Salmu 14 - ꞌRe Ihâimana Uꞌâsi Mono Zadawa Wasuꞌu

Isimiza'rese'õ norĩ wasu'u

Dawihi nho're

¹ Isimiza'rese'õ norĩ te tipẽ'ẽ na te te sima 're nharĩ za'ra ãne: “Ĩma hã, 'Re ihâimana u'âsi mono hã hâimana õ di.” Ta norĩ hã te iwasété si 're hâimana za'ra. Tahawa, te marĩ iwasété si te te 're 'manharĩ za'ra. Ni'wa hã iwẽ te te 're i'manharĩ mono hã ihâimana'õ uptabi.

² Uburé Danhib'apito hâiwa hawi te we te te 're da'a'madâ'â, ni'wa i'rãi waihu'u wẽ na 're ihâimana mono zô, duré ni'wa hã 'Re ihâimana u'âsi mono ãma si 're iwata mono zô.

³ Tane nherẽ, uburé ma tô 're dasipizari za'ra. Aiwa te dawasété na si 're dahâimana za'ra. Ni'wa hã marĩ iwẽ te te 're i'ab'manharĩ mono hã hâimana õ di. Tô sena ibaba uptabi.

⁴ Tahawa, te Uburé Danhib'apito sima tinha ãne: “E niha ã hã a'uwẽ norĩ, uburé simiza'rese za'ra õ di. Ĩnhib'a'uwẽ nhimarĩ zô, te hâimana nhipese sina te te sima 're 'wani za'ra mono da si, 're hâimana za'ra. Ĩma hã 're mreme zusi mono õ di duré.”

⁵ Tane nherẽ, te za pahi te tirẽrẽ'ẽ za'ra, 'Re ihâimana u'âsi mono, imreme wapari pese 'wa norĩ siré 're hâimana mono wa.

⁶ Ĩsibrob'õ norĩ te te sima 're irowa'õtõ za'ra mono zé hã te za iwasété norĩ hã te te tiwi 're 'wa'rutu za'ra, te te ãma sima 're uwaimrami za'ra mono tõ da. Tane nherẽ, te Uburé Danhib'apito i'wawib za'ra 're isimapa mono 'wa na hã 're hâimana.

⁷ Izaraéu nhihudu norĩ nho'reptuzé hã Zeruzalẽ hawi ihâimana da hã, wa ĩsima wẽ. Uburé Danhib'apito, Zacoho nhihudu norĩ apâ te te simarĩ pese za'ra wamhã, te za to sina 're hâimana za'ra oto.