1Mgh 5 - Hdi

¹ Ka gə Salumuŋ ta mgham ta ghəŋa inda zwana vla ga mghamha ta sliʼafta ta wa zala Yufratis, ha ta kwakwara la Filisti dikw ta mukuma nda Masar. Ta hlədanagha hla həŋ ta skwi ta Salumuŋ, ka maganatá slna ma nzakwa ni nda hafu.

² Nimaya ta zuta lu ma həga ga Salumuŋ ta vaghu nda ya ŋa inda mnduha ta maga slna ga taŋ ná, buhwa hpu kəzlitit təmbay mbsak, nda buhwa hpu kul wunaku dərmək nda tghas mbsak (180),

³ nda slaha ghwaŋ nda nuʼa nda nuʼa, nda slata ghwa hisambsak, nda rina fisik dərmək (100), sganaghaha ta ghadigirha, nda madvaha, nda gidzalaha, nda skwiha nda zlghəŋ nda uwasla nda uwasla.

⁴ Ka gə tsi ta mgham ta ghəŋa inda kwakwar nda təv dɗakwa fitik ta wa zala Yufratis, sliʼafta ni ma Tifsah dikw da Ghaza, nda inda mghamha tsa kwakwar ya. Ləŋləŋ nzata tsi nda inda haɗikha ta wanafta.

⁵ Ka nzakw la Yuda nda la Israʼila ta nzakwa taŋ ləŋləŋ, daga ma Daŋ ga mazlay dikw da Bəʼerseva ga maghura, dər wa ma vwaha inaba ni, nda ya ma vwaha ghurafa ni, ma inda nzakwa Salumuŋ nda hafu.

⁶ Dəmbuʼ fwaɗ mbsak (40.000) glakamha Salumuŋ ŋa plisha nda mwata plisha vula ni, nda gwal ŋla plis dəmbuʼ ghwaŋpəɗ his (12.000).

⁷ Tsa guvnaha ya ta vla skwa zay dər wa ma tila ni ŋa mgham Salumuŋ nda inda gwal ta ŋanadaghata da vla za skwa zaya ni. Haɗ həŋ ta zlanata ŋa pɗata ni ta sana skwi wa.

⁸ Ta hladagha hla həŋ guli ta urz, nda kuzuŋha ŋa plisha, nda plisha ta tɗa mwata plis ma vli ta lagha mgham, dər wa nda ŋa ni ma vli ya mnanaf lu.

Ɗifila Salumuŋ

⁹ Ka vlaŋtá Lazglafta ta ɗifil, nda mahizl dagala, nda snaŋtá skwi ta fərtuta katakata ta Salumuŋ manda ndəghata wutak ta wa drəf.

¹⁰ Ka fikaghutá ɗifila Salumuŋ ta ɗifila inda gwal nda təv safa fitik, nda ŋa gwal ta haɗika Masar.

¹¹ Malaghu mala tsatsi nda ɗifil ta ghəŋa dər wati ma mndu, malaghu mala piw ta Itaŋ mnda la Izrah, nda i Hemaŋ, nda Kalkul, nda Darda zwana Mahul. Ka laghu hga ni da zərwa mataba inda mndəra mnduha ta wanafta.

¹² Dəmbuʼ hkən (3.000) mahdihdi ta sabi ma wa ni, dəmbuʼ nda hutaf (1.005) lahaha tsatsigiŋ tsi.

¹³ Gwaɗa gwaɗa ta gwaɗa ta fuha, kulam ta sedra ma Ləvanuŋ, nduk nda izwap ta ɗyagapta ta matsak. Mna mna guli ta gwaɗa ta rini nda nimtak, nda zarakha, nda ɗyakha, nda tsuɗayha, nda klipiha.

¹⁴ Snaŋta inda mghamha ma inda mndəra mnduha ta ghəŋa haɗik ta ghuba ɗifila Salumuŋ, ka ghunadaghatá həŋ ta mnduha da snay.

Payay Salumuŋ ta vgha ŋa ba həga Yawe

¹⁵ Snaŋta Hiram mghama Tir ta mnay kazlay na, fam fa lu ta Salumuŋ ka mgham nda ma pghanaghatá rɗi da vla da ni Dawuda kəʼa, ka ghunaftá tsi ta kwalvaha ni da tsi, kabga si nzuv nza həŋ nda Dawuda.

¹⁶ Ka ghunaftá Salumuŋ ta gwal ghunay mnanatá Hiram:

¹⁷ « Nda sna vərɗa kagha kazlay na, trap tra da ɗa Dawuda ta baftá həga ŋa vlaŋtá sgit ta Yawe, Lazglafta ni kəʼa, dabga vuluha nda tsi si ta vulu inda ghumaha ni ta wanafta ha ka zanatá Yawe ta ghwa, ka pghíŋtá həŋ mista səla ni ya.

¹⁸ Ama ndanana, ka vlihatá Yawe, Lazglafta ɗa ta mbiʼa vgha dər ndiga ndiga, ta haɗ ghumaha wu, ta haɗ zləmnda ta ghuya ɗaŋwa ŋa mndu wa.

¹⁹ Mamu yu nda ndana baftá həga ŋa vlaŋtá sgit ta Yawe, Lazglafta ɗa, manda ya mnana Yawe ta da ɗa Dawuda kazlay na: “Zwaŋa gha ya dzaʼa fata yu ma vla gha ta dughurukwa ga mghama gha, tsatsi dzaʼa baɗiftá həga ŋa vlihata sgit,” kəʼa ya.

²⁰ Ndanana, mnaf mna ka ɗatsihata lu ta udza sedra ma Ləvanuŋ. Ka gwafta kwalvaha ɗa ta mbraku nda kwalvaha gha, dzaʼa plana pla yu ta nisəla kwalvaha gha, taɓta ya dzaʼa mnata ka. Nda sna ka ná, haɗ mndu da aŋni nda sna ta ɗatsa fuha manda la Tsiduŋ wu kəʼa, » kaʼa.

²¹ Snaŋta Hiram ta tsa gwaɗa Salumuŋ ya, ka rfu tsi ta rfu katakata, kaʼa mantsa: « Rfu ŋa Yawe gita ta vlaŋtá zwaŋ ta Dawuda, zwaŋ ya nda ɗifil ŋa gay ni ta mgham ta ghəŋa na ndəghata mnduha na! » kaʼa.

²² Ka ghunaftá Hiram ta mndu ŋa zlghanaftá wi ta Salumuŋ, kaʼa mantsa: « Nda sna yu ta tsa tsghatá lwa gha ŋa ɗa ya. Dzaʼa magay yu ta inda skwi ndanaŋ ka ta ghəŋa udza sedra, nda udza bərus ya.

²³ Dzaʼa hlaga hla kwalvaha ɗa daga ta ghwá Ləvanuŋ ha ta wa drəf, dzaʼa habaf haba yu, ka tsəghaghafta nda ta drəf, ha da vli ya dzaʼa ɗikwaɗifta ka. Hada dzaʼa palata yu ŋa hlay gha. Kagha ya guli, skwi ta ndan yu ná, vlay gha ta skwa zay ŋa həga ɗa, » kaʼa.

²⁴ Mantsa tama, ka vlaŋtá Hiram ta Salumuŋ ta udzuha sedra nda udzuha bərus, taɓta ya kumaŋ tsi.

²⁵ Salumuŋ ya guli, ka vlaŋtá tsi ta Hiram ta buhwa alkama dəmbuʼ mkuʼ mbsak (60.000), nda litəra rɗa zaytuŋ ghenen dəmbuʼ tghas (8.000) ŋa zay ga taŋ. Tsaya skwi ta vlu Salumuŋ ŋa Hiram inda vaku.

²⁶ Vlaŋ vla Yawe ta ɗifil ta Salumuŋ, manda ya si tanaf tsi ta imi ta sləməŋ ya. Mamu zɗaku katakata mataba i Hiram nda Salumuŋ. Ka dzraftá hahəŋ his his ta wi.

Mblafta Salumuŋ ta mnduha ŋa maga slna həga Lazglafta

²⁷ Ka hlaftá mgham Salumuŋ mataba inda la Israʼila ta mnduha dəmbuʼ hkən mbsak (30.000) ka mbraku ŋa maga slna.

²⁸ Ka ghwanaftá tsi ta mnduha dəmbuʼ ghwaŋ (10.000) da Ləvanuŋ, inda tili, ka mbaɗa vgha. Tili turtuk ya, ma Ləvanuŋ həŋ, tili his ya, mintgha taŋ həŋ. Aduniram mali ta ghəŋa tsa mnduha ya.

²⁹ Ka pghatá Salumuŋ ŋa tsakwa skwi ta mnduha dəmbuʼ ndəfáŋ mbsak (70.000), nda mnduha dəmbuʼ tghas mbsak (80.000) ŋa ratsa palaha ta ghwá.

³⁰ Dəmbuʼ hkən nda hkən dərmək (3.300) mbsaka maliha zabap Salumuŋ ŋa ngha slna ta mag tsa mnduha ya.

³¹ Ka mnaftá mgham ta raratsagapta ka fifiɗatá palaha dagala dagala, ɗina ɗina, ŋa tughwa həga Lazglafta.

³² Ka nzatá mnduha Salumuŋ, nda mnduha Hiram, nda mnduha la Geval, ka fifiɗay. Ka papayaftá həŋ guli ta udzuha nda palaha ŋa ba həga Lazglafta.