Salmu 53 - ꞌRe Ihâimana Uꞌâsi Mono Zadawa Wasuꞌu

Dahâimanazé da te 're iwamnarĩ za'ra mono norĩ wasu'u, danho'reptuzé wasu'u me

¹ Isimiza'rese'õ norĩ te 'râwi tipẽ'ẽ na te te sima 're nharĩ u'âsi za'ra, ãne: “'Re ihâimana u'âsi mono, ĩma hã 're hâimana mono õ di.” Ta norĩ hã te iwasété si 're hâimana za'ra. Tahawa, te marĩ iwasété uptabi si te te duré 're 'manharĩ za'ra. Ni'wa hã iwẽ si te te 're i'manharĩ mono hã ihâimana waihu'u õ.

² 'Re ihâimana u'âsi mono, hâiwa hawi te we te te 're da'a'madâ'â, ni'wa i'rãi waihu'u wẽ na 're ihâimana mono zô, duré ni'wa hã ãma 're iwata mono zô.

³ Tane nherẽ, uburé ma tô 're dasipizari za'ra. Aiwapsi te dawasété na si 're dahâimana za'ra. Ni'wa marĩ iwẽ si te te 're i'ab'manharĩ mono hã hâimana õ di. Tô sena ibaba uptabi.

⁴ Tahawa, te 'Re ihâimana u'âsi mono sima tinha ãne: “E iwasété norĩ hã, 'maihâimana õ di, marĩ iwẽ te te i'maiwaihu'u da hã. Õ norĩ hã te ĩnhib'a'uwẽ nhimarĩ zô hâimana nhipese sina te te sima 're i'wani za'ra mono da si, 're hâimana za'ra. Ĩma ta norĩ hã 're mreme zusi mono õ di duré.”

⁵ Tahawa, te za ta norĩ pahi te tirẽrẽ'ẽ za'ra, niwa ãne na pahi uptabi za'ra wa, irẽrẽ'ẽ za'ra õ na. E marĩ wa, 'Re ihâimana u'âsi mono te za tinhitob'ru norĩ hi na hã te te ãma ropé. 'Re ihâimana u'âsi mono hã ma tô siwi wẽ'õ za'ra. Taha wa, Izaraéu nhihudu norĩ hã te za uburé pese ãma ai'uté za'ra.

⁶ Izaraéu nhihudu norĩ nho'reptuzé, Zeruzalẽ hawi ihâimana da hã, iwẽ aré. 'Re ihâimana u'âsi mono, Zacoho nhihudu norĩ apâ te te simarĩ pese za'ra wamhã, te za to sina oto 're hâimana za'ra.