Salmu 10 - ꞌRe Ihâimana Uꞌâsi Mono Zadawa Wasuꞌu

I'uwaibaba na dama rowairébézéb da, rowaptẽrẽzé wasu'u

¹ Uburé Danhib'apito, e marĩ wa, te romhâ na 're aihâimana mo. E marĩ wa, ma tô robzépata 'remhã, 're aima'uri mo.

² Iwasété norĩ hã te 're si'madâ'â ze za'ra. Te duré isimarĩ'õ norĩ ma, te te 're rob'manharĩ wasété za'ra. Iwasété zarina 're isisitob za'ra mono zéb u, 're irere'e mono da si, ibâre hã.

³ Iwasété norĩ hã te mreme nhiséb ãna marĩ iwasété si te te sima 're i'ruiwapari za'ra mono na 're mreme zusi, isi'madâ'â ze zéb zarina. Duré danhimarĩ zô hâimana nhipese sina te te sima 're ida'wani za'ra mono norĩ hã, te Uburé Danhib'apito ãma te te 're wasété za'ra.

⁴ Aibâ iwasété ma hã, tarére hã 'Re ihâimana u'âsi mono hã. 'Râwi 're isi'madâ'â zei mono zarina, te ãne te te sima 're rosa'rata: “Ĩma hã, 'Re ihâimana u'âsi mono hã marĩ dai õ di.”

⁵ Ã hã aibâ iwasédé hã, sima hã te uburé marĩ i'uwaibaba na si, te te 're ab'manharĩ. Tane nherẽ, 'Re ihâimana u'âsi mono te te da'ãma irowairébézém na hã te te ãma rosa'rata waihu'u õ di. Te duré tinhitob'ru norĩ ãma hã 're wa'ẽi u'âsi.

⁶ 'Râwi te tinhimirosa'rata na te te sima 're nharĩ ãne: “Niwamhã marĩ te te ĩ'marõwĩrĩ da hã mare di. Duré niwamhã marĩ ipire, ĩzô iwatobro da hã mare di za.”

⁷ Imreme wasédé hã isadawa 'remhã 'masisi uptabi di, isadawa nhipe hã, duré te te dama 're i'amhâzépa mono zé hã. Ta hã te da'ãma ro'wa'rutu na si, duré marĩ iwasété na si 're mreme u'âsi.

⁸ Ta hã, 'ri wa'õtõ 'rata sima'uri sina, te za dazô hã 're simipari, marĩ 'manharĩ wasété õ 'wa norĩ hã te te 're 'mapãrĩ mono da.

⁹ Hu'u zérépa ne, te tô 're isima'uri mono zéb ãma hã dazô 're simipari. Te duré si'wawi 're isimapa waihu'u õ norĩ zô hã 're rĩtĩ. Simire sina te sô 're simipari za'ra. Te te da'mai'âri wamhã, te za te te da'ãma robâdâ.

¹⁰ Tawamhã si'wawi 're isimapa waihu'u za'ra mono õ norĩ, da te 're hâiba zu pese za'ra mono wamhã, te za tô ti'ai u hã 're rere'e, iwasété norĩ nhimirob'manharĩ nhiptetezéb zarina.

¹¹ Ã hã aibâ iwasédé hã te za ãne te te sima 're rosa'rata: “'Re ihâimana u'âsi mono hã te te ĩ'ãma rosa'rata dai õ di. Õ hã ma tô si'ubu upsi, te te ĩ'madâ'â tõ da.”

¹² Uburé Danhib'apito, ma'ãpé aipa hã sarõtõ, ã hã a'uwẽ iwasété norĩ ma, rob'manharĩ za'ra da! Ma'ãpé da te ãma 're iro'wa'rutu za'ra mono ãma hã aipo're si'âri tõ!

¹³ E niha te za a'uwẽ iwasédé, 'Re ihâimana u'âsi mono hã te te 're wazéb'õ za'ra. E niha te za duré te te 're rosa'rata za'ra, 'Re ihâimana u'âsi mono te te 're ihâ za'ra mono õ na hã za, wasété nherẽ.

¹⁴ Tane nherẽ, 'Re ihâimana u'âsi mono, a hã robzépatazé, duré robzei'õzé, 're ab'madâ'â mono wamhã, te õne u'â 're da'apawapto mono da hã asima 're iwẽ mo. Duré ni'wam norĩ, si'wawi 're isimapa waihu'u za'ra mono õ norĩ, te aiwétési te te sina 're ai'umnhasi u'âsi za'ra. Tahawa, marĩ zô tiwi 're iro'wanhi'riti za'ra mono hã te õne u'â 're i'apawaptob u'âsi mo.

¹⁵ Ma'ãpé, iwasété norĩ nhiptetezé hã, duré waima na 're ihâimana za'ra mono norĩ nhiptetezéb zama tiwi uprosi za'ra na. Duré ma'ãpé tiwasédé te te 're i'manharĩ za'ra mono zarina hâ za'ra na, iwasété za'ra zô 're robaba mono hâ.

¹⁶ Uburé Danhib'apito, õne u'â te danhipai u apito na hã 're hâimana. Tahawa, te za a'uwẽ iwasété norĩ hã isipti'ai hawimhã sô tirobaba za'ra.

¹⁷ Uburé Danhib'apito, a hã te za da te ãma 're iro'wa'rutu za'ra mono norĩ mreme hã 're i'awapari mo. Te za duré ipẽ'ẽ nhiptetezé hã tãma 're i'anhomri mo.

¹⁸ A hã te za, te te 're irobzépata za'ra mono da, da te 're iwati za'ra mono norĩ zadari hã, duré marĩ zô tiwi 're irowaptâ'â za'ra mono norĩ zadari hã 're i'awapari mo. Te za duré ta norĩ u'âbâ dama 're i'arob'manharĩ mo, a'uwẽ idâ'â pese norĩ, niwamhã apâ marĩ iwasété na hã te te ãma dama 're ropé zahu za'ra mono tõ da.