Zenezi 35 - ꞌRe Ihâimana Uꞌâsi Mono Zadawa Wasuꞌu

Bétéu u, apâ Zaco te te sina isirizé wasu'u

¹ Tawamhã 'Re ihâimana u'âsi mono, Zacoho ma, te ãne tinha: — Ma'ãpé asima rob'ubumro na, Bétéu u apâ aimorĩ da, tame 're aihâimana mono da. Tame te za ẽtẽ za'ra ĩma danhoprubzé zata zéb da hã ĩma i'manha, wa hã 'Re ihâimana u'âsi mono, adub'rada Ezauhu wi aimani wa, aima ĩsihâi'ré ma.

² Tawamhã Zaco te uburé isõrõwa 're, 're ihâimana za'ra mono norĩ ma nharĩ za'ra, ãne: — Wasiré a'uwẽ'õ norĩ te, ihâiba'õ norĩ ma, romhâibarĩ na ãma 're idawata za'ra mono hã aima ihâimana za'ra wa'wa hã, te za asiwi isãmra 'wa. Ma'ãpé asipese za'ra wa'aba. Duré da'uza ihâi uptob'õ na te za asi'uza za'ra wa'wa.

³ Ma'ãpé asima rob'ubumro za'ra wa'aba, Bétéu u wasi'aba'ré da. Tame wa za 'Re ihâimana u'âsi mono, te robzépata ré, te te 're ĩpawapto mono ma hã, duré uburé daro mono bâ 're ĩmorĩ ré, ĩsiré 're ihâimana mono ma 'manha, ẽtẽ za'ra hã.

⁴ Tawamhã Zacoho ma, ma tô isiré a'uwẽ'õ norĩ te romhâibarĩ hã duré dapo're za'ruzé tãma sõmri za'ra. Tahawa, Siquẽ 'rata rowede iwazéb zahi 're isa mono zahâpâ ma tô uburé ãma ti'a za'ra.

⁵ Tawamhã duré oto si'aba'réi wamhã, 'Re ihâimana u'âsi mono, Zaco norĩ waptoma 'ri nho'õmo norĩ 're, 're idahâimana za'ra mono ma hã, ma tô dapahi uptabi sina dahâimana za'ra da hã dama 'manha. Tahawa Zacoho zarina dasi'aba'réi õ di, da te ãma dasiwi ro'wa'rutu da hã.

⁶ Ãne ma tô Zaco, uburé tite a'uwẽ norĩ ré hã wi, Rowa'a na 'ri nho'õmo nhisi u, Bétéu na isisi amoi u, Cana'ã ti'ai 'remhã.

⁷ Tawamhã tame ma tô ẽtẽ za'ra hã 'manha, 'Re ihâimana u'âsi mono ma. Ta hã ma tô sisi, “Bétéu te, 'Re ihâimana u'âsi mono” na. E marĩ wa. Tame tãma sihâi'ré wa, tidub'rata ma, simani wamhã.

⁸ Ta rob ãma Débora, Rebeca te te iwarahu hã ma tô dârâ. Dâ'â wamhã, wede iwazéb zahi, 're isa mono zahâpâ ma tô siwi tisẽ, Bétéu hâiwa nhimire niwĩ 're ihâimana mono ãma. Tahawa isisi hã ãne: “Wede iwazéb zahi ãma datõmo'u dawi 're ipraba mono” na.

⁹ Tawamhã Zaco, Mezopotãmia hawi apâ te te sina siri wamhã, ma tô 'Re ihâimana u'âsi mono hã tãma isihâi'ré na ãma tãma sahu. Tahawa, iwẽ te te tãma 're i'apisutu mono zéb na hã

¹⁰ te ãne tãma tinha: “A hã Zaco na asisi tô. Tane nherẽ, ãne hã oto asisi õ di za. Asisi hã za oto Izaraéu na.” Ãne 'Re ihâimana u'âsi mono, ma tô Izaraéu na sisi.

¹¹ Tawamhã ãne na zama te duré sina tãma tinha: “Wa hã 'Re ihâimana u'âsi mono, danhipai u pese ĩwaihu'u pese uptabi. Ma'ãpé atébré za, ai'ra ahâ da, duré asihudu ahâ da. Aihawimhã te za a'uwẽ misi ãma isitom na dasipu'u pese na daro mono bâ 're dasitébré. Duré asihudu norĩ 'remhã te za dama 're si'apito za'ra za.

¹² Tawamhã Abra'ãhã ma, duré Izaquihi ma, ti'a te isõmri hã, ta hã aima zama wa za oto tisõ. Taha parimhã wa za asihudu norĩ ma tãma sõmri za'ra, ai'uirĩ na.”

¹³ Tawamhã 'Re ihâimana u'âsi mono, Zacoho ma, te te tãma nharĩ pari, ihawimhã ma tô hâimo oto mo.

¹⁴ Tahawa Zaco, 'Re ihâimana u'âsi mono te te tãma inharĩzéb ãma, ma tô ẽne itõmo waré hã 'mai'â, hâiwi te te sãrĩ da. Ta hã 'Re ĩhâimana u'âsi mono te da, te te tãma pisutu wa, ma tô duré uwa 'rãi wa'u isé hã, duré azeitona 'rãi wa'u to hã isisiwimhã sa'wa.

¹⁵ Tawamhã ta hã ro, ma tô duré sisi, Bétéu na.

Raqueu idâ'âzé wasu'u

¹⁶ Tawamhã Zaco norĩ ma tô Bétéu hawimhã oto wairé. Duré Efrata na 'ri wa'õtõ nhisi u 'râwi te te oto sina rotété za'ra wamhã, ma tô oto Raqueu ãma iwasã hã sépu. Tahawa, te sépata hâ pese.

¹⁷ Tawamhã oto sa'ẽtẽ iwasã ãma sépu'u wamhã, te isapari'wa hã tãma tinha ãne: — Aipahi tõ. Aibâ na te za duré ai'ra hã aima podo.

¹⁸ Tane nherẽ, tãma irob'rãsutuzéb u hã romhuture di oto. Tawamhã ipẽ'ẽzani tiwi watobro wana ré, ma tô sisõ'a ré ti'ra si'watébrémi sisi, Benoni na. Tane nherẽ, imama ma tô sisi, Bẽzami na.

¹⁹ Raqueu dâ'â wamhã, ma tô Efrata u bâdâdi zada'ré ãma dasiwi sẽrẽ ni, ãhã na 'ri wa'õtõ nhisi hã Belẽ na.

²⁰ Tahawa Zaco, i'ru ãma ma tô ẽne itõmo waré hã hâiwi tisã. Ta hã te zahadu ãhã na hã ipibui pese zéb da, i'ru ãma 're sa.

²¹ Taha pari Zaco, ta hawi oto watobro wamhã, ma tô Éde na romnhisi ãma dasipapara rob'madâ'âzéb da, 'ri 'rãihâ 're isa mono zababa romhâ 'manharĩ na 'ri hã sima sõré.

Zacoho 'ra norĩ wasu'u

²² Tawamhã taha rob ãma Zaco 're hâimana mono ré, ma tô i'ra Rubẽ, Zacoho mro prã na Bira tãma ihâiba hã tiwi upi wasété. Ãne hã imama te te waihu'u wamhã, ma tô ab'rui pese. Zacoho 'ra uburé hã 12 na.

²³ Ã norĩ hã, Léiaha zé're hawi ipoto za'ra: Rubẽ, Zacoho 'ra dama ipoto'rada, Simiã, Levi, Zuda, Isaca, duré Zébulõ.

²⁴ Ã norĩ, Raqueu zé're hawi ipoto zahuré hã: Zuzé, duré Bẽzami.

²⁵ Bira, Raqueu ma romhuri'wa zé're hawi ipoto zahuré hã ã norĩ: Dã, duré Naftali.

²⁶ Ziupa, Léiaha ma romhuri'wa zé're hawi ipoto zahuré hã ã norĩ: Gadi, duré Asé. Ã norĩ hã Zacoho 'ra, Mezopotãmia na romnhisi ãma hã ma tô tipoto za'ra.

Izaqui idâ'âzé wasu'u

²⁷ Tawamhã Zaco, timama Izaquihi siré 're hâimana mono da hã ma tô mo Mare na 'ri nho'õmo nhisi u, Arba na isisi amoi u, Hebrõ na 'ri nho'õmo nhisi 'rata 're ihâimana mono u, Abra'ã, Izaquihi siré aré 're isãmra mono zéb u.

²⁸ Tawamhã Izaquihi ãma hã ma tô oto tiwahu, 180 na.

²⁹ Tawamhã si'ihi pese wamhã, Izaqui hã ma tô oto dârâ. Tahawa, i'ra Ezau norĩ, Zacoho me ma tô sẽrẽ zahuré.