Salmu 34 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono nhimizawi pese zé wasu'u

Apito Abimelequihi nho're, Dawi hã ma tô 'rã nhipese sina i'rãsiwamnarĩ ne tihâiba. Tahawa, Abimelequi ma tô oto satõ. Tawamhã apito wi siwazere pari, ma tô Dawi hã ã tinho're na ãma rob'ui'éré.

¹ Uburé Danhib'apito ãma, õne u'â wa za bâtâ sidâpâ ãma 're ĩwata u'âsi. Ĩzaihâ na wa za tô te sazâri ãna ãma 're ĩwata u'âsi.

² Marĩ iwẽ te te 're i'a'manharĩ mono zé u'âbâ wa za ãma 're ĩwata. Da te 're iwati'i za'ra mono norĩ, ãne hã te te 're wapari za'ra mono wamhã, te za tipẽ'ẽ na te te sima 're rowẽ za'ra.

³ Ma'ãpé ĩsiré Uburé Danhib'apito iwaihu'u pese na dama 're wasu'u wẽ za'ra wa'aba mono, sõ'awi. Simisutu Uburé Danhib'apito nhisi ãma wa za 're wawata za'ra.

⁴ Wa hã, Uburé Danhib'apito nhimipawaptobzé te tiwi waptẽrẽ wamhã, ma tô ãma ĩzada'â. Ĩpahi wamhã, ma tô ĩnho'reptu.

⁵ Da te 're iwati za'ra mono norĩ hã, ta hã te te siwi 're 'madâ'â mono wamhã, te te ãma sima 're rowẽ za'ra. Ãhã wa, niwa te te 're i'umnhasi baba za'ra mono da hã mare di.

⁶ Wa hã, ĩnhimarĩ'õ robzépata'wa, wa tô ĩhârâ 'rãihâ na hâ. Tahawa, Uburé Danhib'apito ma tô ĩwapa. Taha zarina, ma tô ĩma ropire hawimhã ĩnho'reptu.

⁷ Hâiwa ãma Uburé Danhib'apito ma, Romhuri'wa te uburé te te 're iwazéb za'ra mono norĩ 'wawimhã 're hâimana, marĩ isimimnhasi wi, te te 're a'madâ'â mono da.

⁸ Ma'ãpé niha zô tẽ'ẽ za'ra wa'aba, Uburé Danhib'apito wẽ na 're ihâimana mono na waihu'u za'ra wa'aba da. Ni'wam norĩ hã 'Re ihâimana u'âsi mono, i'wawi 're isimapa za'ra mono zéb zô 're isõpré mono norĩ si, te za to sina hã 're hâimana u'âsi za'ra.

⁹ Uburé Danhib'apito nhib'a'uwẽ norĩ, ma'ãpé 're wazé pese za'ra wa'aba mono. E marĩ wa. Marĩ zô tiwi 're rowaptâ'â waihu'u za'ra mono õ wa, 'Re ihâimana u'âsi mono te te 're iwazé pese za'ra mono norĩ wi hã.

¹⁰ Hu'u zérépa norĩ wi, isa zô tiwi 're ro'wanhi'riti za'ra mono wamhã, te za mra hã te te 're sépata za'ra. Tanei õ di, Uburé Danhib'apito nhimipawaptobzéb zô sima 're isõpré mono norĩ wi hã, tiwi sô 're robaba za'ra mono õ di, marĩ zô.

¹¹ Ĩsiwaihu ipréduptém norĩ, we ai'aba'réi wa'aba. Ma'ãpé asiwi ĩwapari za'ra wa'aba. Uburé Danhib'apito wazébzém na, wa za ãma aima rowahutu za'ra wa'wa.

¹² E asima wẽ za'ra wa'aba õ di bété, ato sina 're i'aihâimana za'ra wa'aba mono zéb da hã. E duré asima wẽ za'ra wa'aba õ di, 're aihâimana hâ za'ra wa'aba mono da hã.

¹³ Tahawa, ma'ãpé asoto na aimreme iwasété na 're nharĩ za'ra wa'aba mono tõ. Duré asadawa nhipese na dama 're rowasu'u za'ra wa'aba mono tõ da, 're asi'madâ'â pese za'ra wa'aba mono.

¹⁴ Iwasété wi asa'o hâ za'ra wa'aba, iwẽ si oto 're 'manharĩ za'ra wa'aba mono da. Duré rowẽ na 're i'aihâimana za'ra wa'aba mono zéb zô si, 're i'asõpré wa'aba mono zéb zarina, te za oto uburé marĩ iwẽ si hã 're i'manharĩ za'ra wa'aba mo.

¹⁵ 'Re ihâimana u'âsi mono hã te sena na 're ihâimana za'ra mono norĩ hã te te 're ab'madâ'â pese. Te duré te te tiwi 're irowaptẽrẽ za'ra mono zé hã te te 're awapari.

¹⁶ Tane nherẽ, marĩ iwasédé te te 're i'manharĩ za'ra mono da si, te 're hâimana, ta norĩ oto 're dâ'â za'ra mono wa, õne haré ãma 're dapo're simrami su'u za'ra mono da.

¹⁷ Sena na 're ihâimana za'ra mono norĩ, Uburé Danhib'apito te te 're 'mahârâ za'ra mono wamhã, te za imreme hã te te 're awapari. Duré taha zarina te za ropire hawimhã te te 're anho'reptu.

¹⁸ Robzei ãna 're isi'ubumroi mono norĩ 'ratamhã, te 'râwi 're hâimana. Te za duré te te 're anho'reptu, ipẽ'ẽ 're rowẽ zô tiwi sô 're irobaba za'ra mono norĩ hã.

¹⁹ Wẽ na 're inomro mono norĩ hã, te tô ropire na te te 're robzépata za'ra. Tane nherẽ, Uburé Danhib'apito, te uburé ropire mono hawimhã te te 're anho'reptu.

²⁰ Ta hã te duré ihâiba na ihi mono hã te te tãma 're ab'madâ'â pese, 'maihisihâri tõ da hã.

²¹ Iwasété norĩ hã, marĩ te te 're i'manharĩ wasété za'ra mono zarina te za 're isi'utõrĩ mono zé hã te te sisô 're sani za'ra. Duré wẽ na 're inomro mono norĩ 'rui'wa norĩ ma, te za 'Re ihâimana u'âsi mono hã te te tãma 're arob'manharĩ wasété.

²² Uburé Danhib'apito, te tinhib'a'uwẽ norĩ pẽ'ẽzani hã te te 're anho'reptu. Duré i'wawi 're isimapa za'ra mono zéb zô 're isõpré mono norĩ si, te za tinhimihâzé hã te te tãma 're aba'a.