ŋa zivirha dəmbuʼ,

¹⁶ ya dzraf tsi nda Abraham, ya waɗana tsi ta Izak,

¹⁷ ka nanaftá tsi ka zlahu ŋa Yakubu, ŋa Israʼila, ka dzratá wi ŋa kɗekedzeŋ,

¹⁸ nda mnay kazlay na: « Dzaʼa vlagha vla yu ta haɗika Kanʼana, ka haɗika za həga dzaʼa kuni mutsay, » kəʼa ya.

¹⁹ Si mnduha kul yaku həŋ, si hutsekw yeya həŋ, ka mayəm həŋ ma tsa haɗik ya.

²⁰ Ka rə həŋ ta vli, lagha da ya mndəra mndu, lagha da ya mndəra mndu, lagha da vla ya gá mgham, lagha da vla ya gá mgham.

²¹ Ama haɗ Lazglafta ta zlanaŋtá tvi ta mndu ŋa ganap tiri ta həŋ wu, ta dvay ta mghamha ta ghəŋa gwaɗa ta hahəŋ, kaʼa mantsa:

²² « Ma ksaŋ kuni ta gwal zbap yu ta həŋ nda ma pghanaghatá rɗi, ma magana kuni ta ghwaɗaka skwi ta anabiha ɗa, » kaʼa.

²³ Fawa fa ta laha ŋa Yawe, mnduha demdem ta ghəŋa haɗik! Mnawa mna inda fitik ta gwaɗa ta mbaku!

²⁴ Mnawa mna ta glakwa ni mataba mndəra mnduha, rusawa rusa ta mandərmima ni mataba inda mndəra mnduha!

²⁵ Dagala Yawe, raŋ ra zləzləvu, nda makwitkwit tida ka malaghutá sanlaha ma lazglaftaha,

²⁶ kabga inda lazglaftaha mndəra mnduha ná, ka bətbət nzakwa taŋ, ama Yawe ta magaftá luwa.

²⁷ Ta wuɗaku glaku nda sgit, ma kəma ni, mbraku nda rfu, ma vla nzakwa ni.

²⁸ Mndəra mnduha ta ghəŋa haɗik, vlaŋwa vla ta Yawe, vlaŋwa vla ta glaku nda mbraku ta Yawe.

²⁹ Vlaŋwa vla ta Yawe ta glaku ta raŋta hga ni, hlakwa hla ta mbəhuha, ka sagha kuni ta kəma ni. Tsəlɓawa ta tsəlɓu ta kəma Yawe, dabga sgita ghuɓata ni.

³⁰ Ghudza ta ghudzaku ta kəma ni ghəŋa haɗik demdem, nda diha ghəŋa haɗik, haɗ ta gəzlimbiɗaku ɗekɗek wa.

³¹ Ka rfa luwa ta rfu, ka nza haɗik waɗah guli! Ka mna lu mataba mndəra mnduha, « Yawe ná, mgham ya! » kəʼa.

³² Ka ghudzaga drəf ta ghudzaga, nda inda skwi ta ndəghamtá vgha mida tani! Ka skala mtak ta skalu, nda rfu nda inda skwi mida tani!

³³ Ka hayaya həga fuha ta hayaya rfu ta kəma Yawe, kabga waʼa ta sagha da tsa guma ta ghəŋa haɗik.

³⁴ Zləzləvawa Yawe, kabga ŋərma ya, ta gɗava gɗa zɗakwa ni ŋa ɗekɗek.

³⁵ Mnawa mna kazlay: « Mbaŋnaf mba, a Lazglafta mbakwa ŋni, tskaŋnak tska, katap kata ta aŋni da mndəra sanlaha ma mnduha, ŋa rfay ŋni ta hga gha nda ghuɓa, ŋa ghərɓay ŋni ta ghərɓaku, ka zləzləva kagha.

³⁶ Rfu ŋa Yawe, Lazglafta la Israʼila, kul haɗ zlrafta ni, nda kɗavakta ni! » ka həŋ. Ka mnə mnduha demdem: « Amin! Zləzləvama Yawe! » ka həŋ.

³⁷ Ka zlanatá Dawuda hada ta i Asaf nda zwana da ni ta kəma akwata dzratá wa Yawe, ŋa gɗata taŋ ta maga slna ta kəma tsa akwati ya taɓta skwi mnaf lu ŋa magay inda fitik.

³⁸ Ka pghatá tsi guli ta i Ghuvetʼidum nda zwana da ni mkuʼ mbsak tghas mida. I Ghuvetʼidum zwaŋa Yədutuŋ nda Husa gwal ngha wa tgha.

³⁹ Ka zlanatá Dawuda ta i Tsaduk mnda dra skwi ŋa Lazglafta, nda sanlaha ma zwana da ni ka gwal dra skwi ŋa Lazglafta ta kəma həga tumpula Yawe, ma vli tskala ma Givghuŋ,

⁴⁰ ŋa vlay taŋ inda fitik ŋa Yawe ta skwa pla ghəŋ ŋa dray tsuh tsuh, nda sərɗək tani nda hawu tani ta gwira pla ghəŋ ŋa dray tsuh tsuh, nda ya ŋa magay taŋ ta inda skwi nda vinda ma zlaha Yawe ya vindanaf tsi ta la Israʼila.

⁴¹ Kawadaga nda həŋ, mamu i Hemaŋ nda Yədutuŋ, nda gwal zabap lu ka ɗagapta ta hga taŋ ta hga taŋ ŋa zləzləva Yawe, kabga ta gɗava gɗa zɗakwa ni ŋa kɗekedzeŋ.

⁴² Kawadaga i Hemaŋ nda Yədutuŋ nda həŋ guli, nghapta ka talakwaha, nda ndeŋndeŋha, nda huzlaha ŋa pgha laha Lazglafta hahəŋ. Ka pghatá lu ta i zwana Yədutuŋ ŋa ngha wa tgha.

⁴³ Ka gazlaghutá inda mndu, dər wa dzagha ni, ta vraghutá Dawuda da tfanaghatá wi ta la ga taŋ.