Zenezi 5 - ꞌRe Ihâimana Uꞌâsi Mono Zadawa Wasuꞌu

Adãhã nhihudu norĩ wasu'u

¹ Ã hã rob'ui'éré, Adãhã nhihudu norĩ za'ratazém na. 'Re ihâimana u'âsi mono, a'uwẽ te te apoto mono wamhã, ma tô tisine da hã ab'manha.

² Tawamhã aibâ na duré pi'õ na ma tô ab'manha. Duré iwẽ te te tãma 're apisutu mono wamhã, ma tô a'uwẽ na wamri za'ra.

³ Tawamhã duré Adã 130 na ãma iwahub ãma, ma tô i'ra isine uptabi hã tãma podo. Tawamhã ta hã ma tô sisi, Seti na.

⁴ Taha pari Adã, 800 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me, tãma poto za'ra pari,

⁵ ma tô oto dârâ, 930 na ãma iwahub ãma.

⁶ Tawamhã duré Seti 105 na ãma iwahu te te i'manharĩ ãma, ma tô i'ra Enosi na isisi hã tãma podo.

⁷ Duré taha parimhã Seti hã 807 na ãma iwahum na hã ma tô 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

⁸ ma tô duré oto dârâ, 912 na ãma iwahub ãma.

⁹ Tawamhã Enosihi ãma 90 na ãma iwahub ãma, ma tô i'ra Caĩna na isisi hã tãma podo.

¹⁰ Taha parimhã Enosi 815 na ãma iwahum na hã ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

¹¹ ma tô oto dârâ, 905 na ãma iwahub ãma.

¹² Tawamhã duré Caĩnahã ãma 70 na ãma iwahub ãma, ma tô i'ra Ma'alaléu na isisi hã duré tãma podo.

¹³ Taha parimhã Caĩna, 840 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

¹⁴ ma tô oto dârâ, 910 na ãma iwahub ãma.

¹⁵ Tawamhã Ma'alaléu ãma 75 na ãma iwahub ãma, ma tô i'ra Zaredi na isisi hã tãma podo.

¹⁶ Taha parimhã Ma'alaléu ãma 830 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

¹⁷ ma tô oto dârâ, 895 na ãma iwahub ãma.

¹⁸ Tawamhã duré Zaredihi ãma 162 na ãma iwahub ãma, ma tô i'ra Enoqui na isisi hã duré tãma podo.

¹⁹ Taha parimhã Zaredihi ãma 800 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

²⁰ ma tô duré oto dârâ, 962 na ãma iwahub ãma.

²¹ Tawamhã Enoquihi ãma 65 na ãma iwahub ãma, ma tô i'ra Matuzarẽ na isisi hã tãma podo.

²² Taha parimhã Enoqui, 300 na ãma iwahum na ma tô 'Re ihâimana u'âsi mono ãma 're hâimana. Ma tô duré i'ra si'aibâ norĩ, i'ra sipi'õ norĩ me tãma tipoto za'ra.

²³ Tawamhã Enoqui, 365 na ãma iwahum na, ma tô duré 're hâimana.

²⁴ Tawamhã duré õne u'â, ma tô 'Re ihâimana u'âsi mono ãma 're mo. Tahawa nimahã bâtâ na ma tô oto sô tirobaba. E marĩ wa. 'Re ihâimana u'âsi mono, sitẽme te te oto âri wa.

²⁵ Tawamhã Matuzarẽ ãma 187 na iwahub ãma, ma tô i'ra Rameti na isisi hã duré tãma podo.

²⁶ Taha parimhã Matuzarẽ ãma 782 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

²⁷ ma tô oto dârâ, 969 na ãma iwahub ãma.

²⁸ Tawamhã duré Rametihi ãma 182 na ãma iwahub ãma, ma tô i'ra hã tãma podo.

²⁹ Tawamhã te ãne tinha: — Uburé Danhib'apito ti'ai ma, ma tô niha hã pisutu, wasété u'âsi 're sa'wari mono da. Tahawa wanhimiromhuri te pire na wama 're hâimana za'ra. Ãhã nherẽ, ã hã 'watébrémi si te za tihâiba na 're iwawa'utu za'ra mono zéb da hã sina wama wazere za'ra. Tawamhã Rameti, ti'ra hã ma tô sisi, Nowé na.

³⁰ Duré taha parimhã Rametihi ãma 595 na ãma iwahum na, ma tô duré 're hâimana. Tawamhã i'ra si'aibâ norĩ, i'ra sipi'õ norĩ me tãma poto za'ra pari,

³¹ ma tô oto dârâ, 777 na ãma iwahub ãma.

³² Tawamhã duré 500 na ãma iwahu te te i'manharĩ ãma, ma tô Nowéhé ma, si'ubdatõ i'ra tãma tipoto za'ra, ãne isisi za'ra hã: Sẽ, Cã, Zafé.