Salmu 45 - ꞌRe Ihâimana Uꞌâsi Mono Zadawa Wasuꞌu

Apito mrozém na danho'rezé wasu'u

¹ Damreme iwẽ hã te ĩpẽ hã te te sina 're sito, apito wasu'u wẽ na ĩnho're na te ãma romnhihâtâ ré hã. Ĩnhoto hã romnhihâtâ 'wa iwẽ te rowawizém ne hã te ĩma tihâiba.

² Apito, a hã uburé aibâ norĩ nhipai u i'ai'madâ'â zei uptabi. Duré aimreme iwapari iwẽ iwapari ze. 'Re ihâimana u'âsi mono, ma tô iwẽ hã õne u'â te te aima 're pisutu.

³ Apito, asiptete uptabi, duré aiwaihu'u pe, aiwẽ uptabi hã, ma'ãpé ai'usisizém na sib'ézé 'wapa asima sẽrẽ.

⁴ Aiwaihu'u pese zarina ma'ãpé awaru na dasisô 're idapra mono ne, da'ãma 're ai'uté mono da, dazô aiwatobro, sena na duré i'uwaibaba na asimiroti 'wawi 're aimapa mono da. Asiptete zarina te za duré da'ahâ ãma 're ĩ'ai'uté mo.

⁵ Ate ti i'rã'wa 'wa pe hã te asitob'ru norĩ hã te te 're siri zapu'u za'ra. Tahawa, a'uwẽ iwamri mono bâ te aipara ãmamhã 're rere'e u'âsi.

⁶ 'Re ida'a'madâ'â mono zé hã 'Re ihâimana u'âsi mono te te aima isõmri hã, te za õne u'â 're hâimana. Apito, a hã te sena na i'uwaibaba na si dama i'rãnho'õmo na hã 're aihâimana mo.

⁷ Dawẽ na 're idanomro mono zép si, te 're isawi u'âsi mo. Dawasété na 're idanomro mono zép si hã te 're i'ruiwapari u'âsi mo. Tahawa, ate 'Re ihâimana u'âsi mono ma tô aipisutu. Taha zarina ma tô robzezé hã te te aima 're anhomri, uburé ti'ai ãma danhib'apito 're ihâimana za'ra mono norĩ nhipai u hã.

⁸ Ai'uzazé hã mirra na duré aro'é na rob'rãi wa'u zadaze nhisi norĩ na hã hâ zadaze ti. Apito, te duré rowamreme'wa norĩ hã te te aima 're ropta'a za'ra, asõrõwa 'ri 'rãihâ 're, uhâ nhisi'reti 'wa'ratahi 'manharĩ na da te 're i'ri wamnarĩ za'ra mono zé wa.

⁹ Asipi'õ norĩ 'remhã te darob amoi ãma apito norĩ 'ra sipi'õ hã 're si'ubumro. Duré ate apito simasisizém nhimire niwĩ, te duré aimro dama ipire i'rãnho'u hã 're sãmra, ẽtẽ waipo pré oru uptabi na i'uza 'manharĩ ré.

¹⁰ Apito siwẽ, ma'ãpé ĩnhimiroti hã wapari pese ane: “Asiré a'uwẽ norĩ ãma te za aipo're si'â, duré asisãnawã norĩ ãma hã.

¹¹ A hã ai'madâ'â zei wa, te za apito hã sima ai'madâ'â ze pese. Ta hã te za 're iwazé wẽ mo, tô asib'apito wa.

¹² Apito siwẽ, 'ri nho'u Tiru na isisi hawi a'uwẽ hã te za aima tinhoprubzé hã we 'wasa. Tame isimarĩ pese norĩ, te za iwẽsãmri za'ra zéb zô hã te te sina 're ai'madâ'â za'ra.”

¹³ Apito mro hã 'ri 'rãihâ ãma ihâiba hã i'madâ'â zei uptabi! I'uza hã isidi surure na ẽtẽ waipo pré oru uptabi na i'manharĩ.

¹⁴ Apito siwẽ uza hã i'manharĩ ihâiwamnarĩ sipu'u pese ré te za apito u hã saprõni ni. Te za duré dasina damro wa, ipawapto'wa norĩ hã isiré ai'aba'ré.

¹⁵ Ta norĩ hã tãma rowẽ sina duré to sina te za isõrõwa 'ri 'rãihâ u hã asisi.

¹⁶ Apito, ai'ra norĩ hã te za aihi'rata norĩ nhowa're'remhã dama i'rãnho'õmo na hã 're hâimana za'ra. A hã te za daro mono bâ uburé i'rãnho'õmo na te te 're ida'madâ'â za'ra mono da hã 're i'apisutu mo, ai'ra norĩ hã.

¹⁷ Tahawa, ai'ãma ĩnho're zarina te za aiwasu'u wẽ na hã ãma 're dasipo're pu'u u'âsi za'ra. Taha zarina te za duré ai'ãma 're dawata u'âsi za'ra, õne u'â.