Salmu 94 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, i'uwaibaba na si da'ãma rowairébé'wai wasu'u

¹ Uburé Danhib'apito, a hã 'Re ihâimana u'âsi mono, dama 're i'arob'manharĩ mono 'wa na 're i'aihâimana mono! Ma'ãpé 're i'asimi'ruiwa'âbâ mono zém na hã asihâi'ré na.

² A hã te uburé ti'ai ãma da'ãma rowairébé'wa na 're aihâimana mo. Tahawa, ma'ãpé 're isi'madâ'â ze za'ra mono norĩ ma, niha na tãma rob'manharĩ za'ra na, tô ibâ na marĩ te te 're i'manharĩ za'ra mono zéb zarina.

³ E momo te za wasété na 're inomro mono norĩ, te te sima 're iromhu'u za'ra mono zé hã ti'rãsutu. E momo te za tô ãne hã 'rãsutu za'ra.

⁴ E niwa te za 'râwi 're isi'madâ'â ze za'ra mono zéb zarina, timreme na dama 're isiwasu'u za'ra mono zé hã ti'rãsutu. E niwa te za duré marĩ te te 're i'manharĩ wasété za'ra mono na 're isi'uze za'ra mono zé hã ti'rãsutu.

⁵ Uburé Danhib'apito, õ norĩ hã te asib'a'uwẽ hã te te 're wati u'âsi za'ra. Te duré aima 're ihâimana za'ra mono norĩ te te 're robzépata za'ra mono da hã te te tãma 're rob'manharĩ wasété za'ra.

⁶ Ta norĩ hã te duré imrotõ pi'õ norĩ, duré imama'õ norĩ te te siwi 're simro. Wanhipti'ai 're wasiré a'uwẽ'õ 're isi'ubumroi mono norĩ hã te duré te te siwi 're simro.

⁷ Tahawa, te ãne te te sima 're nharĩ za'ra: “Uburé Danhib'apito hã te te ãma 're wa'madâ'â za'ra mono õ di. Izaraéu nhihudu norĩ te, 'Re ihâimana u'âsi mono hã, ãne na hã te te 're iwaihu'u mono da hã mare di.”

⁸ Isimiza'rese'õ norĩ, asima sô asõpré wa'aba, marĩ waihu'u za'ra wa'aba da hã! E niwa te za asimiza'rese na 're i'aihâimana za'ra wa'aba mono zéb da hã asima iwaihu'u za'ra wa'wa.

⁹ E dapo're 'manharĩ'wa hã 're simipari mono õ di bété. Te 're simipari! E datõmo 'manharĩ'wa hã marĩ te te 're ab'madâ'â mono õ di bété. Te te 're ab'madâ'â tô!

¹⁰ E daro mono bâ a'uwẽ te te 're i'ahâ za'ra mono 'wa hã te za tinhimihâzém na hã te te dama 're aba'a. Duré uburé dama rowaihu'u wẽ nhomri'wa hã e te 'rãnhimiza'rese ãna 're hâimana bété. Mare di.

¹¹ Danhimirosa'rada hã, Uburé Danhib'apito ma, waihu'u pese di. Duré tarére na da te 're irosa'rata za'ra mono zé, tãma hã waihu'u pese di.

¹² Uburé Danhib'apito, 're i'ahâ za'ra mono norĩ si te za rowẽ na to sina 're nomro, asimiroti na ãma tãma 're irowasu'u za'ra mono norĩ hã.

¹³ Bâdâ iwasédé, sô 're isihutu mono 'remhã te za rowẽ na to sina 're inomro mono da hã tãma 're i'aba'a mo. Tane nherẽ, iwasété norĩ zô hã te za ab're norĩ, sô 're si'ridawa za'ra.

¹⁴ Uburé Danhib'apito hã tinhib'a'uwẽ te te 're arẽme mono õ di za. Tãma 're ihâimana za'ra mono norĩ hã te te 're ab'madâ'â rẽme mono õ di za.

¹⁵ Ãne wamhã, te za dama rowairébézé sena na 're hâimana. Tahawa, uburé sena na 're ihâimana za'ra mono norĩ hã te za dama rowairébé wẽ zé hã te te sina 're wẽsãmri za'ra.

¹⁶ E 'wa hã sirési bâ, iwasété norĩ zada, ĩ'ãma isi'madâ'â para ĩ'upana sab da hã. Duré e 'wa ma tô ĩzababamhã tihâiba, iwasédé te te 're i'manharĩ za'ra mono norĩ zada, hâimana da hã.

¹⁷ Uburé Danhib'apito te te ĩpawaptob õ 'wa'âhã, wa aré ti'a 'rowi ari'iwi pese 're idanhimi'wara mono zéb ãma hã 're ĩza'wari.

¹⁸ Uburé Danhib'apito, ĩsi'marõwĩrĩ da, ĩzai praba ne, oto ĩdâ'â da, ĩsiwaihu'u wamhã, asimizawizé hã ma tô ĩ'upa.

¹⁹ Ĩpẽ'ẽ 're ĩhâtâ'â za'ẽtẽ na 're ĩhâimana mono wamhã, te a hã 're ĩpẽ'ẽ tété u'âsi mo. Te duré sa'ẽtẽ na ĩpẽ'ẽ to ĩma 're isõmri mo, ĩpẽ'ẽ 'remhã.

²⁰ A hã, senai'õ na da'ãma rowairébé'wa norĩ hã 're awẽsãmri mono õ di. Ta norĩ hã te senai'õ na roti zarina te te dawi 're rowamnarĩ za'ra ãma.

²¹ Sena na 're ihâimana za'ra mono norĩ zada, te ta norĩ hã tinhimirowa'õno te te sima 're 'manharĩ za'ra. Te duré iharé na si 're ihâimana za'ra mono norĩ ma, te te tãma 're rowairébé za'ra, 're dâ'â za'ra mono da hã, ibâi õ nherẽ.

²² Tane nherẽ, Uburé Danhib'apito te 'ri 'rãihâ isiptete ne, ĩma 're hâimana. Ta hã te ẽtẽ tõmo wawẽ ne ĩma 're hâimana, ĩ'wawi 're isimapa mono 'wa na hã.

²³ Tawamhã 'Re ihâimana u'âsi mono te za ã hã da'ãma rowairébé'wa norĩ nhisiwi iwasété 'manharĩ za'ra zé waptã'ã da hã tãma pisutu za'ra. Uburé Danhib'apito, wate 'Re ihâimana u'âsi mono hã te za uprosi, isimi'manharĩ wasété za'ra u'âbâmhã.