1Rus 12 - Hdi

Gwal ta kataŋtá Dawuda ma Tsiklag

¹ Wya gwal ta lagha da Dawuda ma Tsiklag, ma nzaghuta ni diʼiŋ dabga Sawulu, zwaŋa Kis. Tekw hahəŋ mataba gwal ka bikwira vulu ta kataŋta Dawuda ma vulu.

² Gwal vulu nda hava həŋ, nda zeghwi nda zlaɓa ka həŋ ta waɗa palaha, ka ha hava a tsi. La Biŋyamiŋ həŋ mataba zwana ma ni ma Sawulu:

³ Ahighezer mala taŋ, nda Yuʼas, zwana Səmagha mnda la Givgha, nda i Yəziʼel nda Pelet, zwana Ghazmavet, nda Bəraha, nda Yehu mnda la Ghanatut,

⁴ nda Yismaghya mnda la Givghuŋ, viɗviɗ mataba gwal hkən mbsak, ka ghəŋ ta ghəŋa gwal hkən mbsak,

⁵ nda Yirməya, nda Yahaziʼel, nda Yuhanaŋ, nda Yuzavat mnda la Gədera,

⁶ nda Ilghuzay, nda Yəremut, nda Bəghalya, nda Səmaryahu, nda Səfatyahu, mnda la Haruf,

⁷ nda Ilkana, nda Yisiyahu, nda Ghazarʼel, nda Yughezer, nda Yasuvgham mnduha la Kurah,

⁸ nda i Yugheʼla nda Zəvadiya, zwana Yəruham mnda la Gədur.

⁹ Mataba la Gat, ka tsaghatá sanlaha ma gwal viɗviɗ ma vulu ta vgha ka laghu mista Dawuda ma vla ɗifa ma mtak. Sludziha nda tagha vula taŋ həŋ, gwal nda sna ta vulu nda zalam nda gupa həŋ guli, manda rveriha həŋ, nda dzira həŋ manda ghadigir ma dzaŋ ta pyam həŋ.

¹⁰ Ghezer mala taŋ, Ghuvadiya mahis, Iliʼav mahkən,

¹¹ Mismana mafwaɗ, Yirməya mahutaf,

¹² Ghatay mamkuʼ, Iliʼel mandəfáŋ,

¹³ Yuhanaŋ matghas, Ilzavat matəmbay,

¹⁴ Yirməya maghwaŋ, Mahbanay maghwaŋpəɗ ndeŋa taŋ.

¹⁵ Tsaha ya maliha gwal vulu mataba la Gat. Mbrakwa mndu ka sagəŋ mataba taŋ ná, klaf kla ta mbrakwa sludziha dərmək. Mbrakwa mala taŋ guli ná, klaf kla ta mbrakwa sludziha dəmbuʼ.

¹⁶ Hahəŋ gwal ta tsughwaɗaptá Yardeŋ, ma ndəghafta ni ka tsurfaku ma taŋtaŋa tili, ka gazlanatá həŋ ta inda gwal ma didiŋaha, nda təv safa fitik nda ya nda təv dɗakwa fitik.

¹⁷ Mamu sanlaha ma la Biŋyamiŋ nda la Yuda ta lagha da Dawuda ma dzaŋ ta pyam ma vla ɗifa ni.

¹⁸ Ka sab Dawuda da guya həŋ, kaʼa nda həŋ mantsa: « Ka ŋa zɗaku sagha kuni da iʼi ŋa katihata katsi, dzaʼa guyaku ndana mu, ama ka ŋa nanaftá iʼi ŋa ghumaha ɗa tsi, ya wya haɗ ghwaɗaka skwi maga yu wu, dzaʼa nghay Lazglafta dzidzíha mu, dzaʼa tsaghunagha tsa ta guma! » kaʼa.

¹⁹ Ka lam sulkuma Lazglafta da Ghamasay, mali ta ghəŋa sludziha hkən mbsak: « Ŋa gha ŋni, Dawuda, kawadaga ŋni nda kagha, zwaŋa Yisay! Zɗaku, zɗaku ŋa gha, zɗaku ŋa mndu ta kata kagha, kabga Lazglafta gha ta kata kagha! » kaʼa. Ka tsuʼaftá Dawuda ta həŋ, ka pghamtá həŋ ka maliha ta ghəŋa bakwa sludziha ni.

²⁰ Ka gwaftá sanlaha ma mnduha Mənase ta vgha nda Dawuda, ma laghwa ni kawadaga nda la Filisti da vulu nda Sawulu. Ama kataŋ a həŋ ta la Filisti wu, kabga tahula dzərkavata gwal vula la Filisti, ka vriŋtá həŋ ta i Dawuda, ka həŋ mantsa: « Dzaʼa vraghu vra gwaftá vgha nda daŋahəga ni Sawulu ŋa zba hafa ŋni! » ka həŋ.

²¹ Manda vraghata Dawuda da Tsiklag, wya la Mənase ta gwaftá vgha nda tsi: I Ghadnah, nda Yuzavat, nda Yədighaʼel, nda Mikaʼel, nda Yuzavat, nda Ilihuʼ, nda Tsiltay, maliha ta ghəŋa sludziha dəmbuʼ dəmbuʼ ma Mənase.

²² Hahəŋ ta kataŋtá i Dawuda nda bakwa ni, kabga gwal viɗviɗ həŋ demdem. Ka nzakw həŋ ka maliha ta ghəŋa gwal vula ni.

²³ Inda fitik mnduha ta va lagha da Dawuda ŋa kataŋta, ha ka tskutá bakwa sludziha katakata, manda bakwa sludziha Lazglafta.

Sgavaghata gwal vula Dawuda

²⁴ Wya mbsaka gwal vulu nda hbatá vgha nda huzla vulu ta sliʼafta ma bakuha ka sliʼadaghata da Dawuda ma Hevruŋ, ŋa vlaŋtá gá mghama Sawulu, taɓta ya mnaf Yawe:

²⁵ Ma mndəra la Yuda, nda hlatá zalam nda gupa ná, mnduha dəmbuʼ mkuʼ nda tghas dərmək (6.800) həŋ nda habatá vgha nda huzla vulu.

²⁶ Ma mndəra la Simghuŋ ná, mnduha dəmbuʼ ndəfáŋ nda dərmək (7.100) həŋ, gwal viɗviɗ nda habatá vgha nda huzla vulu.

²⁷ Ma mndəra la Levi ná, mnduha dəmbuʼ fwaɗ nda mkuʼ dərmək (4.600) həŋ,

²⁸ nda Yəhuyada mali mataba la Haruna, pghaf mnduha dəmbuʼ hkən nda ndəfáŋ dərmək (3.700),

²⁹ nda Tsaduk guli, sana duhwal viɗviɗ ma vulu, nda maliha sludziha hisambsak his mida mataba la taŋ.

³⁰ Ma mndəra la Biŋyamiŋ, zwana ma ni ma Sawulu ná, mnduha dəmbuʼ hkən (3.000) həŋ. Ta mal gwal mataba taŋ si ta nda ndiʼatá vgha ta la ga Sawulu ha ta tsa fitik ya.

³¹ Ma mndəra la Ifrayim ná, mnduha dəmbuʼ hisambsak nda tghas dərmək (20.800) həŋ, gwal viɗviɗ ma vulu laghu hga taŋ da zərwa mataba la taŋ.

³² Ma rita mndəra la Mənase ná, mnduha dəmbuʼ ghwaŋpəɗ tghas (18.000) həŋ, gwal zabaf lu ta həŋ ŋa dzaʼa famtá Dawuda da mgham.

³³ Ma mndəra la Yisakar ná, his dərmək (200) maliha nda inda zwana ma taŋ ta sna gwaɗa ta mnafta həŋ. Hahəŋ gwal nda sna ta galapta skwi ŋa magay la Israʼila nda fitika ni.

³⁴ Ma mndəra la Zəvuluŋ ná, mnduha dəmbuʼ hutaf mbsak (50.000) prək ka vulu həŋ, nda payatá vgha ŋa vulu dər nda wati ma huzla vulu tsi. Nda ŋuɗuf turtuk ta saba həŋ da kataŋtá Dawuda.

³⁵ Ma mndəra la Naftali ná, maliha dəmbuʼ (1.000) həŋ, kawadaga nda mnduha dəmbuʼ hkən mbsak ndəfáŋ mida (37.000) nda habatá vgha nda zalamha dagala dagala nda ya nda gupaha.

³⁶ Ma mndəra la Daŋ ná, mnduha dəmbuʼ hisambsak tghas mida nda mkuʼ dərmək (28.600) həŋ, nda payatá vgha taŋ ŋa vulu.

³⁷ Ma mndəra la Aser ná, mnduha dəmbuʼ fwaɗ mbsak (40.000) həŋ, nda payatá vgha nda huzla vulu prək ŋa dzaʼa da vulu.

³⁸ Ma mndəra la Rubeŋ, nda ŋa la Gat, nda ŋa rita mndəra la Mənase nda ta ɓla Yardeŋ ná, mnduha dəmbuʼ dərmək nda hisambsak (120.000) həŋ, nda habatá vgha nda inda huzla vulu kavghakavgha.

³⁹ Inda tsa gwal vulu ya demdem ná, nda payatá vgha həŋ ŋa dzaftá vgha ŋa vulu. Ka lagha həŋ nda ŋuɗuf turtuk da Hevruŋ ŋa famtá Dawuda da mgham ta ghəŋa inda la Israʼila. Ka lagha inda pɗakwa la Israʼila guli nda ŋuɗuf turtuk, ŋa famtá Dawuda da mgham.

⁴⁰ Ka zatá həŋ ta fitik hkən hada kawadaga nda Dawuda ta zay ta say, kabga payanaf paya zwana ma taŋ ta skwa zay ta həŋ.

⁴¹ Ka hladaghatá la taŋ ma vliha diʼiŋ diʼiŋ, la Yisakar, nda la Zəvuluŋ, nda la Naftali, ta kəɗihha, nda ŋalibwaha, ta plisa ghwandala, nda slaha ta skwa zay: Ta hpu, nda gatuʼa ghuraf, nda ghwalatá yakwa inabi, nda ima inabi, nda rɗi, nda ya nda rina fisik, nda slaha ta ndəghuta, kabga mamu rfu ma Israʼila.