Zenezi 45 - ꞌRe Ihâimana Uꞌâsi Mono Zadawa Wasuꞌu

Zuzé, tisisãnawã norĩ ma, oto isiwasu'uzé wasu'u

¹ Tawamhã Zuzé, tite romhuri'wa norĩ nho'a pẽ'ẽzé uptabi nherẽ, oto sitété waihu'u õ di. Tahawa, ma tô mreme 'rãihâ sina satõrĩ za'ra ãne: — Mo oto ã hawimhã uburé aiwairébé aba. Tahawa, ni'wam norĩ ite romhuri'wa hã i'rata 'maihâimana õ di, tisisãnawã norĩ ma, Zuzé siwasu'u ré hã.

² Tawamhã wawa 'rãihâ na ma tô aiwa'õ. Duré ezipsiu norĩ hã ma tô wawai wapari za'ra. Tawamhã apito nhimiromhurizé 'ri u hã ma tô rowasu'u wẽ hã wi.

³ Tawamhã Zuzé, te ãne tisisãnawã norĩ ma oto tãma siwasu'u za'ra: — Wa hã Zuzé. E ĩmama te zahadu hâiba ré 're hâimana. Tawamhã ãne na isisãnawã norĩ, imreme te te wapari za'ra wamhã, ma tô tãma a'rãmi za'ra. Tahawa niha na timreme na te te ãma tãma wa'rãmi waihu'u za'ra õ di.

⁴ Tahawa Zuzé te tãma nharĩ za'ra ãne: — We 'râwi ĩtẽme asina rotété za'ra wa'aba. Ãne wa, oto 'râwi i'rata simasa wamhã, te oto ãne tãma siwasu'u za'ra: — Wa hã Zuzé, anoi wa'wa. Ezitu u, we da te dasiwi ĩzaprõni da, asiwi ĩwede 'wa, dama.

⁵ Ãne nherẽ, aiwi robzei'õ za'ra wa'aba tõ. Duré asimi'manharĩ za'ra wa'aba zém na hã asi'ruiwapari za'ra wa'aba tõ, dama asiwi ĩwede aba na, we ãwa da te dasiwi ĩzaprõni da hã. 'Re ihâimana u'âsi mono, ma tô we asõwab za'ra wa'aba ĩzaprõ, te da'anho'reptu da.

⁶ Maparane ma tô oto da'ãma tiwahu, ropâ mra da te 're isépata za'ra mono na hã. Zahadu 5 na te za duré da'ãma tiwahu, ti'a da te 're iwa'i za'ra mono ãna, duré da te 're iroptehâri za'ra mono ãna hã.

⁷ 'Re ihâimana u'âsi mono, ã hã ti'ai wa'õtõ nho'õmo 're, te asõ'reptu za'ra wa'aba da, duré asihudu norĩ aihawib za'ra wa'aba sidâpâsi 're sitébré za'ra mono da hã, ma tô we asõwab za'ra wa'aba ĩzaprõ.

⁸ Tahawa a norĩ wa'wa we ãwamhã asiwi ĩzatõrĩ aba õ di. 'Re ihâimana u'âsi mono si ma tô we ĩzatõ. Ta hã apito Fara'oho zapari, dama ĩpire na 're ĩhâimana mono da hã, ma tô ĩwapu na 're ĩhâimana mono zém hawimhã oto ĩzarõtõ hâimo. Tahawa wa tô duré oto ti'â, apito nhimiromhurizé 'ri 'rãihâ 're romhuri hã. Ezitu 'remhã danhipai u dama ĩ'rãnho'õmo na hã wa tô oto 're ĩhâimana.

⁹ — Tahawa waptu na sa'ẽtẽ ai'aba'réi wa'aba, ĩmama ma, ãne na tãma ĩzadawa wasu'u za'ra wa'aba da: “Ãne te ai'ra Zuzé hã we aima tinha: 'Re ihâimana u'âsi mono, ma tô Ezitu 're dama ĩ'rãnho'õmo na 're ĩhâimana mono da hã, ĩpisutu. Tahawa te za we ãwamhã aimo, asô rowaptâ'â ãna.

¹⁰ Tawamhã Gosẽ na romnhisi ãma te za ĩ'rata 'râwi 're aihâimana mono za — ai'ra norĩ me, asihudu norĩ me, asimizama pone'ẽrebâ norĩ ré, pone'ẽrebâ zéré uzé norĩ ré, ate powawẽ norĩ ré, uburé marĩ aima 're ihâimana za'ra mono norĩ ré.

¹¹ Zahadu 5 na te za duré da'ãma tiwahu, mrab ãna dahâimana za'ra ré hã. Tawamhã Gosẽ ãma wa za mra hã aima, ai'ra norĩ ma hã, duré asimizama norĩ ma hã te 're sõmri za'ra za. Ãne wamhã, marĩ zô aiwi irowaptâ'â za'ra wa'aba da hã mare di za.”

¹² Tawamhã Zuzé, ma timreme na ãne ãma tãma uzusi za'ra: — Uburé a norĩ wa'aba ma, duré ĩnhosi Bẽzamihĩ ma, aima waihu'u pese za'ra wa'aba di oto, atõmo na asiwi ĩhâiba pibu za'ra wa'aba zéb zarina, wa hã tô Zuzé te aima inharĩ za'ra wa'aba na hã.

¹³ Ma'ãpé ĩmama ma hã tãma ĩwasu'u za'ra wa'aba, Ezitu 're dama ĩpire na 're ĩhâimana mono zém na hã. Duré ma'ãpé uburé marĩ atõmo na i'madâ'â za'ra wa'wa hã tãma wasu'u za'ra wa'aba. Tahawa, ma'ãpé waptu na ai'aba'réi wa'aba, ĩmama hã we ãwa asiwi saprõni aba hâ.

¹⁴ Tawamhã Zuzé, tinhosi Bẽzami tinho'utu ma tô ti'â. Te te âri wamhã, ma tô ãma aiwa'õ. Duré Bẽzami hã tidub'rada asa tinho'utu te te âri sina, ma tô ãma aiwa'õ.

¹⁵ Tawamhã Zuzé zahadu siwa'õi ré, te nasi tinho'utumhã tisisãnawã norĩ hã awaibu wawa sina. Te duré nasi hâiba mono bâ tob'rata hârâ na azawi. Taha pari ma tô oto idub'rata norĩ hã tino norĩ me sima robzanhamri za'ra.

¹⁶ Tawamhã apito nhimiromhurizé 'ri 'rãihâ u, Zuzéhé sisãnawã norĩ isihutuzé wasu'u wisi wamhã, ma tô apito Fara'oho norĩ, ite dama roti'wa norĩ me ãma sima romhu'u za'ra.

¹⁷ Tahawa te apito, Zuzéhé ma tinha ãne: — Ma'ãpé asisãnawã norĩ ma waihu'u za'ra na, tinhimarĩ hã tinhimizama ba nhisiwimhã te te sima wasisi mono da, Cana'ã u apâ iré si'aba'ré da.

¹⁸ Tawamhã te za aimama hã duré isiré ihawi a'uwẽ 're ihâimana za'ra mono norĩ hã we te te ĩtẽme siwi simro. Tawamhã wa za ti'ai wa'õtõ nho'u Ezitu ãma ti'a danhipai u iwẽ uptabi hã tãma sõmri za'ra. Tahawa, dasa iwẽ uptabi na hã te za ãma 're saihuri.

¹⁹ Asisãnawã norĩ ma, te za duré irob'ru, Ezitu hawi awaru po're pore na wedewara zapore te te simroi mono da, tirob u. Tawamhã timro hã, ti'ra norĩ hã, duré timama za'ra hã te za we taha na apâ ãma siwi te te simro.

²⁰ Tinhimarĩ te te irẽme za'ra na hã hâtâ'â za'ra õ di za, Ezitu ti'ai 'remhã za marĩ iwẽ uptabi hã tãma 're hâimana za'ra mono dâ'âsina.

²¹ Tawamhã ãne Zacoho 'ra norĩ hã ma tô siwi 'manha. Zuzé, apito te te tãma i'ruzéb zarina, ma tô ro'wapézém norĩ wedewara zapore hã, duré bâdâdi na ĩsazéb da zama hã tãma sõmri za'ra.

²² Tawamhã da'uza ihâ téb zama ma tô ihâiba mono bâ misi bâtâ na ãma isi'uza za'ra da hã, duré isu tãma sõmri za'ra. Tane nherẽ, Bẽzamihĩ ma si, ma tô 300 na ẽtẽ waipo prã prata na isapotore hã tãma sõmri za'ra. Duré 5 bâtâ na ãma isi'uza mono zéb da hã, ma tô tãma sõmri za'ra, tô 5 na.

²³ Tawamhã duré Zuzé, timama ma da, ma tô awaru po're pore norĩ hã, Ezitu 're marĩ iwẽ uptabi 're ihâimana za'ra mono ré, 10 na iré te te simroi mono da hã tãma rob'ru za'ra. Ma tô duré 10 na tô awaru po're pore norĩ, amnho trigu, duré i'u'ẽtẽ wapu, duré marĩ aimawi bâdâdi na da, imama te te we sisa iduri da hã, tãma rob'ru za'ra.

²⁴ Tawamhã Zuzé tisisãnawã norĩ te te oto satõrĩ za'ra wa, si'aba'ré da hã, ma tô ãne duré tãma roti za'ra: — Asisada asahi za'ra wa'aba ãna bâdâdi na hã ai'aba'réi aba za.

²⁵ Ãne Ezitu hawi ma tô oto wairé. Tawamhã Cana'ã u oto sihutu wamhã, ma tô timama Zacoho nhorõwa u aihutu.

²⁶ Tawamhã te ãne tãma rowasu'u za'ra: — Zuzé hã te zahadu hâiba ré 're hâimana! Ta hã Ezitu ãma te dama i'rãnho'õmo na te te 're da'a'madâ'â. Tawamhã ãne na te te tãma wasu'u za'ra wamhã, ma tô aré Zaco hã simiza'rese'õ hai'utõ. Iwasu'u na te te duré ãma saze waihu'u za'ra õ di.

²⁷ Tane nherẽ, Zuzé uburé tisisãnawã norĩ ma, te te tãma iwaihu'u za'ra zé te te tãma wasu'u za'ra wamhã, duré ro'wapézé wedewara zapore norĩ, apâ Ezitu u te te ãma isimroi mono da, Zuzé te te sô isatõrĩ za'ra zé, te te 'madâ'â za'ra wamhã, ma tô Zaco hã apâ ãma pẽ'ẽhaptete.

²⁸ Tawamhã te Zaco hã sima tinha ãne: — Tane tô. Zahadu te tô ĩ'ra Zuzé hã 're hâimana. Tahawa, ĩma hã wẽ di, zahadu ĩdâ'â õ ré, te i'madâ'â da hã.