Zona 2 - ꞌRe Ihâimana Uꞌâsi Mono Zadawa Wasuꞌu

Zona te te irowaptẽrẽzé wasu'u

¹ Uburé Danhib'apito tite 'Re ihâimana u'âsi mono ma, te Zona hã mre, tepe waihõ 're, ãne:

² “Uburé Danhib'apito, 'Re ihâimana u'âsi mono, iwasétézém na te robzépata wa, wa tô ãma aiwi rowaptẽ, ĩpawaptob da. Taha wa, ma tô we ãma ĩzada'â. Adâ 're ihâimana za'ra mono zém hawi, wa tô ãma aiwi rowaptẽ, ĩmreme 'rãihâ na, ĩpawaptob da. Taha zarina, ma tô iwapa, ĩmreme hã.

³ A hã ma tô ĩme, â 'rehâ uptabi u. Tame ma tô â hã ĩ'ubu uburé. Duré uburé ate âsisasi si nhiptete zama ma tô ĩhâiba upsi.

⁴ Wa tô aré rosa'rata, asisiti ĩzatõrĩzém na hã atõmo nhiti. Duré wa tô aré rosa'rata, asib'ri iwazéb zahi iwẽ uptabi za te i'madâ'â zahu õ na hã apâ.

⁵ “Â sisasi hã ma tô ĩhâiba upsibi pese, te te ĩ'mazébré da. Duré wesu ne hã â 're, 're isimasa mono norĩ hã ma tô ĩ'rã zama siwi ubu.

⁶ Wa tô duré pi'reba wara, ẽtẽ'rãihâ nhana'rata u hã. Duré ti'ai ãma 'ridawa za'ẽne sitob u'âsi 're isa mono u zama wa tô duré wara, pi'rebamhã. Tane nherẽ, A hã Ĩnhib'apito 'Re ihâimana u'âsi mono, ma tô ĩnho'reptu, ĩdâ'âzé wi.

⁷ Ĩdâ'âzéb u aré oto ĩhâimana wamhã, wa tô ai'ãma po'repuru, Uburé Danhib'apito ãma hã. Tawamhã ãma aima ĩmremezé hã ma tô ãma atẽme wi, 're i'aihâimana mono zéb u, 'ri hã iwazéb zahi iwẽ uptabi u hã.

⁸ “Romhâibarĩ hã marĩ dai õ nherẽ, ãma 're iwata za'ra mono norĩ hã ma tô airẽme za'ra, ai'ãma tinhimizaze za'ra zém na hã.

⁹ Tane nherẽ, wa hã wa za ai'ãma 're ĩwata u'âsi, ĩnho're na hã. Wa za ĩnhimizama zata na zama aima 're ĩnhopru. Wa za duré aima ãma uwaimra, te aima iropisutuzé hã. E marĩ wa. 'Re ida'anho'reptui mono zé hã aihawip si dâ'âsina, Uburé Danhib'apito.”

¹⁰ Tawamhã Uburé Danhib'apito hã te tinha, tepe za'ẽtẽ ma, Zonahã na so'o'o da, supara'ré ãma.