1Mgh 2 - Hdi

Kwanaha gwaɗa mnanaf Dawuda ta Salumuŋ

¹ Ndusagaghata fitika mtakwa Dawuda, ka mnanaftá tsi ta sləkaɗa ni ta zwaŋa ni Salumuŋ, kaʼa mantsa:

² « Nda sliʼa yu manda ya ta sliʼi dər wa ta ghəŋa haɗik, ka ŋavata ka, ka nzata ka ka zgun zgun!

³ Ka ŋanata ka ta skwiha ya mnaghaf Yawe, Lazglafta gha, ka mbaɗa ka ta mbaɗa ta tviha ni, ka maga ka ta slna nda gwaɗaha ni, nda zlahuha ni, nda tva tagha skwa ni, nda tva dva mnda ni, manda ya nda vinda ma zlaha Musa. Mantsa tama dzaʼa katsay ka ta inda skwi dzaʼa ka magay nda inda vli dzaʼa ka da lagha,

⁴ kada hɗanamta Yawe ta gwaɗaha ya mniha tsi: “Ka ta nghap ngha zivira gha ka nzakwa taŋ, ka mbaɗa nda zɗaku ta kəma ɗa, nda hya hya ŋuɗufa taŋ, nda kɗavakta hafa taŋ, mantsa, haɗ ka dzaʼa pɗata ɗekɗek ta ŋa gha mndu ta dughurukwa ga mghama la Israʼila wa.”

⁵ Ta ghəŋa tsa, nda sna ka ta skwi magiha Yuʼav, zwaŋa Tseruya, skwi magana tsi ta maliha his mataba gwal vula la Israʼila, i Avner, zwaŋa Ner, nda Ghamasa, zwaŋa Yeter: Ka pslatá tsi ta həŋ, ka pghiŋtá tsi ma fitika nzakw ma zɗaku ta us, manda skwi ma vla vulu, ka magaftá tsi ta us ta ɓanava mista ni nda ɓaɓah ma səla ni.

⁶ Ka maganata ka manda ya dzaʼa mnaghata ɗifila gha, ama yaha ka da zlanata ka laghwa ni da haɗik ma zɗaku, ma halaku.

⁷ Zwana Barzilay mnda la Gilghat ya, ka maga ka ta zɗaku ŋa taŋ. Mbəɗam mbəɗa ta həŋ mataba gwal ta za skwi ta kuwata ɗafa ga mgham, kabga magiha maga həŋ ta zɗaku, ma hwaya ɗa da zwaŋama gha Avsalum.

⁸ Ama ka fafta ka ta iri ta Simghi, zwaŋa Geraʼ, mnda la Biŋyamiŋ ma Bahurim ya. Mnaf mna ta gwaɗa ksiʼi katakata ta iʼi ma sliʼa ɗa da Mahanayim, ama ka laha tsi da guyaku nda iʼi ma Yardeŋ, ka waɗanatá yu guli nda hga Yawe kazlay na: “Haɗ yu dzaʼa dzatá kagha nda kafay wu,” kaʼa.

⁹ Ndanana, yaha ka da nghay manda mndu kul haɗ dmakwa ni, kabga mndu nda ɗifil ma ghəŋa ni ka, dzaʼa nda sna ka ta skwi dzaʼa ka da maganata. Dər ki halata ni, ka kladata ka ta htsiŋa ni da haɗik, » kaʼa.

Laghwa Dawuda da dzidzíha ni

¹⁰ Ka laghu Dawuda da dzidzíha ni, ka paɗamtá lu ma Ursalima luwa Dawuda.

¹¹ Fwaɗ mbsak vakwa Dawuda ta gá mgham ta ghəŋa la Israʼila. Ndəfáŋ vakwa ni ta gá mgham ma Hevruŋ, hkən mbsak hkən mida vakwa ni ma Ursalima.

¹² Ka nzatá Salumuŋ ta dughurukwa ga mghama da ni Dawuda, daga ma tsa fitik ya dihatá ga mghama ni.

Dzatá Aduniya

¹³ Ma sana fitik, ka lagha Aduniya zwaŋa Hagit slanaghatá Batʼseva, ma ni ma Salumuŋ. Ka tsa marakw ya nda tsi mantsa: « Ɗughwana na mbaɗa gha na ra? » kaʼa. Kaʼa mantsa: « Aŋi, » kaʼa.

¹⁴ Kaʼa guli mantsa: « Mamu yu nda gwaɗa turtuk ŋa mnaghata, » kaʼa. « Mna! » ka tsa marakw ya.

¹⁵ Kaʼa mantsa: « Nda sna vərɗa kagha kazlay na, má ŋa ɗa na ga mgham na kəʼa, si mista ɗa inda la Israʼila si má ŋa nzakwa ɗa ka mgham. Ama ka mbəɗaghutá tsa ga mgham ya ta vgha, ka laghwi da zwaŋama ɗa, kabga Yawe ta thanavata.

¹⁶ Ndanana, mamu yu nda ɗaway turtuk da kagha, ta graftá yu ná, pyafta a ka ta iʼi wu, » kaʼa. Ka tsa marakw ya zlghanaftá wi mantsa: « Mna! » kaʼa.

¹⁷ Kaʼa mantsa: « Kdəkkdək, mnana mna ta mgham Salumuŋ, pyafta a ta kagha wu, ka vlihata tsi ka marakw ta Avisag, makwa la Sunem ya, » kaʼa.

¹⁸ Ka Batʼseva mantsa: « Aray! Dzaʼa mnana mna vərɗa iʼi ta tsa gwaɗa gha ya ta mgham, » kaʼa.

¹⁹ Ka sliʼaftá Batʼseva ka lam da mgham Salumuŋ ŋa gwaɗa ma vla Aduniya. Ka sliʼaftá mgham da gmay, ka tsəlɓata ta kəma ni. Tahula tsa ka nzatá tsi ta dughurukwa ni, fanaha ta sana dughuruk ta ma ni, ka nzatá tsi nda ga zeghwa ni.

²⁰ Ka tsa marakw ya mantsa: « Ta kumay yu ta ɗawaŋtá skwi kiʼa da kagha, ta grafta yu ná, pyafta a ka ta iʼi wu, » kaʼa. Ka mgham nda tsi mantsa: « Ɗawa, ma ɗa! Haɗ yu dzaʼa pyaftá kagha wu, » kaʼa.

²¹ Kaʼa mantsa: « Dzaʼa laviŋ lava lu ta vlata ka marakw ta Avisag makwa la Sunem ŋa zwaŋama gha Aduniya ra? » kaʼa.

²² Ka mgham Salumuŋ zlghanaftá wi ta ma ni mantsa: « Kabgawu kəl ka ka ɗawa Avisag makwa la Sunem ŋa Aduniya na? Ɗawa ɓa ta ga mgham ŋa ni, ya wya mala ɗa tsi ya! Ɗawa ŋa ni, ya wya hbinis hba i Aviyatar mnda dra skwi ŋa Lazglafta, nda Yuʼav, zwaŋa Tseruya ta huta ya! » kaʼa.

²³ Ka waɗatá mgham Salumuŋ nda hga Yawe, kaʼa mantsa: « Ka tsiɗagha tsa Lazglafta ta guma katakata, ka nda hafa ni a dzaʼa plata Aduniya ta tsa gwaɗa ya!

²⁴ Ndanana, ta waɗa waɗa yu nda hga Yawe nda hafu mida, ta dihihata ka nzaɗifta ta dughurukwa ga mghama da ɗa Dawuda, ka fatá mndəra ini ka həga ga mgham manda ya taf tsi ta imi ta sləməŋ. Gita u na, dzaʼa dzatá Aduniya lu, » kaʼa.

²⁵ Ka ghunaftá mgham Salumuŋ ta Benaya, zwaŋa Yəhuyada, ka valaftá tsi ta Aduniya ka dzata, ka mtutá Aduniya.

Ghəzliŋtá Aviyatar ma slna ni

²⁶ Ka mgham nda Aviyatar mnda dra skwi ŋa Lazglafta mantsa: « La dzagha gha ma Ghanatut. Dər má nda ra ka prək ka dzata mndani, haɗ yu ta dzaghata gita wu, kabga kagha si ta kla akwata mgham Yawe ta kəma da ɗa Dawuda, ka suʼuwaftá ka kawadaga nda tsi ta inda skwi suʼuwaf tsi, » kaʼa.

²⁷ Ka ghəzliŋtá Salumuŋ ta Aviyatar ma slna dra skwi ŋa Yawe ŋa hɗamtá gwaɗa Yawe ma Silu ta ghəŋa həga ga Iliya.

Dzatá Yuʼav

²⁸ Si mista Aduniya na Yuʼav, ama ka kwalaghutá tsi ta dzaʼa mista Avsalum. Mantsa tama, snaŋta ni ta tsa gwaɗa ya, ka hwayaghatá tsi ɗifaghuta ma həga tumpula Yawe, ka kasavata ta duliha gwir.

²⁹ Ka mnanatá lu ta mgham Salumuŋ: « Ɗifaghu ɗifa Yuʼav ma həga tumpula Yawe, waʼa ta vata gwir, » ka lu. Ka mnanaftá Salumuŋ ta Benaya, zwaŋa Yəhuyada kazlay na: « La, ka valafta ka tida! » kaʼa.

³⁰ Ka lagha Benaya da vla həga tumpula Yawe, kaʼa nda Yuʼav mantsa: « Sab sa! Mantsa ka mgham mnafta, » kaʼa. Ama ka Yuʼav mantsa: « Lab a yu wu! Hadna ta mtuta yu, » kaʼa. Ka mnanatá Benaya ta mgham ta gwaɗa mna Yuʼav nda skwi zlghanaf tsi ta wa ni.

³¹ Ka mgham nda Benaya mantsa: « Maga maga manda ya mna tsi, dza dza, ka lamta ka. Mantsa ya dzaʼa kliŋta ka ta vata iʼi nda həga ga da ɗa ta usa mnduha kul haɗ dmakwa taŋ psla Yuʼav ka bətbət.

³² Dzaʼa vranaf vra Yawe ta usa ni ta ghəŋa ni, kabga valafta ni ta mnduha his malaghu tɗukwata həŋ nda ŋərmata həŋ ka tsatsi, ka pslatá tsi ta həŋ nda kafay kul snaŋtá Dawuda, da ɗa ya. Ta gwaɗ ta ghəŋa i Avner, zwaŋa Ner, mala gwal vula la Israʼila, nda Ghamasa, zwaŋa Yeter, mala gwal vula la Yuda yu ta tsa gwaɗa ya.

³³ Ka la usa taŋ ta ghəŋa Yuʼav, nda ya ta ghəŋa zivira ni ŋa ɗekɗek, ama ŋa Dawuda, nda zivira ni, nda la ga taŋ, nda dughurukwa ga mghama ni, dzaʼa mamu zɗaku ŋa ɗekɗek daga da Yawe, » kaʼa.

³⁴ Ka laf Benaya, zwaŋa Yəhuyada ka valafta ta Yuʼav, ka dzata. Ka lamtá lu ta Yuʼav ma vwaha ni ta hula luwa.

³⁵ Ka famtá mgham ta Benaya zwaŋa Yəhuyada ma vla Yuʼav ka mali ta ghəŋa gwal vulu, famha guli ta Tsaduk mnda dra skwi ŋa Lazglafta ma vla Aviyatar.

Dzatá Simghi

³⁶ Ka hgaftá mgham ta Simghi, kaʼa nda tsi mantsa: « Baf ba ta həga gha ma Ursalima, ka nzata ka ma luwa, haɗ ka dzaʼa labi ŋa dzaʼa dər diga tsi wa.

³⁷ Ka baɗ sana fitik, ka lab la ka, ka tsughwaɗaptá lika Kidruŋ, ka snaŋta ka kazlay na nda mta ka kəʼa, dguv ta ghəŋa gha usa gha, » kaʼa.

³⁸ Ka Simghi nda mgham mantsa: « Zɗa tsa gwaɗa ya. Manda ya mna rveri mghama ɗa, mantsa ya dzaʼa maga maga kwalva gha, » kaʼa. Ka nzəɗavatá Simghi gerger ma Ursalima.

³⁹ Ama ma kɗavakta vaku hkən, ka hwayaghutá vuʼaha Simghi his da Ahis, zwaŋa Maghaha, mghama Gat. Ka lagha lu da mnanata: « Waʼa vuʼaha gha ma Gat, » ka lu nda tsi.

⁴⁰ Ka sliʼaftá Simghi, ka hbanavatá tsi ta vgha ta kəɗiha ni, ka laghu tsi da Ahis ma Gat, da zba vuʼaha ni. Laba ni, ka vraganaptá tsi ta vuʼaha ni ma Gat.

⁴¹ Ka mnanatá lu ta Salumuŋ kazlay si sliʼaf sliʼa Simghi ma Ursalima ka laghu da Gat, ka vragaghatá tsi kəʼa.

⁴² Ka hgaftá mgham ta Simghi, kaʼa nda tsi mantsa: « Fama a yu ta kagha da waɗata nda hga Yawe kazlay na yaha ka da labi ma luwa kəʼa kay ra? Mna gha a yu kazlay na: “Baɗ da lab ka ma luwa ŋa dzaʼa dər diga tsi, ka snaŋta ka kazlay na dzaʼa nda mta ka kəʼa” kay ra? Si mniha a ka kazlay: “Zɗa tsa gwaɗa ya, nda sna yu kəʼa” kay ra?

⁴³ Kabgawu kwal ka snatá tsa waɗu waɗa ka ta kəma Yawe, nda tsa skwi mnaghaf yu ya ɓa? » kaʼa.

⁴⁴ Ka mgham nda Simghi guli mantsa: « Nda sna ka, nda sna ŋuɗufa gha ta inda ghwaɗaka skwi magana ka ta da ɗa, Dawuda. Dzaʼa vraghafta ta ghəŋa gha Yawe ta sida gha guli.

⁴⁵ Ama dzaʼa nzakway tfa wi ta ghəŋa mgham Salumuŋ. Dzaʼa dihava diha dughurukwa ga mghama Dawuda ta kəma Yawe ŋa ɗekɗek, » kaʼa.

⁴⁶ Ka mnanaftá mgham ta Benaya, zwaŋa Yəhuyada ta dzaʼa dzatá Simghi. Ka laghu tsi dzatá. Daga baɗ tsa, dihatá tsa ga mgham ya ma dzva Salumuŋ.