1Rus 10 - Hdi

Mtakwa i Sawulu nda zwana ni

¹ Ka liŋtá la Filisti ta la Israʼila nda vulu. Ka hwayaftá la Israʼila ta kəma taŋ, ka pslatá lu ta ndəghata həŋ ta ghwá Gilbuwa.

² Ka hwayiŋtá la Filisti ta i Sawulu nda zwana ni ka klatá wa taŋ, ka pslatá həŋ ta i Yunataŋ, nda Avinadav, nda Malkiʼsuwa, zwana Sawulu.

³ Ka laghu mbrakwa vulu nda təv Sawulu, ka hiŋtá gwal vulu ta hava, ka slaftá tsi tida, ka balanata.

⁴ Ka Sawulu nda tsa mndu ta klanatá huzla vula ni ya mantsa: « Tsəhagap tsəha ta kafaya gha, ka sliglata ka ta iʼi. Ka mantsa a tsi wu ná, gwal kul tsaku fafaɗa taŋ dzaʼa gaɗiptá ghəliz, » kaʼa. Ama va a tsa mndu ta klanatá huzla vula ni ya ta dzata wu, kabga nda ksa da zləŋ katakata. Mantsa tama, ka klaftá Sawulu ta kafaya ni, ka vzuŋtá vgha ta wa ni.

⁵ Nghanata tsa mndu ta klanatá huzla vulu ya ta mtatá Sawulu, ka vzuŋtá tsatsi guli ta vgha ni ta wa kafay, ka mtuta tsi.

⁶ Mantsa ya ka Sawulu mtuta, nda zwana ni hkən hkən, kawadaga nda inda la ga taŋ.

⁷ Snaŋta inda la Israʼila ta nzakw ma didiŋa kazlay hwahwayaghu hwahwaya sludziha la Israʼila, nda rwa i Sawulu nda zwana ni kəʼa, ka zlanavatá həŋ ta luwaha taŋ, ka hwahwayaghuta. Ka sliʼadaghatá la Filisti nzamta mida.

⁸ Ga mahtsima ni, ka sliʼadaghatá la Filisti da hla huzla ta mbliha, ka slanaghatá həŋ ta mbla i Sawulu nda zwana ni rafsaŋa ta ghwá Gilbuwa.

⁹ Ka suɗatá həŋ ta Sawulu, ka tsaghatá ghəŋa ni, ka hlatá huzla vula ni, ka wawu həŋ ma inda haɗika la Filisti, ka tá gwaɗa ta ghəŋa ni ŋa skwa wuyayha taŋ nda ya ŋa mnduha.

¹⁰ Ka pghamtá həŋ ta tsa huzla vula ni ya ma həga lazglafta taŋ, ka hagatá həŋ ta ghəŋa ni ma həga Daguŋ.

¹¹ Snanaghata inda skwi magana la Filisti ta Sawulu ta inda gwal ma Yaves ma Gilghat,

¹² ka sliʼaftá inda gwal ta dra ŋuɗuf, ka hlaftá həŋ ta mbliha i Sawulu, nda ŋa zwana ni, ka hlaghata da Yaves. Ka lalamtá həŋ ta ghudzifha taŋ mista sana halalaya fu ma Yaves. Tahula tsa, ka magatá həŋ ta fitik ndəfáŋ ta suma.

¹³ Mtu mta Sawulu dabga vəl ganata ni ta dmaku ta Yawe, ka kwalaghuta snatá gwaɗa Yawe. Ka laghu tsi nduk da gwal ta gwaɗa nda sulkuma gwal nda rwa,

¹⁴ ama zbaŋ a ta Yawe wa. Tsaya tama, kəl Yawe ka dzata, ka vlaŋtá gá mgham ta Dawuda, zwaŋa Yisay.