Zenezi 46 - ꞌRe Ihâimana Uꞌâsi Mono Zadawa Wasuꞌu

Zaco, Ezitu u imorĩzé wasu'u

¹ Tawamhã Zaco, uburé tinhimarĩ ré ma tô oto watobro. Watobro wamhã, ma tô Beseba u hã wi. Tame ma tô imama Izaquihi te, 'Re ihâimana u'âsi mono ma, danhimizama zata na tinhopru, ãma iwatazéb da hã.

² Tawamhã 'Re ihâimana u'âsi mono, taha mara na ma tô sõtõ 'rowim ne tãma tinha. Ãne te tawamhã isisi na hã 'mahâ: — Zaco, Zaco! — E marĩ. Ãhãta wa ãme ĩhâiba. — Ãne ma asa sada'â.

³ Tawamhã 'Re ihâimana u'âsi mono, te ãne tãma tinha: — Wa hã 'Re ihâimana u'âsi mono, aimama te, 'Re ihâimana u'âsi mono na 're ĩhâimana mono. Tahawa aipahi ãna ma'ãpé aimorĩ, Ezitu u hã. Tame wa za asihudu norĩ, ahâ uptabi na sitébré da hã tãma pisutu za'ra, a'uwẽ misi ãma isitom na dama siptete na 're hâimana za'ra mono da.

⁴ Wa hã wa za Ezitu u hã asiré mo. Apâ wa za duré asihudu norĩ hã we te simro, ã hã ti'ai u hã. Tawamhã nimahã na oto asi'ré wamhã, te za ai'ra Zuzé hã asababa tihâiba za.

⁵ Tawamhã Zaco, ma tô Beseba hawimhã oto mo. Wedewara zapore Ezitu te, apito te te sô isatõrĩ na, ma tô i'ra norĩ Zaco hã siwi saprõ. Duré timro norĩ hã, duré ti'ra norĩ isurure hã ma tô te te ãma siwi simro.

⁶ Tawamhã Zaco norĩ, uburé Ezitu u zâmorĩ wamhã, ma tô tite powawẽ norĩ siré te te siwi simro. Duré Cana'ã ãma uburé marĩ te te sima 're isani za'ra mono hã ma tô siré 'wasa.

⁷ Uburé tihawi a'uwẽ norĩ hã ma tô Zaco siré te te simro ã norĩ hã ti'ra si'aibâ norĩ, ti'ra sipi'õ norĩ, tinhihudu si'aibâ norĩ, duré tinhihudu sipi'õ norĩ.

⁸ Ã norĩ hã Izaraéu nhihudu Ezitu u ma tô ai'aba'ré, Zaco, tinhihudu norĩ me, ãne isisi za'ra norĩ me: Rubẽ, Zacoho 'ra poto'rada,

⁹ Rubẽ ti'ra norĩ ãne isisi za'ra norĩ me: Enoqui, Palu, Hezirõ, duré Carmi,

¹⁰ Simiã ti'ra norĩ ãne isisi za'ra norĩ me: Zemu'é, Zami, Oade, Zaquĩ, Zoa, duré Sau, Cana'ã sipi'õ zé're hawi ipodo hã,

¹¹ Levi, ti'ra norĩ ãne isisi za'ra norĩ me: Gésõ, Coate, duré Merari.

¹² Zuda, ti'ra norĩ ãne isisi za'ra norĩ me: Sela, Peresi, duré Zera. (Duré maparane i'ra hâiba amo norĩ hã, Er, duré Ona, Cana'ã ãma tiwi isi'ré zahuré hã.) Duré Peresihi 'ra norĩ hã, Hezirõ, duré Hamul.

¹³ Isaca, ti'ra norĩ ãne isisi za'ra norĩ me: Tola, Pua, Zasube, duré Sĩrõ.

¹⁴ Zébulõ, ti'ra norĩ ãne isisi za'ra norĩ me: Serede, Elõ, duré Zale'eu.

¹⁵ Ã norĩ hã Léiaha zé're hawi Mezopotãmia ãma Zacoho ma, i'ra ipoto za'ra. I'ra sipi'õ te duré pi'õi misi na Dina na isisi hã tãma tihâimana zahuré. Tawamhã Zacoho nhihudu norĩ, Léiaha me hã, timama norĩ me sina sito wamhã, uburé hã 33 na.

¹⁶ Gadi, ti'ra norĩ ãne isisi za'ra norĩ me: Zifi'ã, Hagui, Suni, Esbõ, Eri, Arodi, duré Areli.

¹⁷ Asé, ti'ra norĩ ãne isisi za'ra norĩ me: Imna, Isva, Isvi, Beria, duré ihidiba za'ra ãne isisi hã, Sera na. Duré Beriaha 'ra norĩ ãne isisi za'ra hã: Hébé, duré Malquiel.

¹⁸ Tawamhã duré ã norĩ hã 16 na Zacoho nhihudu, Ziupaha me, Labã, ti'ra Léiaha ma, te te tãma isõmri, tãma iromhuri'wa da.

¹⁹ Raqueu, Zacoho mro zé're hawi i'ra maparane tãma ipoto zahuré nhisi hã ãne: Zuzé, duré Bẽzami.

²⁰ Zuzéhé 'ra norĩ, Asenatihi zé're hawi Ezitu ãma ipoto zahuré hã, Manasé, duré Efraĩ. Ta hã Asenati, sasedoti Potifera, 'ri nho'u Heliopoli na isisi ãma 're ihâimana mono 'ra.

²¹ Bẽzamihĩ 'ra norĩ ãne isisi za'ra hã: Bela, Beque, Asbeu, Gera, Na'ama, Ei, Rosi, Mupĩ, Hupĩ, duré Arde.

²² Ã norĩ hã 14 na ihâiba za'ra, Zacoho nhihudu norĩ, Raqueu me.

²³ Dã, i'ra Husĩ na isisi me.

²⁴ Naftali, i'ra norĩ ãne isisi za'ra norĩ me: Zaze'eu, Guni, Zeze, duré Silẽ.

²⁵ Ã norĩ hã 7 na Zacoho nhihudu norĩ, Biraha me, Labã, ti'ra Raqueu ma tãma iromhuri'wa da, te te tãma isõmri me.

²⁶ Tawamhã Ezitu u Zacoho nhihudu isiré isi'aba'ré norĩ hã 66 na ihâiba za'ra hã, pi'õ norĩ hâiba za'rata ana hã.

²⁷ Tawamhã Zuzéhé 'ra norĩ Ezitu ãma maparane ma tô tipoto zahuré. Ãhã wa Zacoho hawi a'uwẽ norĩ hã, Ezitu u isi'aba'ré norĩ hã 70 na ihâiba za'rata za'ra na.

Zaco norĩ, Ezitu u isihutuzé wasu'u

²⁸ Tawamhã Zaco, ma tô Zudaha ma rob'ru, Zuzéhé tẽme isõwa morĩ da, niha na Gosẽ na romnhisi u tiwisizé hã te te waihu'u da.

²⁹ Tawamhã Zuzéhé ma, awaru na wedewara zapore, da te tãma awasisi parimhã, ma tô oto Gosẽ u hã wara, timama te te sõpẽtẽ da. Ãhã wa, timama titõmo na te te oto 'madâ'â wamhã, ma tô sa'ẽtẽ itẽme wara, te te sawi da. Tahawa, tinho'utu te te âri sina, ma tô ãma aiwa'õi hâ.

³⁰ Tawamhã Zaco, te ãne ti'ra ma tinha: — Wa za oto dârâ ĩsima iwẽ na, ĩtõmo na te ai'ubu 'madâ'â wa oto, duré zahadu aihâiba ré 're i'aihâimana mono na zama te waihu'u wa.

³¹ Taha pari te Zuzé, tisisãnawã norĩ ma, duré timama hawi a'uwẽ norĩ ma tãma nharĩ za'ra ãne: — Ezitu te, apito ma, te rowasu'u da wa za mo, ĩsisãnawã norĩ, duré ĩmama hawi uburé a'uwẽ norĩ Cana'ã ãma aré 're isi'ubumroi mono hã ĩsiré 're hâimana za'ra mono da, we oto isi'aba'ré na te tãma wasu'u za'ra da hã.

³² Ãhã wa, wa za duré danhimizama tébré'wa na hã tãma aiwasu'u za'ra wa'wa, pone'ẽrebâ norĩ duré powawẽ norĩ we asiré isimroi wa'aba mono na, duré uburé marĩ aima 're ihâimana za'ra wa'aba mono we asiré i'wasari aba na zama.

³³ Tawamhã duré apito Fara'o, asô hârâ za'ra wa'aba wa, niha na asimiromhuri za'ra wa'aba zô, te te asadanharĩ za'ra wa'aba wamhã,

³⁴ ãne te za asa ãma tãma iwa'rãmi za'ra wa'wa: “Zahadure ré, wa tô wanhimizama hã wa te 're tébré za'ra, wahi'rata norĩ te te 're iroptébré za'ra mono ne.” Ãne zarina te za tawamhã Gosẽ ãma 're aihâimana za'ra wa'aba mono da hã aima rowairébé za'ra wa'wa, ezipsiu norĩ, pone'ẽrebâ tébré'wa norĩ te te siwi 're 'ruiwapari za'ra mono wa.