Salmu 8 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, danhipai u wẽ uptabi na 're ihâimana mono zé wasu'u

Dawihi nho're

¹ Uburé Danhib'apito, Wanhib'apito za'ra, daro mono bâ ma tô asisi za'ẽtẽ na hã da te 're aiwaihu'u za'ra. Duré ai'ãma 're idawata za'ra mono zé hã te hâiwa u 're zasi.

² Ai'uté norĩ, duré dapam norĩ zama te tizaihâ na asisi za'ẽtẽ na hã 're wata za'ra. A hã ma tô 'ri isiptede hã asima i'manha, asitob'ru norĩ wi asi'wawi 're aimapa mono da hã, uburé asada 're ihâimana za'ra mono norĩ hã 're a'uprosi mono da.

³ Wa hã hâiwa u te a'madâ'â wamhã, asimipoto norĩ hã, a'amo hã, duré wasi norĩ, tite mono bâ 're isimasa mono i'aza'ra hã,

⁴ wa 're ĩnhinharĩ ãne: E niha te a'uwẽ norĩ ãma aima tarére nherẽ, ãma 're i'arosa'rata zawi u'âsi mo. E niha te duré tane nherẽ, ãma 're aihâtâ'â za'ra mo, 're pawaptob za'ra mono da hã.

⁵ A hã, a'uwẽ asahâpâp si pire prã na 're hâimana za'ra mono da hã, ma tô i'a'manha. Duré marĩ ma, pire na siptete na sidanhib'ihâ'a za'ra da hã, ma tô tãma isõmri za'ra.

⁶ Uburé asimipoto norĩ ma, siptete na 're hâimana za'ra mono da hã, ma tô i'apisu. Ma tô duré uburé marĩ hã ipara 'rowib za'ra i'anhoré mo,

⁷ pone'ẽrebâ norĩ hã, powawẽ norĩ hã, duré uburé rom na abaze norĩ hã,

⁸ si norĩ hã, tepe norĩ hã, duré uburé â 'rowi 're inomro mono norĩ hã.

⁹ Uburé Danhib'apito, Wanhib'apito za'ra, daro mono bâ ma tô asisi za'ẽtẽ na hã da te 're aiwaihu'u za'ra.