Salmu 72 - ꞌRe Ihâimana Uꞌâsi Mono Zadawa Wasuꞌu

Apito ãma rowaptẽrẽzé wasu'u

Salomãhã nho're

¹ 'Re ihâimana u'âsi mono, sena na dama 're i'arowairébé mono zém ne, te te dama 're arowairébé mono da hã, apito ma, pisutu! Duré apito 'ra ma hã, sena na dama 're i'arowairébé mono zé hã tãma sõmri,

² sena na dama i'rãnho'õmo na asib'a'uwẽ norĩ te te ãma 're ab'madâ'â wẽ mono da, duré da te 're iwati za'ra mono norĩ, sena na i'uwaibaba na te te tãma ãma 're arowairébé mono da.

³ Marĩ hã ti'ai wa'õtõ nho'õmo 're, 're isitébré mono da si, iwẽ hã. E marĩ wa. I'uwaibaba si marĩ hã da te 're 'manharĩ za'ra mono wa!

⁴ Apito hã da te 're iwati za'ra mono norĩ 'wawimhã 're isimapa mono da si! Duré marĩ zô tiwi 're iro'wanhi'riti za'ra mono norĩ hã te te 're ipawaptob za'ra mono da si. Duré dawati'wa norĩ hã apito te te 're i'awati mono da si, ĩma iwẽ hã!

⁵ Wanhib'apito, bâtâ norĩ, a'amoi me 're neb u'âsi zahuré mono ré, duré danhihudu mono sidâpâsi ta norĩ siré 're i'aihâimana u'âsi mono da si, iwẽ hã.

⁶ Apito hã tã rom na rob're nhisiwi 're ta'a mono wa, te te 're idi'i za'ra mono ne, duré pĩni pisutu pese na ti'a te te 're idi'i za'ra mono ne hã, 're ihâimana mono da si.

⁷ Apito 're sa mono ré, sena na 're inomro wẽ mono norĩ tihâimanazém na te te sina 're ihâimo za'ra mono da si. Duré a'amo, wahup sidâpâsi te te 're irob'uiwẽ hâ u'âsi mono ne, rowẽzé isa'ẽne dama 're ihâimana mono da si!

⁸ Ã poré hawi â poré amoi u, duré Eufrati na pa nho'õmo nhisi hawi ti'a zada'ré pese uptabi u, te za dama i'rãnho'õmo na te te 're da'a'madâ'â.

⁹ Rop si 're irosa'wari mono ãma 're ihâimana za'ra mono hã te za isõ'remhã tãma 're siwẽ'ẽ za'ra. Isitob'ru norĩ hã te za duré tãma siséb za'ra wa, ipaparab u hã si'uihâ na tãma sisãmra, robzapru tẽmemhã.

¹⁰ Espãnha ãma apito norĩ, rob'ré za'iti norĩ ãma apito norĩ me hã te za tinhoprub za'ra zé hã tãma sõmri za'ra, apito ma. Ãne te za duré Arabia ãmab zama apito norĩ hã, Etiopia ãma apito norĩ me hã tinhoprub za'ra zé hã tãma sõmri za'ra za.

¹¹ Aihĩni pese te za apito norĩ hã isõ're tãma aiwẽ'ẽ za'ra. Te za duré daro mono bâ uburé a'uwẽ norĩ hã imreme na 're nomro.

¹² Apito hã te isibrob'õ norĩ te te 're apawapto, te te tiwi 're irowaptẽrẽ za'ra mono zarina. Duré ta hã te marĩ zô tiwi 're irowaptâ'â za'ra mono norĩ, duré da te 're iwati za'ra mono norĩ hã te te 're apawapto, ipawaptom na ãma 're idazapa'a za'ra mono õ hã.

¹³ Õ hã te isib'uwa norĩ ãma, duré marĩ zô tiwi 're irowaptâ'â za'ra mono norĩ ãma 're siwamri. Te duré te te 're anho'reptu, 're dâ'â za'ra mono da nherẽ.

¹⁴ Te duré da te 're iwati za'ra mono zé wi hã, duré isipãrĩ ze norĩ wi hã te te tãma 're aba'a, itõmo ma hã ihâimanazéb za'ra wẽ uptabi wa.

¹⁵ Apito a'â wama 're hâimana u'âsi za'ra mono! Arabia hawimhã ẽtẽ waipo pré oru te te i'âri da si! Bâtâ sidâpâsi õhõ ãma 're damreme zusi u'âsi mono. 'Re ihâimana u'âsi mono, õne u'â iwẽ si te te tãma 're ipisutu mono da si!

¹⁶ Amnho, ti'ai wa'õtõ nho'õmo mono na sa'wari 'rãihâ na 're isa'wari 'rãtâi mono da si! Duré ẽtẽ 'rãihâ nhisiwi mono hã, amnho rowa'u te te 're isihi za'ra mono da si. Duré Libanu ãmam ne, rob'rã 'rãi pese uptabi na 're i'rã za'ra mono da si! 'Ri nho'õmo mono wa, dasina dahâ'â pese da si, ĩma iwẽ hã, du te te 're irob'ubu mono ne!

¹⁷ Apito nhisi na õne u'â ãma 're idasipo're pu'u za'ra mono da hã si, iwẽ hã. Duré bâdâ te te 're rowa'a mono ré, iwasu'u wẽ hã a'â 're ihâimana mono da si! Duré uburé daro mono bâ a'uwẽ norĩ, apito hâiba u'âbâ iwẽ na si 'Re ihâimana u'âsi mono te te dama 're i'apisutu mono da si. 'Re ihâimana u'âsi mono, apito ma, iwẽ hã te te tãma 're i'apisutu mono da si, te za duré da te 're waptẽrẽ za'ra.

¹⁸ Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're wawata za'ra wa'aba mono, õhõ si marĩ iwẽ uptabi hã te te 're ab'manharĩ mono wa.

¹⁹ Isisi iwẽ na õne u'â ãma 're wawata za'ra wa'aba mono! Isiptetezé hã duré ihawi rowẽ za'ẽtẽ zé hã, ropâ daro mono bâ te te dama 're i'aza'ẽtẽ mono da si, iwẽ hã! Tane tô! Tane tô!

²⁰ Ãme Dawi, Zéséhé 'ra, 'Re ihâimana u'âsi mono ma, 're imreme mono zé hã ma tinhitõ.