Salmu 89 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono iwaihu'u pese ãma si, dawatazé wasu'u

¹ Uburé Danhib'apito, 're i'asimizawi pese mono zém na wa za õne u'â 're ĩwata u'âsi. Wa za duré uburé danhihudu sidâpâsi ma, ai'umnhasi na 're i'aihâimana mono zém na te ãma dama 're rowasu'u.

² Wa hã ĩma waihu'u pese di, asimizawizé õne u'â 're ihâimana mono na hã. Duré ai'umnhasizé, hâiwa ne õne u'â 're isa'wari mono zém na hã.

³ A hã te inha ãne: “Wa hã, ĩnhib'a'uwẽ Dawi te ipisutu ma, wa tô ĩnhimiropisutu zahi hã 'manha. Ãne wa tô taha ma hã ropisutu:

⁴ ‘Aihawimhã asihudu sidâpâsi te za õne u'â dama 're si'i'rãnho'õmo za'ra za. Wa hã wa za ai'uirĩ na asimi'madâ'âzé hã õ norĩ ma, te 're apisutu zahi, we 're wairébé mono sidâpâsi.’ ”

⁵ Uburé Danhib'apito, a hã marĩ iwaihu'u'õ 're i'ab'manharĩ mono zém na hã te hâiwa norĩ ai'ãma 're sadawa'a'a. Duré hâiwa ãma romhuri'wa norĩ hã ai'umnhasi na 're i'aihâimana mono zém na te ai'ãma si 're sadawa'a'a.

⁶ Uburé Danhib'apito, asine ni'wa hâiwa ãma hã 're i'maihâimana mono õ! Duré ni'wa hã hâiwa ãma ihâiba ré norĩ 'remhã asine hã 're i'maihâimana mono õ!

⁷ A hã aiwazé pese na, te ta norĩ 're isi'rã'õtõ mono zéb ãma tãma 're aihâimana za'ra mo. Tame te te siwi 're i'ai'uirĩ za'ra mono norĩ hã te duré uburé te te siwi 're aiwazé pese.

⁸ Uburé Danhib'apito, 'Re ihâimana u'âsi mono Iwaihu'u pe, ni'wa asine isiptete uptabi hã hâimana õ di! Uburé te marĩ ma ai'umnhasi za'ẽtẽ na 're aihâimana mo!

⁹ A hã, âporé â nhiptete ma, te aipire na tãma 're aihâimana mo. Tô a hã te âporé â sisasisi nhiptete ma hã 're inharĩ u'âsi mo, â sisasi hã 're simizahâri mono da hã.

¹⁰ A hã, â 'rowi ropoto siwamnarĩ hâpâ pese wa, ma tô duré iwĩ. Asiptete uptabi na ma tô duré asitob'ru norĩ ãma 're i'ai'uté za'ra mo.

¹¹ Hâiwa ate hã, duré ti'a zama ate hã. Ti'a hã ma tô i'manha. Duré uburé marĩ iwa 're ihâimana za'ra mono da hã, ma tô i'apo.

¹² A hã ma tô hâiwa nhimi'e niwĩmhã, duré hâiwa nhimire niwĩmhã ro hã i'ab'manharĩ mo. Tabo na ẽtẽ nhisi norĩ ãma Hermo na isisi me te pẽ'ẽ to sina ai'ãma hã 're sõ're zahuré.

¹³ E niha i'aipaihi nhiptete uptabi! Duré e niha i'asib'rata nhiptete uptabi!

¹⁴ Sena na i'uwaibaba na si 're i'aihâimana mono zé hã, duré sena na dama 're i'arowairébé mono zé hã, te 'ri nhana'rata ne hã asimi'madâ'âzéb ãmamhã 're hâimana zahuré. A hã te ai'umnhasi zarina duré asimizawi pese uptabi zarina uburé marĩ hã 're i'ab'manharĩ mo.

¹⁵ Tinho're na ai'ãma 're iwata za'ra mono norĩ hã te za robze sina toi u'âsi 're nomro, ate rowa'a na si 're ihâimana za'ra mono norĩ hã!

¹⁶ Aihâiba u'âbâ hã, te ta norĩ hã bâtâ bâre te te sima 're rowẽ za'ra. Te za duré tinho're na hã ai'ãma 're wata za'ra, iharé na si dama 're aihâimana mono wa, a hã.

'Re ihâimana u'âsi mono, Dawihi ma, te te iropisutuzé wasu'u

¹⁷ 'Re ihâimana u'âsi mono, a hã, aiwaihu'u pe duré aiwasété ãna 're i'aihâimana wẽ uptabi mono, te wama za'ra 're aihâimana mo. Duré 're i'asimi'manharĩ wẽ mono zéb zarina, wa wa te da'ãma 're ai'uté za'ra.

¹⁸ A hã ma tô ipisu, wa'wawi 're isimapa mono 'wa da hã. Uburé Danhib'apito, Izaraéu te 'Re ihâimana u'âsi mono, marĩ iwasédé, ai'ãma 're ihâimana mono õ, a hã ma tô wate apito hã wama isõ.

¹⁹ Duréi uptabi hã, asib'a'uwẽ sena na ai'ãma 're inomro mono ma sõtõ 'rowim ne sõ'awi tãma asihâi'ré za'ra wamhã, ma tô ãne tãma inharĩ za'ra: “Wa hã dasi'wapé 'manharĩ'wai ma, wa tô isiptetezé hã tãma tisõ. Duré pire na dama 're sa mono da hã, wa tô aibâ te ipisutu ma hã tãma tisõ, a'uwẽ wa'wamhã.

²⁰ Ĩnhib'a'uwẽ Dawi, si'apito da hã, wa hã wa tô pisutu. Wa tô rob'rãi wa'u to iwazéb zahi na hã 'rãti'i.

²¹ Ĩnhib'rata nhiptede hã te za õne u'â te te 're upari. Duré te za ĩnhiptede hã te te 're siptete u'âsi.

²² Niwamhã isitob'ru norĩ te te ãma 're i'ai'uté za'ra mono da hã mare di za. Iwasété norĩ hã te te duré ãma 're i'ai'uté za'ra mono da mare di za.

²³ Wa hã wa za isitob'ru norĩ hã te 're azu pese. Duré sada 're isiti'ru za'ra mono norĩ hã, wa za duré uburé te 're a'uprosi.

²⁴ Ĩ'umnhasizé hã, ĩnhimizawizé me, te za isiré hã 're hâimana u'âsi zahuré. Ĩnhisi na te za isiptetezé hã õne u'â te te sina tãma 're hâimo.

²⁵ Wa za dama i'rãnho'õmo na 're ihâimana mono zé, â poré Mediterãniu na isisi hawimhã, panho'u Eufrati na isisi u hã tãma 'wani.

²⁶ Tahawa, Dawi te za ãne ĩma tinha: ‘A hã, Ĩmama, duré ĩte 'Re ihâimana u'âsi mono. A hã, ẽtẽ tõmo wawẽ ne, na 're ĩnho'reptui mono 'wa.’

²⁷ Wa za duré ĩ'ra ĩma ipoto'rata ne hã pisutu, ta hã. Duré uburé apito norĩ nhipai u dama sa'ẽtẽ na 're hâimana mono da hã wa za tãma pisutu.

²⁸ Õne u'â wa za wa hã te 're sawi pese. Duré õhõ ma ĩnhimiropisutu zahi, te za siptete na hã tãma 're hâimana u'âsi.

²⁹ Taha uirĩ na hã te za isihudu sidâpâsi õne u'â dama 're si'i'rãnho'õmo za'ra. Duré hâiwa 're sa'wari mono ré, te za 're isimi'madâ'â za'ra mono zé hã 're hâimana u'âsi.

³⁰ “Tane nherẽ, isihudu norĩ ĩnhimiroti te te 're wapari za'ra mono õ wamhã, duré marĩ na te tãma ãma 're irowasu'u za'ra mono zarina, ãma 're hâimana za'ra mono õ wamhã,

³¹ marĩ te i'ruzé te te siwi 're wẽ'õ za'ra mono wamhã, ĩmreme te te duré sima 're tété za'ra mono õ wamhã,

³² wa za wa hã iwasété za'ra u'âbâmhã te tãma 're rob'manharĩ za'ra za. Wa za duré te tãma 're arob'manharĩ, marĩ na te te 're i'upa za'ra mono zarina.

³³ Tane nherẽ, Dawihi ãma ĩnhimizawizé te irẽme da hã mare di za. Ropisudu te tãma i'manharĩzé hã wa za tô ãma tãma uwaimra.

³⁴ Ropisudu õhõ ma, te i'manharĩzé te ãma tãma i'upa da hã mare di za. Duré te tãma iropisutuzém na, te ãma tiwi saprĩ waihu'u õ di za.

³⁵ “Misi haré wa tô ĩnhisi iwazéb zahi na tãma ropisutu, niwamhã Dawihi ma, ĩzadawa nhipese õ di za.

³⁶ Õne u'â te za õhõ ma isihudu hã tãma 're hâimana za'ra. Duré bâdâ te te 're rob'uiwẽ mono ré, wa za dama i'rãnho'õmo na 're ihâimana mono zé hã te 're 'madâ'â pese.

³⁷ Ã hã te te 're ida'a'madâ'â mono zé te za a'amo hâiwa na 're isab u'âsi mono ne hã 're hâimana u'âsi.”

Apito ãma ai'utézé wasu'u

³⁸ Tane nherẽ, a hã ma tô apito ipisutu da hã asiti'ru. Ma tô tãma asa'ohâ. Ma tô duré iwẽ'õ pe.

³⁹ Asib'a'uwẽ ma, asimiropisudu i'manharĩzé ma, ma tô asimirẽ. Ma tô duré isõprezé ti'ai u hã ime.

⁴⁰ Isib'ri nho'õmo 'wawi wa'ra 'rãihâ hã ma tô tiwi i'apru mo. Ma tô duré 'ri isiptede hã tiwi i'apru pese mo.

⁴¹ Iwa'waibaba te te 're iro'rahâri za'ra mono hã te uburé isimarĩ na te te ãma tiwi 're robaba za'ra. Duré iwaptoma 're idahâimana za'ra mono norĩ hã te õhõ ãma 're wa'ẽ za'ra.

⁴² Isitob'ru norĩ si ma tô isiptete na hã i'a'upari wẽ mo. Ma tô duré õ norĩ ma si ipẽ'ẽ to hã tãma isõmri za'ra, te te ãma sima irowẽ za'ra zéb da hã.

⁴³ A hã, apito te, isi'wa pa ma tô niha hã tiwi i'manha. Duré dasi'wapéi wamhã, upari da hã isiré aihâimana õ di.

⁴⁴ Apito na pire na te te 're ida'a'madâ'â mono zé hã ma tô tiwi iwaze. Ma tô duré ite apito simasisizé hã ti'ai u tiwi ime.

⁴⁵ A hã, isi'ihizé bâtâ wana ré waptu na si'ihi su'u da hã, ma tô tãma ipisu. Ma tô duré rowazé hã tãma ihi.

Dama rowairébézé waptẽrẽ wasu'u

⁴⁶ Uburé Danhib'apito, e momo te za aima'urizé hã ti'rãsutu. E õne u'â te za we 're aima'uri mo. Duré e momo te za asiti'ruzé unhama ne hã 're ro'o 'rãsutu.

⁴⁷ Ma'ãpé ĩhâimanazé i'ruture na hã ãma rosa'rata. Duré uburé a'uwẽ asimipoto norĩ nimahãna za 're idâ'â za'ra mono zém na hã ãma rosa'rata za'ra na.

⁴⁸ E 'wa hâiba ré u'âsi 're hâimana mono da bâ. E 'wa te za dadâ'â nhiptetezé wi hã aimani, da te ãma ti'a tõ da hã.

⁴⁹ Uburé Danhib'apito, e mahãta duréihã asimizawizé aima 're ihâimana mono. Duré e mahã Dawihi ma, asimiropisudu i'manharĩzé hã.

⁵⁰ Uburé Danhib'apito, ma'ãpé ĩ'ãma aipo're pu'u, wa hã asib'a'uwẽ da te ĩ'ãma 're iwasété za'ra mono zém na te 're irobzépata mono na hã.

⁵¹ Uburé Danhib'apito, asitob'ru norĩ, te apito ipisutu ma hã te te tãma 're nharĩ wasété ahâ za'ra! Ta hã 're ne mono sidâpâsi, te õ norĩ hã ãma 're wa'ẽi u'âsi za'ra.

⁵² Õne u'â, Uburé Danhib'apito ãma si 're wawata za'ra wa'aba mono! Tane tô! Tane tô!