Salmu 19 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono te te i'aropoto mono paramhã, isiptetezé isihâi'rézé wasu'u

Dawihi nho're

¹ Hâiwa na 're isimasa mono hã 'Re ihâimana u'âsi mono waihu'u pese uptabi na 're ihâimana mono zé te wasu'u, duré te te i'aropoto mono zé tinhib'rata na.

² Bâtâ sidâpâ te te 're wasu'u, iwaihu'u pe hã. Mara sidâpâsi te duré mara hâiba amoi u hã te te 're hâi'ré.

³ Hâiwa na 're isimasa mono hã mreme õ nherẽ, duré da te 're wapari za'ra mono õ nherẽ, te tô isimi'manharĩ wẽ zé hã sina te te dama 're wasu'u za'ra.

⁴ Tane nherẽ, iwasu'uzé hã ma tô uburé ti'ai mono bâ te te datẽme ropé. Duré 'Re ihâimana u'âsi mono hã ma tô bâdâ 're isa mono zéb da, ro te te tãma ipisutu ãma tisã.

⁵ Mararé sidâpâsi te bâdâ hã ta hawimhã toi uptabi sina hã 're pusi, aibâ 're mro za'ra mono wa, to sina 're ihâimana za'ra mono ne, duré isisamroi'wa norĩ sisada 're sisa'rei mono da, pẽ'ẽ toi uptabi wa, sirési sina 're isisisi mono ne.

⁶ Bâdâ hã te hâiwa na'rata hawimhã 're pusi. Te duré tawamhã hâiwa na'rata hâiba amoi u hã 're ne, marĩ norĩ hã iwa'ro wi, 're sima'uri waihu'u za'ra mono ãna.

⁷ Uburé Danhib'apito nhimiroti hã wẽ uptabi na te 're hâimana. Te duré wanhiptetezé ité hã te te wama 're anhomri. Tô ibâre isimiroti hã umnhasi na dama 're ihâimana mono zéb zarina, te rowaihu'u prãi'wa norĩ ma, rowaihu iwẽ hã te te tãma 're anhomri.

⁸ Uburé Danhib'apito marĩ na te te ãma dama 're irowahutu mono zé i'uwaibaba na si, te dapẽ'ẽ 're rowẽ za'ẽtẽ zé hã te te dama 're anhomri. Duré isimiroti i'uptabi na sõ'awi marĩ te te wama 're ahâi'ré mono wa, te duré wa'rãi 'remhã te te wama 're arowa'a.

⁹ Uburé Danhib'apito, da te 're iwazé za'ra mono zé hã iwẽ. Te za õne u'â 're hâimana. Duré te te dama 're i'arowairébé mono zé hã, i'uwaibaba na si, tô sena na si.

¹⁰ Sô rob'ruiwapari za'ẽtẽ uptabi di, ẽtẽ waipo pré oru nhipai u, tô oru iwazari'õ iwẽ uptabi nhipai u. Duré ropĩni ise nhipai u, tô ropĩ iwazari'õ ise uptabi nhipai u te 're hâimana, isimiroti hã.

¹¹ Taha na te wa hã asib'a'uwẽ ãma 're ĩpo're pu'u wẽ u'âsi mo. Duré aimreme te 're iwapari pese mono zarina, wa ĩpawa'âbâzé iwẽ hã te ĩsima te 're awaibui u'âsi.

¹² E 'wa hã marĩ na te te 're i'upai mono zé hã te te sina 'madâ'â waihu'u pese bâ. Apito, ma'ãpé ĩpẽ'ẽ 'remhã ĩma pari, ĩwasédé te 're i'a'manharĩ mono zé hã, te waihu'u ãna.

¹³ Duré ĩwasédé te ĩsima iwẽzéb zarina, te 're i'a'manharĩ mono hã ma'ãpé tiwi ĩzawi na. Õne u'â te te 're ĩwada'uri mono tõ da hã ma'ãpé tiwi 're ĩnhiptete mono. Tawamhã wa za sena na i'uwaibaba na si 're ĩhâimana. Wa za ĩwasédé ipire nhiti ĩsima iwẽ na oto 're mo, aimreme te 're iwapari mono õ zém na 're ĩhâimana mono nhiti hã.

¹⁴ Uburé Danhib'apito, ẽtẽ tõmo wawẽ ne ĩma 're i'aihâimana mono hã, duré ĩ'wawi 're i'aimapa mono, ĩmreme hã, duré ĩnhimirosa'rada hã 're iwẽsãmri mono da si, ĩma iwẽ hã.