Salmu 2 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, apito da, te te ipisutuzé wasu'u

¹ E marĩ da, te a'uwẽ norĩ, 'Re ihâimana u'âsi mono na rosa'rada hã te te sima 're 'manharĩ wasété za'ra. E marĩ da, te simiza'rese ãna tarére na rosa'rada hã te te sima 're 'manharĩ za'ra.

² Ti'ai ãma isib'apito norĩ hã, duré dama i'rãnho'õmo norĩ hã te Uburé Danhib'apito zada te te sima 're rowa'õtõ za'ra, duré za apito te te ipisutu da zama.

³ Tawamhã ã hã iwasété norĩ hã te ãne te te sima 're nharĩ za'ra: “Oto isiptete zahuré zé hã wa te tiwi prub za'rare wa'aba. Wapawasisi ré ne siptete na te te 're iwa'a'madâ'â zahuré mono zé hã wa za tiwi wasina sinarĩ za'ra ni za.”

⁴ Tawamhã Uburé Danhib'apito, hâiwa ãma 're isãmra mono hã te tisimasisizé ipire hawi we ta norĩ ãma hã 're sihâ u'âsi. Te duré ãma 're wa'ẽi u'âsi za'ra.

⁵ Tawamhã siti'rui pese wa, te za tinhimi'amhâzépa na hã duré da'a'rãmi pese.

⁶ Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã ẽtẽ 'rãihâ nhisi ĩte iwazéb zahi ãmamhã.”

⁷ Tawamhã apito te tinha ãne: “Uburé Danhib'apito te te ĩma iwaihu'uzé, wa za dama sadawa 'mahâ. Uburé Danhib'apito, te ĩma tinha ãne: ‘A hã, ĩ'ra. Ã bâtâ na wa tô aimama na aima 're ĩhâimana mono da hã ĩsi'ãma a'ube.

⁸ Ma'ãpé ĩwi rowaptẽrẽ. Tawamhã uburé a'uwẽ iwamri mono bâ ãma isitom na wa za te aima 're anhomri. Uburé pese te za aima hã 're dahâimana za'ra za, daro mono bâ.

⁹ Tawamhã isi'uwazi waré na te za ta norĩ hã 're i'anhi'ẽi'rare mo, zé'a na ub'rẽ da te 're iprub za'ra mono ne.’ ”

¹⁰ Tahawa, apito norĩ, ma'ãpé asimiza'rese 're aihâimana za'ra wa'aba mono. Dama ipire norĩ, ma'ãpé ipire na te aima iwaihu'u za'ra wa'aba zém na 're asi'madâ'â pese za'ra wa'aba mono.

¹¹ Uburé Danhib'apito ãma wazép sina, te za ãma 're aiwata za'ra wa'aba mo, isõ'remhã 're airẽrẽ'ẽ za'ra wa'aba mono sina.

¹² Ãnei õ wamhã, si'aba'ré na asada sahi za'ra wa'aba wamhã, te za ai'utõrĩ 'wa. Ni'wam norĩ hã 'Re ihâimana u'âsi mono, i'wawi 're isimapa za'ra mono zéb zô 're isõpré mono norĩ si, te za to sina hã 're hâimana u'âsi za'ra.