Salmu 140 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, da'wawi 're simapa mono da, iwaptẽrẽzé wasu'u

Dawihi nho're

¹ Uburé Danhib'apito, ma'ãpé iwasété norĩ ĩma ba'a! Duré ma'ãpé aibâ isipãrĩ ze norĩ wi hã ĩ'wawi 're asimi'rãmi mono.

² Ta norĩ te te sima 're irowa'õtõ wasété za'ra mono na si te 're hâimana za'ra. Te duré dasi'wapé na te te ãma dawi 're ro'wa'ré u'âsi za'ra.

³ Õ norĩ nhoto hã duré aiwa wahi ne. Duré imreme za'ra hã tô aiwa wahi 'wa wa'u isé uptabi ne.

⁴ Uburé Danhib'apito, iwasété norĩ nhib'rata wi hã ma'ãpé ĩ'wawimhã 're asimi'rãmi u'âsi mono! Duré aibâ isipãrĩ ze norĩ, tinhimi'manharĩ wasété za'ra na te te siwi ĩ'marõwĩrĩ da, ĩzô 're irĩtĩ za'ra mono norĩ wi hã, ma'ãpé ĩ'wawimhã tô 're aimapa u'âsi mono.

⁵ Aibâ 'râwi 're isi'madâ'â ze za'ra mono norĩ, ma tô abaze mramizém na ne ĩzada siwi ãma rob'manha. Duré wasété uptabi na si 're ihâimana za'ra mono norĩ, ma tô ĩnhibâdâdi wa abazipara na ãma siwi ro'razâ, taha na te te ãma siwi ĩ'âri da.

⁶ Ãhã wa, Uburé Danhib'apito, wa aima tinha ãne: “A hã ĩte 'Re ihâimana u'âsi mono.” Uburé Danhib'apito, ma'ãpé ĩwapari, te ãma aiwi irowaptẽrẽzém na!

⁷ Uburé Danhib'apito, ĩte 'Re ihâimana u'âsi mono Ĩnho'reptui'wa i'asiptete uptabi, a hã ma tô dasi'wapéi wamhã, ĩ'wawi 're asimi'rãmi u'âsi mo.

⁸ Iwasété norĩ, marĩ te te siwi 're i'manharĩ mono da hã tãma 're sa'ré za'ra mono tõ, Uburé Danhib'apito, tô'ã! Duré ta norĩ te te sima 're irowa'õtõ wasété za'ra mono zarina, marĩ te te sima ãma 're uwaimrami za'ra mono da hã, tãma 're arowairébé mono tõ, 're si'madâ'â ze za'ra mono tõ da.

⁹ Tãma waprosi za'ra tõ, ĩnhitob'ru norĩ te te da'ãma 're i'ai'uté za'ra mono da hã. Ma'ãpé tãma 'manharĩ za'ra na, ĩma isimi'amhâzépa za'ra zép si isisiwi waptã'ã za'ra da hã, ĩhâiba wa'rãmi.

¹⁰ Õ norĩ nhisiwimhã pré'a 're irere'e mono da si, ibâre hã. Unhama ré ab're u da te isãmra da si, duré ibâre hã, ta hawi apâ 're idawairébé waihu'u mono õ u.

¹¹ Isoto wasété norĩ, ti'ai 'remhã wẽ na siptete na 're hâimana za'ra mono tõ da si, ĩma iwẽ hã. Duré isipãrĩ ze norĩ zarina, ropipa si te te tô 're samarĩ za'ra mono, 're idâ'â za'ra mono zéb u.

¹² Uburé Danhib'apito, ĩma waihu'u pese di, marĩ zô tiwi 're iro'wanhi'riti za'ra mono norĩ 'wawi 're i'aimapa mono zé hã. Duré i'uwaibaba na si isimarĩ'õ norĩ ma, marĩ tãma 're i'ab'manharĩ mono zéb zama ĩma waihu'u pese di.

¹³ Aimreme te te 're iwapari pese za'ra mono norĩ hã, te za tô ai'ãma 're wata za'ra, duré i'uwaibaba na 're inomro mono norĩ hã te za apto'o ré hã asõ'remhã 're hâimana za'ra.