Salmu 41 - ꞌRe Ihâimana Uꞌâsi Mono Zadawa Wasuꞌu

Hâzé na 're isãmra mono nhimirowaptẽrẽzé wasu'u

Dawihi nho're

¹ Tãma 're rowẽ uptabi za'ra mono di, isimarĩ'õ te te 're ipawaptob za'ra mono norĩ ma hã. E marĩ wa. Ta norĩ hã ropire sô 're wairébé mono wamhã, Uburé Danhib'apito te te 're apawapto mono wa!

² Uburé Danhib'apito, te za i'wawib za'ra hã 're simapa. Te za hâiba ré 're ihâimana za'ra mono zé hã te te tãma 're apibui pese. Te za duré rowẽ hã te te tãma 're anhomri, daro 're ihâimana za'ra mono zéb ãma. Isitob'ru norĩ nhiptetezé ma, te te rẽme za'ra õ di za.

³ Hâzé wa, tinhimiwaptâ wa, 're simi'wara mono ré hã, te za Uburé Danhib'apito te te 're anhiptete upari. Te za duré apâ ihâimanazé isiptede hã te te tãma 're anhomri.

⁴ Wa hã tinha ãne: “Uburé Danhib'apito, wa hã wa tô aiwi ĩwasété. Ĩ'ãma aiwamri na, ma'ãpé ĩpese apâ.”

⁵ Ĩnhitob'ru norĩ te te nasi ĩ'ãma wasété za'ra wamhã, te nasi ĩ'ãma sisadanharĩ za'ra ãne: “E niwa te za bété dârâ, isisi na dapo're simrami za'ra da hã.”

⁶ Ta norĩ hawi te te ĩ'mazabu da, wẽ ĩtẽme 'maimorĩ wamhã, sena na hã te te ĩma 're 'mairobzanhamri mono õ di. Te duré ĩhâiba na si romreme hã taré te te sima 're a'ubumro, apâ ĩhawi 're pusi mono wa, te te ãma sima 're ropé za'ra mono da hã.

⁷ Uburé ĩwẽ'õ'wa norĩ hã te ti'awi pesere sadawa 'rasi sina ĩhâiba na hã te te sima 're robzanhamri za'ra. Te duré ropire hã ĩzô 're ipusi mono da si, te te ĩ'ãma 're rosa'rata wasété u'âsi za'ra.

⁸ Tahawa, te ãne te te sima 're nharĩ za'ra, ĩ'ãma: “Ihâzé pire te te 'morõwĩrĩ wa, duré apâ iwahutu zahu da hã mare di za.”

⁹ Ĩsiwaihu iwẽ te 're i'umnhasi mono hã, ma tô taha zama ĩzada hã 'rãihaiwamna, ĩsiré 're isai u'âsi mono hã.

¹⁰ Uburé Danhib'apito, ma'ãpé ĩ'ãma aiwamri na! Ma'ãpé apâ ĩwahutu, ĩnhitob'ru norĩ da, ĩsi'ruiwa'âbâ hâ!

¹¹ Tawamhã ta norĩ te te ĩ'ãma ai'uté za'ra da hã mare di za. Ãne wamhã, wa za waihu'u za, a hã ĩwẽsãmri na hã.

¹² Te za duré 're ĩpawaptob u'âsi mo, i'uwaibaba na si marĩ te 're ab'manharĩ mono wa. Duré õne u'â asõ'remhã te za 're ĩnhimizusi mo.

¹³ Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're wawata za'ra wa'aba mono, õne u'â si'utõrĩ ãna! Tane tô! Tane tô!