1Rus 14 - Hdi

Nzakwa Dawuda ma Ursalima

¹ Ka ghunadaghatá Hiram, mghama Tir ta gwal ghunay da Dawuda nda udzuha sedra, nda gwal fiɗi, nda gwal ratsa pala, ŋa banaftá həga.

² Ka graftá Dawuda tama kazlay na, Yawe ta vlaŋtá ga mgham ta ghəŋa la Israʼila, ka ŋlanaftá ga mghama ni katakata, kabga ɗvuta ni ta mnduha ni la Israʼila, kəʼa.

³ Ka hləglaftá Dawuda ta miʼi guli ma Ursalima, ka yayəglatá tsi guli ta zwana zgwana nda kuʼaha.

⁴ Wya hga tsa zwani yaya tsi ma Ursalima ya: I Samuwa, nda Suvav, nda Nataŋ, nda Salumuŋ,

⁵ nda Yivhar, nda Ilisuwa, nda Ilpelet,

⁶ nda Nugah, nda Nefeg, nda Yafigha,

⁷ nda Ilisama, nda Bəghelʼyadagh, nda Ilifelet.

Zata Dawuda ta ghwa ta ghəŋa la Filisti

⁸ Ka snaŋtá la Filisti kazlay na: Fa fa lu ta Dawuda nda ma pghanaghatá rɗi ka mgham ta ghəŋa la Israʼila demdem kəʼa. Ka sliʼadaftá həŋ demdem da zbay. Snaŋta Dawuda, ka sab tsi da gma həŋ.

⁹ Ɓhadaghata la Filisti, ka liŋtá həŋ guk nda vulu ta gwal ma didiŋa la Rafa, ka zləɗaghatá həŋ.

¹⁰ Ka ɗawaŋtá Dawuda da Lazglafta, kaʼa mantsa: « Ka lafa yu da liŋta nda vulu ta la Filisti ra? Dzaʼa vla vla ka ta həŋ ma dzva ɗa ra? » kaʼa. Ka Yawe nda tsi mantsa: « Ŋla, dzaʼa vla vla yu ta həŋ ma dzva gha, » kaʼa.

¹¹ Mantsa tama, ka laf həŋ da Baghalʼpəratsim. Hada, ka zatá Dawuda ta ghwa ta ghəŋa taŋ. Tahula tsa, kaʼa mantsa: « Tanatá Lazglafta ta ghumaha ɗa nda ma dzva ɗa, manda ya ta tuta ŋatá ghwa ya, » kaʼa. Tsaya kəl lu ka hga tsa vli ya ka Baghalʼpəratsim.

¹² Ka zlanavatá həŋ ta lazglaftaha taŋ hada. Ka Dawuda mantsa: « Dariŋwa dara nda vu! » kaʼa.

¹³ Ka ləglaha la Filisti zləɗəglatá tsa la ma didiŋa ya.

¹⁴ Ka ɗawglaŋtá Dawuda da Lazglafta, ka Lazglafta nda tsi mantsa: « Ma ləglaf ka liŋtá həŋ nda vulu, tsanagha tsa ta warawara ta həŋ, ŋa ɓhadaghata gha da həŋ mbəŋ nda həga fuha bakaʼ.

¹⁵ Na snay gha ta ghudzaga səla ta kuzibiɗima tsa fuha ya, ka saba ka da vulay, kabga Lazglafta dzaʼa sabi ta kəma gha, ŋa zatá ghwa ta ghəŋa la Filisti, » kaʼa.

¹⁶ Ka magatá Dawuda manda va ya mnanaf Lazglafta, ka zatá tsi ta ghwa ta ghəŋa la Filisti, daga ma Givghuŋ ha da Gezer.

¹⁷ Ka laghu hga Dawuda da zərwa ta inda haɗik, ka pghamtá Yawe ta inda mndəra mndu da zləŋa Dawuda.