Zenezi 44 - ꞌRe Ihâimana Uꞌâsi Mono Zadawa Wasuꞌu

Zuzéhé nhimihâsizé, Bẽzamihĩ te sa'ui 're, da te isẽrẽzé wasu'u

¹ Tawamhã Zuzé, tinhorõwa 'madâ'â'wai ma, ma tô tãma waihu'u ãne: — Aibâ norĩ tite sa'u we te te i'wasari hã te za mram na tãma i'masisi za'ra, isiptete bâ za'ra, te te i'wasari da hã. Tahawa, te za duré ite mono bâ sa'ui wata 'remhã ite za'ra rob'uiprazé apâ tãma iséme mo.

² Taha pari te za ĩnhimihâsizé ẽtẽ waipo prã prata na i'manharĩ hã danhobabati te sa'ui 're tãma isẽ, rob'uiprazém na trigu te te ãma iwa'âbâ za'ra zu. Tawamhã 'ri 'madâ'â'wa ma tô Zuzé uburé te te tãma iwaihu'uzéb zarina 'manha.

³ Tawamhã tite za'ra awaru po're pore ré ma tô Zuzéhé sisãnawã norĩ mararé uptabi wairé, si'aba'ré da oto.

⁴ Tawamhã 'ri nho'õmo hawimhã ma tô oto wairé. Tane nherẽ, zahadu sina pahâ za'ra õ ré, te Zuzé tinhorõwa 'madâ'â'wai ma tinha ãne: — Mo oto aibâ norĩ zarina sa'ẽtẽ aimorĩ za'ra na. Tawamhã 'râwi sasimri za'ra wamhã, te za ãne tãma inharĩ za'ra za: “E marĩ da, ma aiwétési iwẽ wa'rãmi iwasété na si asiwi iwa'âbâ 'wa.

⁵ E marĩ da, ma tô ĩnhib'ihâ'a nhimihâsizé ẽtẽ waipo prã prata na i'manharĩ hã tiwi isimi'uri za'ra wa'wa. Taha na te te 're hâsi. Taha na te duré romnhowamhã marĩ iwatobrozé hã te te 're awaihu'u siro. Marĩ iwasété uptabi ma tô i'manharĩ za'ra wa'wa.”

⁶ Tawamhã 'ri 'madâ'â'wa 'râwi te te sasimri za'ra wamhã, ma tô ãne Zuzé te te tãma iwaihu'uzéb zarina tãma nharĩ za'ra.

⁷ Tane nherẽ, ãne ma te asa ãma tãma wa'rãmi za'ra: — Wanhib'apito, e marĩ da, ma tô ãne na ãma wama inharĩ za'ra. Ãne hã wa norĩ hã wa te 'manharĩ waihu'u za'ra õ di. Wama pire za'ra di.

⁸ Ti'ai wa'õtõ nho'u Cana'ã hawi, we apâ wasi'aba'ré na sahu wamhã, wa tô rob'uiprazé wate za'ra sa'ui mono bâ, wa te isõpẽtẽ za'ra hã we apâ ãma siri za'ra ni. E marĩ da, wa aré bété asib'apito te, ẽtẽ waipo prã prata 'manharĩ hã niha wamhã, ẽtẽ waipo pré oru 'manharĩ hã wasiwi simi'uri ni. Waihu'u õ di.

⁹ Ni'wa te 're, hâsizé sõpẽtẽ wamhã, te za wĩrĩ ni za. Tawamhã wa norĩ hã wapawa'âbâ ãna aima romhuri za'ra wa'aba 'wa na wa za 're wahâimana za'ra.

¹⁰ Tawamhã 'ri 'madâ'â'wa asa ma te ãma tãma wa'rãmi za'ra ãne: — Tane tô. Wa ãma asaze za'ra wa'wa. Tane nherẽ, ni'wa te 're, te isãmri si te za ĩma romhuri'wa na 're hâimana. Tawamhã isiré norĩ a norĩ wa'wa hã te za asima iwẽ na apâ ai'aba'réi wa'wa za.

¹¹ Tawamhã tite mono bâ ma tô si'aba'ré na awaru po're pore ba nhisi hawi sa'u hã sizari za'ra, ti'ai u. Ma tô duré tawamhã wata wasihu za'ra, tite mono bâ.

¹² Tahawa Zuzéhé nhorõwa 'madâ'â'wa, te amnho ré hã sa'u te te tiwi sô azabu, ipoto'rata te hawi, danhobabati te u. Tawamhã Bẽzamihĩ te, amnho ré sa'ui wata 're ma tô hâsizé hã tisã.

¹³ Tahawa ma tô isisãnawã norĩ ti'uza 'râwi siwi hâiwazu za'ra, tiwi robzei'õ za'ra wa. Taha pari ma tô marĩ te te i'wasari hã awaru po're pore ba nhisiwi apâ sima sa'ra za'ra, 'ri nho'õmo u tino siré te te apâ sina siri za'ra da.

¹⁴ Tawamhã Zuzé zahadu tinhorõwa ãma hâimana ré, ma tô Zuda tisisãnawã norĩ me apâ itẽme aihutu. Sihutu wi, ma tô isõ're hi'rãtitõ tãma asimro, ti'ubu na ti'ai u te te roptob za'ra sina.

¹⁵ Tawamhã te Zuzé ãne sadanharĩ za'ra: — E marĩ da, ma tô ãne hã asiwi i'manharĩ 'wa. E asiwi ĩwaihu'u aba õ di bété, wa hã romnhowamhã marĩ te 're i'awaihu'u mono zém na hã.

¹⁶ Tawamhã Zuda ma te ãma sada'â: — Apito, e niha wa za marĩ na aima wasiwasu'u za'ra ni. E niha na wa za duré marĩ na wasiwi asada'âbâ ni. E niha wa za wawasété za'ra ne wahâimanazé hã wasima hiri wẽ za'ra ni. Waihu'u õ di. 'Re ihâimana u'âsi mono, ma tô wawasédé wa te ĩ'manharĩ za'ra zém na wawi a'upsibi me. Ãhãta wa ãme wa norĩ hã uburé wahâimana za'ra ni. Tahawa wa za aihĩni wa norĩ hã hâsizé ite sa'ui 're inomro me, wapawa'âbâ ãna wa te aima 're romhuri za'ra taré.

¹⁷ Tawamhã Zuzé, ma te duré ãma sada'â: — Mare di. Niwamhã tane hã te i'manharĩ'õ. Ĩnhimihâsizéb ré ihâimana si te za siwaprosi ĩma romhuri'wa na hã 're hâimana. A norĩ wa'aba si te za aihĩni uburé aimama nhorõwa u rowẽ na apâ asina isiri za'ra wa'wa.

Zuda, Bẽzamihĩ hâiba na te te irowaptẽrẽzé wasu'u

¹⁸ Tawamhã Zuda, Zuzéhé u 'râwi pesere te te sina ropto wamhã, te ãne tãma tinha: — Apito, ma'ãpé ĩzawi na hã a'â bâdâ ĩma sa'ré na, ĩsima iwẽ na ĩnhiptete sina te aima nharĩ da. Ĩzada asahi tõ, a hã danhipai u apito uptabi ne aihâimana dâ'âsina.

¹⁹ Iwana wamhã, ma tô a hã iwazadanharĩ za'ra ãne: “E aimama 'wa te zahadu aima 're hâimana za'ra wa'wa. E duré asisãnawãi wa'wa aimawi iré hã.”

²⁰ Tawamhã wa tô ãne ãma asada'âbâ za'ra ni: “Ĩhe, zahadu wamama te wama 're hâimana za'ra. Ma tô si'ihi pese oto. Duré wano hã te 're 'maihâimana, wamama si'ihi pese nherẽ, ipodo hã. Wano za'ra isõwamhã ma tô dârâ. Tahawa te ãhã na hã siwaprosi tina ma 're hâimana. Te duré wamama hã te te 're sawi pese uptabi.”

²¹ Tawamhã ma tô wama inharĩ za'ra, wano wa te we wasiwi saprõni da, hâiba pibu da, a hã.

²² Tahawa, wa tô duré ãne ãma aima wa'rãmi za'ra ni: “Timama hã te te irẽme da hã waihu'u õ di. Te te rẽme da wamhã, te aré imama hã dârâ.”

²³ Tawamhã a hã ma tô asa wama inharĩ za'ra, wei wasiré za'ra morĩ õ wamhã, wawaibui wẽ tõ da.

²⁴ — Tawamhã wanhorõwa u apâ wasihutu wamhã, wa tô wamama ma, uburé tãma asadawa wasu'u za'ra ni, wama inharĩ za'ra zém na hã.

²⁵ Tawamhã ma tô we apâ wazatõrĩ za'ra, mra wa te 'mai'uipra zahu za'ra da.

²⁶ Wa tô wamama ma ãma tãma wa'rãmi za'ra ni ãne: “Wasi'aba'réi waihu'u õ di za. Wano wasiré za'ra morĩ õ wamhã, te te u iwawaibui da hã mare di. Tahawa wasi'aba'ré da wamhã, wano hã za wasiré morĩ za'ra wapsi.”

²⁷ Tahawa, te wamama hã ãne wama nharĩ za'ra: “Aima waihu'u pese za'ra wa'aba di, ĩmro Raqueu zé're hawimhã maparane ĩ'ra anoi wa'aba norĩ ĩma ihâimana zahuré na hã.

²⁸ Misi ma tô siparamhã ĩrẽ. Niwamhã ĩtõmo na te oto 'madâ'â na sitéb õ di. Ãté tô abaze zahi ma tô siwi tenhiwazu.

²⁹ Tahawa ãhã na awa'awi ãhã zama ĩhawi asiwi saprõni aba wa, duré marĩ iwasédé sô watobro wamhã, te za ĩsi'ihi wa, ĩpẽ'ẽzé zarina tô oto ĩdâ'âzé hã ĩzô iwazere za'ra wa'wa.”

^30-31 Ma duré Zuda timreme na ãne ãma tãma uzusi: — Tahawa apito, ãhã na awa'awi na wanoi ãna ĩhâiba si apâ te ĩsina isiri na ĩmama te te ĩ'madâ'â wi, duré ĩno hâiba zô simrami baba wamhã, te za tô awa'awi dârâ, õhõ ãma si oto 're hâimana mono wa. Ãhã wa, wa norĩ, wamama ipẽ'ẽzé na wa te wasiwi pẽ'ẽ'utõrĩ wamhã, wa za wa te ãma tãma i'upa za'ra 'wa na 're wahâimana za'ra.

³² Zahadu duré ãne: Ĩmama ma hã wa tô ĩsina ropisutu, ĩnoi ãma ĩsi'madâ'â da hã. Tahawa wa ãne tãma tinha: “Ĩnoi ãma rowẽ na apâ te we ãma siri õ wamhã, wa za tô i'upai'wa na ĩhâiba.”

³³ Tahawa apito, ma'ãpé ĩma sa'ré na, ĩno ai'reputu nhowa're're aima romhuri'wa na 're ĩhâimana mono da. Duré te za tãma iwapro, tidub'rata norĩ siré apâ morĩ da hã.

³⁴ E niha wa za ĩnhorõwa u, ĩno ai'reputu ĩsiré morĩ õ nherẽ apâ mo. Ĩmorĩ waihu'u õ di. Ĩmama ma, ropire za sô iwatobro da hã te ĩsima wẽ õ di, te i'madâ'â da hã.