1Mgh 9 - Hdi

Zlghafta Yawe ta duʼa Salumuŋ

¹ Manda kɗiŋta Salumuŋ ta baftá həga Yawe, nda həga gá mgham, nda inda skwiha ndanaŋ tsi ta magata,

² ka zlagəglaptá Yawe da Salumuŋ ka mahis, manda si zlagapta zlagap tsi da tsi ma Givghuŋ ya kay.

³ Ka Yawe nda tsi mantsa: « Tsuʼaf tsuʼa yu ta ndəɓa dzva gha nda tawa gha mnaɗif ka ya. Ta fa fa yu ta na həga baf ka na ŋa nzakwa hga ɗa ŋa ɗekɗek. Dzaʼa faf fa yu ŋa ɗekɗek ta ira ɗa nda ŋuɗufa ɗa tida.

⁴ Kagha ya, ka ta mbaɗay ka ta kəma ɗa manda ya mbaɗ da gha Dawuda, ta skwi tɗukwa nda kahwathwata nda hɗamtá inda skwi mnaghaf yu, ka ŋana ŋa ka ta zlahuha ɗa, nda tva skwiha ɗa ŋa magay katsi,

⁵ dzaʼa dihana diha yu ŋa ɗekɗek ta dughurukwa gá mghama gha ta ghəŋa la Israʼila manda ya mnana yu ta da gha Dawuda, ma mnata ɗa: “Haɗ ka dzaʼa pɗata ɗekɗek ta mndu ta dughurukwa gá mghama la Israʼila wu,” kəʼa ya, » kaʼa.

⁶ Ama ka mbəɗaghu mbəɗa kuni ta vgha ta vata iʼi, kaghuni nda zivirha ghuni, ka ŋana a kuni ta zlahuha ɗa nda tva skwiha ŋa magay ya vlaghuna yu, ka laghu la kuni maganatá slna ta sanlaha ma lazglaftaha, ka tsəlɓu ta kəma taŋ katsi,

⁷ dzaʼa hliŋ hla yu ta la Israʼila ta haɗik ya vlaŋ yu ta həŋ, dzaʼa vzidiŋ vza yu diʼiŋ nda iʼi ta na həga fa yu ŋa vlaŋtá sgit ta hga ɗa na, dzaʼa nzakway la Israʼila ka skwa ghuɓasay, ka skwa gagay mataba inda mndəra mnduha.

⁸ Nana həga Lazglafta ka skwa ndərmimay na, inda mndu dzaʼa lab ndusa nda tsi ná, dzaʼa nza nza ndrakawa, ka tha mtsiriʼu. Ka lu dzaʼazlay na: « Nya kəl Yawe ka maganatá skwi manda na ta na haɗik na, nda na həga na na? ka lu dzaʼazlay.

⁹ Ka lu dzaʼa zlgha wa ni na: “Vəl zlanavata taŋ ta Yawe, Lazglafta taŋ ta hlagaptá dzidzíha taŋ ma haɗika Masar ya, vəl laghwa taŋ da ndiʼaftá vgha nda sanlaha ma lazglaftaha, ka tsəlɓu ta kəma taŋ, ka maganatá slna ta həŋ ya. Tsaya kəl Yawe ka vzanaghatá həŋ ta inda na zləmndaha na,” » ka lu dzaʼazlay.

Hisambsak luwaha vlaŋ Salumuŋ ta Hiram

¹⁰ Ma kɗavakta tsa vaku hisambsak, kəl Salumuŋ ka babaftá ta tsa həgaha his, həga Yawe, nda həga mgham ya,

¹¹ ka vlaŋtá mgham Salumuŋ ta luwaha hisambsak ta haɗika Galili ta Hiram mghama Tir, kabga tsatsi ta valaŋtá Salumuŋ ta udzuha sedra, nda udzuha bərus, nda dasu manda ya kumaŋ tsi.

¹² Ka sab Hiram ma Tir ŋa nghanatá tsa luwaha vlaŋ Salumuŋ ya, ama zɗəgana a wa.

¹³ Kaʼa mantsa: « Wati luwaha ya vliha ka ní, zwaŋama ɗa! » kaʼa. Ka hgə tsi ta həŋ ka haɗika Kavul, ka nzatá tsa hgu ya ha gita.

¹⁴ Si tsəghanaf tsəgha Hiram ta mgham ta dasu ta malaghutá kiluʼ dəmbuʼ fwaɗ (4.000).

Magatá slnaha Salumuŋ kavghakavgha

¹⁵ Wya skwi ta nghanatá mnduha ta maga slna mbraku pgham mgham Salumuŋ ŋa ba həga Yawe, nda həga ga mgham ni, nda ghərzla ta hgə lu ka Milu, nda matsaka Ursalima, nda luwa Hatsur, nda luwa Məgidu, nda luwa Gezer.

¹⁶ Si klaghu kla Firʼawna mghama Masar ta luwa Gezer nda vulu, ka driŋta, ka pslatá la Kanʼana ta nzakw mida. Tahula tsa, ka vlaŋtá tsi ta tsa luwa ya, ka mbəhu ta makwa ni markwa Salumuŋ.

¹⁷ Ka babəglaftá Salumuŋ ta luwaha Gezer, nda Betʼhuruŋ ma didiŋa,

¹⁸ nda Baghalat, nda Tamar ta mtaka haɗika Yuda.

¹⁹ Ka babaftá tsi ta inda luwaha ta kəl lu ka pgha huzla ta nzakway ka ŋa ni, nda ya ta kəl tsi ka nzula mwataha plisha, nda ŋa plisha ni. Ka babaftá Salumuŋ guli ta inda ya má ndanaŋ tsi ta babafta ma Ursalima, ma Ləvanuŋ nda ya ma inda haɗikha ta skwa htsiŋ da tsi.

²⁰ Inda mndəra mnduha ta pɗata ma la Amuru, nda la Het, nda la Periz, nda la Hiv, nda la Yəbus, kul nzakway ka la Israʼila ná,

²¹ pɗa pɗa zivira taŋ ma tsa haɗik ya, trap tra la Israʼila ta zaɗanatá həŋ ɗekɗek. Ka waftá Salumuŋ ta həŋ ka vuʼa ŋa maga slna mbraku mbraku. Ka nzakw tsi ta həŋ manda tsaya ha gita.

²² Ama hlaf a Salumuŋ ta dər wati ma la Israʼila ka vuʼa wa. Ka pghatá tsi ta həŋ ka gwal vulu, nda kwalvaha ni, nda maliha, nda maliha ta ghəŋa mwata plisha, nda gwal ŋla plis tani.

²³ Mbsaka maliha hlaf lu ŋa maganatá slna ta Salumuŋ na: Hutaf dərmək nda hutaf mbsak (550) həŋ. Hahəŋ gwal ta nghapta ka mnduha ta maga slnaha.

²⁴ Ka sliʼaftá makwa Firʼawna ma luwa Dawuda ka lafi da həga ni, ya banaf Salumuŋ ya. Tahula tsa dzafta tsi ta ghərzla ta hgə lu ka Milu ya.

²⁵ Hkən səla ma vaku, ta vla Salumuŋ ta skwa pla ghəŋha ŋa dray tsuh tsuh, nda skwa pla ghəŋha zɗaku ta gwir baf tsi ŋa Yawe, ka dra urdi ta kəma Yawe. Mantsa ya magata tsi ta slna ta raku ka magay ma tsa həga Lazglafta ya.

²⁶ Ka tsatsaftá mgham Salumuŋ guli ta kwambaluha ma Ghetsiyuŋʼgever, ndusa nda Ilut ta wa drəfa Zaŋwafi ma haɗika Idum.

²⁷ Ka ghwanaftá Hiram ta mnduha ni nda sna ta swa kwambalu ŋa kataŋtá mnduha Salumuŋ nda swa kwambalu.

²⁸ Ka ɓhadaghatá həŋ da Ufir, daga hada, ka hlanaktá həŋ ta dasu ta malaghutá kiluʼ dəmbuʼ ghwaŋpəɗ fwaɗ (14.000) ta mgham Salumuŋ.