Salmu 47 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, uburé dama apito na 're ihâimana mono zé wasu'u

¹ Uburé a'uwẽ norĩ, rowẽ te, ma'ãpé asib'ratap to'o za'ra wa'aba! Asõ're 'rãihâ na, 'Re ihâimana u'âsi mono ãma aiwata za'ra wa'aba.

² E marĩ wa. Uburé Danhib'apito, danhipai u pese 're hâimana mono wa, wazé pese na. Ta hã apito iwaihu'u pe, isiptede te uburé dama i'rãnho'õmo na dama 're hâimana, daro mono bâ.

³ 'Re ihâimana u'âsi mono, ma tô daro mono bâ a'uwẽ norĩ hã wanhiptetezé zahâpâ 're hâimana za'ra mono da hã, tãma pisutu za'ra. Ta hã ma tô wama pisutu za'ra, uburé a'uwẽ norĩ ma, i'rãnho'õmo na 're wahâimana za'ra mono da.

⁴ Ta hã ma tô ti'a wama pisutu za'ra, iwa 're iwahâimana za'ra mono zéb da hã, isib'a'uwẽ norĩ tãma isawi pe, ti'a te te sima 're i'madâ'â ze za'ra mono hã.

⁵ 'Re ihâimana u'âsi mono, tisimasisizéb u ma tô sai'u, rowẽ te, 're idahãsi mono siwaprã. Rowẽ te, te danhimnhihârâzém na hã amnhihãsi ni.

⁶ 'Re ihâimana u'âsi mono ãma asõ're na hã ãma asadawa'a'a wa'aba. Wanhib'apito ãma asõ're na hã ãma aiwata za'ra wa'aba.

⁷ 'Re ihâimana u'âsi mono ãma asõ're na ãma 're aiwata za'ra wa'aba mono, ta hã daro mono bâ uburé a'uwẽ norĩ ma, apito na 're hâimana mono wa.

⁸ 'Re ihâimana u'âsi mono, te tisimasisizé iwẽ uptabi iwazéb zahi na 're sãmra. Ta hã te a'uwẽ norĩ i'rãnho'õmo na hã te te 're ab'madâ'â.

⁹ Ti'ai ãma uburé a'uwẽ norĩ ma i'rãnho'õmo na 're ihâimana za'ra mono hã te Abra'ãhã te, 'Re ihâimana u'âsi mono nhib'a'uwẽ siré 're si'rã'õtõ, ti'ai ãma uburé dama i'rãnho'õmo norĩ nhiptetezé hã 'Re ihâimana u'âsi mono ma, 're hâimana mono wa. Ta hã te uburé marĩ nhipai u siptete na hã 're hâimana.