Zuize 19 - ꞌRe Ihâimana Uꞌâsi Mono Zadawa Wasuꞌu

Levita wasu'u, duré pi'õ imro prã, tãma 're ihâimana mono wasu'u me

¹ Tawamhã taha wahu mono na Izaraéu nhihudu norĩ si'apito ãna hã te 're hâimana za'ra. Tahawa, te nimahã levita si'aibâ romhâ na Efraĩhĩ te ti'ai ãma ẽne 're ihâimana mono niwĩmhã 're sãmra. Ta hã ma tô Belẽ hawimhã, Zuda na rowamri hawimhã imro prã za tãma 're ihâimana mono da hã sima 'mai'ãwisi.

² Tane nherẽ, ma tô pi'õ hã aibâ aimawi na tiwi 're hâimana. Tahawa Belẽ ãma timama nhorõwa u, ma tô apâ tiwi mo. Morĩ wamhã, tame ma tô maparane si'uiwa na a'amo na tiwi nhamra a'â.

³ Tawamhã aibâ Belẽ u isarina morĩ da, ma tô sima rowairébé, te te sadawa pibu da, apâ isiré morĩ da. Tahawa, tite romhuri'wai me oto ne wamhã, ma tô awaru po'repore hã siré saprõni zahuré. Ãhã wa, azarudu ma tô timama nhorõwa u hã timro si 'mazé. Tawamhã azarutu mama hã levita te te 'madâ'â wamhã, ma tô pẽ'ẽ to sina ti'â.

⁴ Tahawa isõrõwa 're, hâimana da, ma tô tãma tinha. Tawamhã tame si'ubdatõ bâtâ na ma tô i'ratamhã tihâiba. Ãne ma tô timro me nasi oto iré tisa zahuré. Ma tô duré nasi siré ãma ti'awẽ zahuré.

⁵ Tawamhã maparane si'uiwa na bâdâ ãma imorĩ ãma awẽ wi utu zahuré wamhã, ma tô oto aibâ sima rob'ubumro, morĩ da apâ. Tane nherẽ, te azarutu mama hã levita ma tinha ãne: — Aiwatobro wana ré, a'â marĩ hã 'mai'rẽne, asiptete na aimorĩ da, mrab ãna. Taha parip si te za oto aimo.

⁶ Tawamhã aibâ norĩ, sa da duré siré te te simihâri zahuré da ma tô siré aimasisi. Tahawa, azarutu mama te duré ãne tãma tinha: — Ĩzawi na hã ma'ãpé duré a'â ai'ãma mara zahu, asima romhu'u da.

⁷ Tawamhã aibâ ma tô oto wahudu, watobro da hã. Tane nherẽ, azarutu mama ma tô nasi tãma tinha, a'â sãmra da tô. Ãne wa, ma tô levita ãma hã duré a'â ti'awẽ zahu.

⁸ Tawamhã imrotõ bâtâ ãma, ma tô robza'rã ré aré duré udu, morĩ da hã. Tane nherẽ, azarutu mama ma tô duré ãne tiwi waptẽ: — Ĩzawi na hã a'â duré asa na, bâtâ u si aimorĩ da. Ãhã wa, ma tô duré a'â siré tisa zahuré, aibâ norĩ hã.

⁹ Tawamhã aibâ, azarutu me duré tãma iromhuri'wai me si'aba'ré da, oto wairébé wamhã, ma tô imaprewa hã tãma tinha ãne: — Ma'ãpé 'madâ'â! Te za oto timara. Tahawa wẽ di, a'â duré ai'ãma i'awẽ da hã. Aimorĩ da wamhã, ãhã na zahadu ré te za aiwi timara. A'â duré aihâimana, asima romhu'u zahu da. Awẽpsi te za robza'rã ré ai'u, apâ asõrõwa u aimorĩ da hã.

^10-11 Tane nherẽ, levita ãma imara zahu da hã te te oto sima wẽ õ di. Tahawa timro prãi me hã te oto tineb zahuré. Tahawa, te duré tite awaru po'repore norĩ hã siré saprõni zahuré. Tawamhã oto imarazéb u, ma tô Zebusi na 'ri nho'õmo nhisi u hã aimasisi zahuré, Zeruzalẽ na isisi amo ihâimana u. Tawamhã te romhuri'wa tinhib'ihâ'a ma tinha ãne: — E marĩ wa, ã hã 'rinho'u zebuzeu norĩ te ãma hã wanhimizahâri za'ra õ di, a'â wa'ãma awẽ za'ra da ãme.

¹² Tane nherẽ, isib'ihâ'a ma te ãma sada'â ãne: — Mare di, ãmemhã wanhimizahâri za'ra õ di za, Izaraéu nhihudu norĩ 'ri nho'õmo wa, 're ihâimana za'ra mono õ ãma hã. Zibea na 'ri nho'õmo nhisi u si, wa za wamorĩ na hã ãma uzusi za'ra ni a'â.

¹³ Tô wẽ di, a'â suru na wasi'aba'ré da hã Zibea ãma wanhotõ za'ra da, niha wamhã, Rama ãma wanhotõ za'ra da.

¹⁴ Tawamhã zebuzeu na te te ro'rahâri za'ra wamhã, ma tô timorĩ na uzusi za'ra. Ãhã wa, ma tô oto bâdâ hã tiwi tizébré za'ra. Zibea u isihutuzéb ãma, Bẽzamihĩ nhihudu norĩ te 'ri nho'õmo u hã.

¹⁵ Tahawa, duré bâdâdi hawimhã ma tô apa za'ra, 'ri nho'õmo ãma a'â ãma awẽ za'ra da. Tawamhã levita, 're idasisõpẽtẽ pese za'ra mono zéb ãma ma tô nhamra. Tane nherẽ, ni'wa hã sô hârâ za'ra õ di, isõrõwa ãma sõtõ za'ra da hã.

¹⁶ Tawamhã taha bâtâ na ihi hã ma tô ro'razâ, 'ri u tiburu hawi imorĩ hã. Ta hã Efraĩhĩ nhipti'ai ãma ẽtẽ ãma aré 're ihâimana mono. Tane nherẽ, te oto ta hã Zibea ãma 're sãmra. (Tame te Bẽzamihĩ nhihudu norĩ hã 're hâimana za'ra.)

¹⁷ Tawamhã ihi 're idasisõpẽtẽ pese za'ra mono zéb ãma romhâ hawi we imorĩ te te 'madâ'â wamhã, te sadanha ãne: — E ma hawimhã a hã. E momo te duré aimo.

¹⁸ Tawamhã levita ma te sada'â ãne: — Belẽ hawi, Zuda na rowamri hawimhã wa tô romhâ u wei mo wa hã, Efraĩhĩ nhipti'ai ãma ẽne 're isa mono ãma 're ĩhâimana mono zéb u. Wa tô aré mo, Belẽ u hã. Tane nherẽ, wa ãhã na oto apâ mo ĩnhorõwa u. Tane nherẽ, ã bâtâ 'remhã ni'wa hã ĩzô hârâ õ di, a'â isõrõwa ãma ĩ'ãma i'awẽ da hã.

¹⁹ Amnho teihi norĩ, dui me hã te wama tihâimana siromo za'ra, awaru po'repore sazéb da hã. I'u'ẽtẽ wapu norĩ hã uwa 'rãi wa'u isé me te duré wama tihâimana za'ra, ĩma da hã, ĩmro prã ma da hã, duré ĩma romhuri'wai ma da hã. Uburé te marĩ hã wama tihâimana za'ra, wawi sô robaba za'ra ãna.

²⁰ Tawamhã te ihi tãma tinha ãne: — We ĩsiré ai'aba'réi aba. Wa za aiwaibui wẽ wa'wa wa hã, ĩnhorõwa u. Wa za duré ai'ãma ĩsi'madâ'â za'ra wa'wa. Tahawa ma'ãpé ĩzawi na hã ai'ãma awẽ za'ra wa'aba tõ, 're idasisõpẽtẽ pese za'ra mono zéb ãma hã.

²¹ Tawamhã tinhorõwa u te te oto simroi mono wamhã, ma tô awaru po'repore ma isa hã tãma sõmri zahuré. Duré za isõrõwa ãma isimi'wara norĩ hã ma tô apara upsõ. Taha pari ma tô duré isihutu norĩ hã tisa tihu, te te simihâri za'ra sina.

²² Tawamhã pẽ'ẽ to sina te te sima robzanhamri za'ra ré, ma tô ni'wam norĩ aibâ iwasédé 'ri nho'õmo ãma 're ihâimana za'ra mono norĩ hã 'ri siwi uirĩ, iré za'ra. Tahawa, ta norĩ ma tô nasi siwi 'ridawa ta'a. Taha sina ma tô ihi hã duré nasi siwi 'mahâ ãne: — Wei wama wazere za'ra na rob u, aibâ asõrõwa u we isébré hã! Wa wasima wẽ za'ra ni, taha ãma wahâimana za'ra da.

²³ Tawamhã ihi rob u ma tô itẽme tiwatobro za'ra. Watobro wamhã, ma tô ãne tãma nharĩ za'ra: — Ĩsiwaihu'u norĩ, mare di! Ĩzawi na hã ma'ãpé iwasété uptabi hã 'manharĩ za'ra wa'aba tõ, aibâ ĩnhorõwa u iwisi ma, sõtõ da.

²⁴ Ni'ã. Ma'ãpé asiwi 'madâ'â aba, õ hã! Ãhãta te ĩ'ra sipi'õ hâiba ubuni ãmemhã tihâiba. Duré õhõ mro prã zama te ãmemhã tihâiba i'rata. Ã norĩ si wa za rob u ãma aima za'ra wa'aba sani, a norĩ wa'wa hã marĩ asima iwẽ na ãma 'manharĩ za'ra wa'aba da. Ãne nherẽ, aibâ ãma marĩ iwasédé hã rowazéb ãna asiwi 'manharĩ aba õ di za!

²⁵ Tane nherẽ, te te sima wẽ za'ra õ di, te te iwapari za'ra da hã. Tawamhã levita, timro prã te te pa'âri wamhã, ma tô rob u tãma wazere za'ra, te te tãma hâiba nhomri za'ra da. Tahawa, tinhiptede te te sada 'manharĩ za'ra wa, ma tô marabâre marĩ hã ãma 'manharĩ za'ra. Awẽ u si ma tô tawamhã tãma marẽme za'ra.

²⁶ Tawamhã awẽ wi oto pi'õ morĩ wamhã, ma tô 'ri 're imro iwa inomrozé 'ridawa nho'remhã waptãrã. Tawamhã tamem haré ma tô nomro, ãma irowa'a pese zéb u.

²⁷ Tawamhã imro awẽm na ma tô udu, timorĩ na te te oto duré ãma uzusi da. Tahawa te te oto 'ridawa wamhã, ma tô imro prã aré tãma ihâiba hã 'ridawa nho're iwaptã hã 'madâ, sib'rata nomro haré 'ridawa na'rata tétézé wede hã isimi'rãmi u.

²⁸ Tawamhã te 'mahâ ãne: — Aiwahutu! Wanem hâ! Tane nherẽ, te te sada'âbâ õ di. Tahawa ihâiba ma tô awaru po'repore nhisiwi simi'rãmi na tihi. Taha pari ma tô oto tinhorõwa u iré saprõ.

²⁹ Tawamhã tinhorõwa u oto wisi wamhã, ma tô sib'ézé hã ti'â. Taha na ma tô timro prã hã te te hâiba wa'õtõ, 12 na ihâiba wa'õtõ na. Taha pari ma tô ihâiba wa'õno hã, Izaraéu nhihudu norĩ wamri mono bâ ãma ropé.

³⁰ Tawamhã ãne hã uburé te te siwi 'madâ'â wamhã, ma tô ãne sima nharĩ za'ra: — Niwamhã ãne hã wa te wasiwi i'madâ'â waihu'u õ! Duré niwamhã ãne hã ihâimana õ, Izaraéu nhihudu norĩ Ezitu hawi iwairébé na'rata zém hawimhã! Tahawa ma'ãpé ãma rosa'rata za'ra wa'aba! E marĩ, wa za bété ãhã na awa'awi na hã wasiwi 'manharĩ ni.