Salmu 4 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, ĩ'wawi isimapa'wa na 're ihâimana mono zé wasu'u

Dawihi nho're

¹ 'Re ihâimana u'âsi mono, ĩ'wawi 're i'aimapa mono, ma'ãpé te ãma i'ai'mahârâzém na we ĩzada'âbâ! Ropire na ĩhâimanazém na, we ĩpawapto na. Duré ĩ'ãma aiwamri wamhã, ma'ãpé ãma aima ĩmremezé hã wapari!

² Aibâ dama aipire aba norĩ, e niwa te za ĩ'ãma iwasété za'ra wa'aba zém na hã ãma irosahâri za'ra wa'wa. Duré e momo te za marĩre tarére hã 're isawi waibui wa'aba mono zé hã i'rãsutu za'ra wa'wa. E niwa te za duré senai'õ zarina 're i'anomro aba mono zém na hã ãma irosahâri za'ra wa'wa.

³ Ma'ãpé ãma 're aipo're pu'u u'âsi za'ra wa'aba mono, Uburé Danhib'apito, 'râwi te te sina 're i'umnhasi za'ra mono hã aimawi na te te 're i'madâ'â wẽ za'ra mono na. Wa hã, Uburé Danhib'apito wi, te 're rowaptẽrẽ mono wamhã, te tô te te 're ĩwapari, tãma 're ĩmreme mono zém na hã.

⁴ Nimahã na asiti'ru za'ra wa'aba wamhã, ma'ãpé taha zarina 're aiwasété za'ra wa'aba mono tõ. Duré asiwaprosi asimiwaptâ ãma ari'iwi pese 're asimi'wara aba mono wamhã, te za asimirosa'rata na 'râwi 're asi'madâ'â za'ra wa'aba mo.

⁵ 'Re ihâimana u'âsi mono nhimipisutuzéb zarina si te za asimizama zata na tãma 're asõprub za'ra wa'aba mo. Te za duré õhõ si asina 're i'umnhasi za'ra wa'aba mo.

⁶ Da'ahâ uptabi na te ãne 're damreme zusi: “E 'wa hã te za iwẽ hã te te wama 're anhomri. Tahawa, Uburé Danhib'apito, ma'ãpé iwẽ hã wa'ãma 're a'madâ'â mono.”

⁷ Ĩpẽ'ẽ 're, rowẽ isa'ẽne ĩma isẽrẽ hã sa'ẽtẽ uptabi di, mram na rowẽ te, sa'ẽtẽ na da te dasima ãma 're iromhu'u za'ra mono norĩ nhipai u.

⁸ 'Re ĩza'wari mono wa, ĩma rowẽ sina wa 're ĩnhotõ. E marĩ wa. Uburé Danhib'apito, a hã ĩsima iwẽ na 're ĩhâimana mono zéb da hã, ĩma sõmri wa.