Salmu 5 - ꞌRe Ihâimana Uꞌâsi Mono Zadawa Wasuꞌu

Dawi, 'Re ihâimana u'âsi mono nhimipawaptobzé, te te iwaptẽrẽzé wasu'u

Dawihi nho're.

¹ Uburé Danhib'apito, ma'ãpé ĩmreme hã wapari. Duré ma'ãpé, ĩwazidi hã wapari.

² Ĩnhib'apito, ĩte 'Re ihâimana u'âsi mono, ma'ãpé ĩpawaptob da, te ãma aiwi irowaptẽrẽzé hã wapari! E marĩ wa. Aiwi si te ãma rowaptẽrẽ wa, Uburé Danhib'apito!

³ Mararé sidâpâsi te nasi ĩmreme hã 're iwapari u'âsi mo. Bâdâ 'rãiwatobro wi, ãma aima 're ĩmreme mono wamhã, wa za ãma ĩzada'âbâzéb zô 're ĩnhimipari.

⁴ 'Re ihâimana u'âsi mono, a hã marĩ iwasété ma, i'atozé hã aima ihâimana õ. Duré marĩ iwasédé asiré 're ihâimana mono da hã tãma 're waprosi mono õ di.

⁵ 'Râwi 're isi'madâ'â ze za'ra mono norĩ hã, atõmobre 're isimasa mono da hã aima wẽ õ di. Duré marĩ iwasété si, te te 're i'manharĩ za'ra mono norĩ hã, te a hã 're i'a'ruiwapari u'âsi mo.

⁶ A hã isadawa nhipese norĩ hã te 're i'anho'remhâri mo. Te duré isipãrĩ ze norĩ hã, senai õ na 're ihâimana za'ra mono norĩ me 're i'awẽ'õ pese mo.

⁷ Tane nherẽ, asimizawizé sa'ẽtẽ na aima 're ihâimana mono zarina, asõrõwa u hã ãma ĩzébré waihu'u pese di. Ĩma aiwazéb sina, wa za ĩhi'rãtitõ aima 're ĩsimasisi u'âsi, asõrõwa 'ri iwazéb zahi 'remhã.

⁸ Uburé Danhib'apito, ma'ãpé ate bâdâdi iwẽ na hã 're ĩzaprõni wẽ u'âsi mono, ĩnhitob'ru norĩ ĩzada 're ihâimana za'ra mono norĩ wi. Duré ate bâdâdi hã ma'ãpé ĩma hiri wẽ na, ĩnhowamhã!

⁹ Ĩnhitob'ru norĩ nhoto hawi imreme za'ra hã umnhasi õ di, ta norĩ hã da'uprosizém na si te te sima 're rosa'rata u'âsi za'ra mono wa. Isõ're'ré za'ra hã aiwa da'ru sitob ãna 'ridawa haré 're isimi'wara mono ne. Tinhoto na te ta norĩ hã mreme su'u nherẽ, timreme amo na hã te te dama 're robzanhamri za'ra.

¹⁰ 'Re ihâimana u'âsi mono, ma'ãpé ta norĩ nhimi'manharĩzéb zarina tãma rob'manharĩ za'ra na. Tinhimirowa'õno, 'râwi te te sima 're i'manharĩ za'ra mono hawim na, te te 're irobzépata za'ra mono u, 're irere'e mono da si, ibâre hã. Ma'ãpé ta norĩ hã asõ're hawimhã 're azatõrĩ mono, tiwasété si hã te te 're 'manharĩ u'âsi za'ra mono wa, duré apâ aiwi 're sipizari za'ra mono wa.

¹¹ Tane nherẽ, ni'wam norĩ hã, a hã i'wawib za'ra 're aimapa mono da, sima sô 're isõpré mono hã te za tãma rowẽ sina 're hâimana za'ra. Te za pẽ'ẽto sina 're sõ're u'âsi za'ra. Asimi'madâ'âzém na i'wawi 're aimapa u'âsi za'ra mono. Asawi'wa norĩ si te ai'ãma rowẽ 're ihâimana mono hã te te 're sõpẽtẽ za'ra.

¹² Uburé Danhib'apito, asimiroti wapari pese 'wa norĩ ma hã te iwẽ si tãma 're i'apisutu u'âsi mo. Duré asimizawi pese zéb zarina te ibaihâ zapoto 'manharĩ na dasi'wawi 're idasimapa za'ra mono ne i'wawib za'ra hã 're aimapa mo, ta norĩ 'wawi.