Ruti 3 - ꞌRe Ihâimana Uꞌâsi Mono Zadawa Wasuꞌu

Buazihi nhimi'manharĩ wẽ zé wasu'u

¹ Tawamhã nimahã bâtâ na ma tô Noẽmi, Rutihi ma tinha: — Ĩsani'wa, aimro da hã aibâ te aima 'masãmri da, wa ĩsima wẽ, asõrõwa aima hâimana da zama.

² E ma tô ãma irosa'ra, Buazihi ãma ĩmro sisãnawã siwadi na hã. Ta hã ma tô romhuri hã aima ti'ru, ite romhuri'wa norĩ me romhuri da. Taha ta tô. Ã bara na te za amnho hã pré'é, trigu teihi ne hã.

³ Ãne te za i'manha. Te za asi'upsõ. Taha parimhã, te za asisadaze. Te za duré asi'uza, ai'uza ihâi wẽ uptabi na. Taha pari, te za aimo, Buazi te te iromhurizéb u hã. Tane nherẽ, tãma asihâi'ré õ di za a'â, te te aiwaihu'u tõ da, i'rata i'aihâimana na hã. A'â tisa hã te te 'rãsutu, duré a'â tisa te te simizâri pari.

⁴ Tawamhã Buazi oto sõtõ da wamhã, nimame za inomrozéb zô 'madâ'â pese. Sõtõ wapsi, te za itẽme aimo, inomrozéb u. Tawamhã isisuwazé hã te za ihâzada'ré za'o, ipara ãma hã. Tawamhã tame te za ano. Tawamhã te za aima tinha, tiha hã za i'manharĩ da hã.

⁵ Tawamhã Ruti hã te tãma tinha, ãne: — Uburé wa za tiha hã 'manha, ĩma iwaihu'uzéb zarina.

⁶ Tawamhã te nimahã na oto mo, amnho hã da te 're ipré'é za'ra mono zéb u. Wisi wamhã, ma tô uburé marĩ ab'manha, imaprewa te te tãma i'ruzéb zarina.

⁷ Tawamhã Buazi oto sai pari wamhã, duré te te simizâri parimhã, tãma rowẽ di oto. Tahawa, te oto nhono, amnho za'wari 'rata. Tawamhã Ruti te oto itẽme mo, sahutu sina atãma hâire. Itẽme wisi wamhã, isisuwazé hã ma tô sima hâzada'ré za'o, ipara ãma hã. Tawamhã tame ma tô oto nomro.

⁸ Tawamhã mara wa'wa ma tô toporo waptu na, Buazi hã. Topo'o wamhã, sahâ na ma tô nhamra. Tawamhã ma tô pi'õ hã 'madâ. Te te 'madâ'â wamhã, ma tô ãma titob'uzu, ipara ãma inomro ãma hã.

⁹ Tawamhã ma tô sadanha, ãne: — E 'wa hã, a hã. Tawamhã asa te tãma siwasu'u: — Wa hã Ruti, aima romhuri'wa. Ma'ãpé aima romhuri'wa nhisiwimhã asisuwazé hã hâparapo na. E tihai wa. Wanho'reptui'wa na wama 're aihâimana mono wa, a hã.

¹⁰ Tawamhã Buazi ma tô ãma tãma wa'rã, ãne: — Wa tô ĩsima wẽ, Uburé Danhib'apito si iwẽ hã te te aima 're pisutu mono da. Tô sena na aihâimana wẽ zém na ma asihâi'ré wẽ, aimaprebaba si'aibâ sisãnawã norĩ ma hã, aimaprebaba sipi'õ ipawapto wẽ zém nhipai u hã. E marĩ wa. A hã aibâ iprédupté isibro pese zô asima airĩtĩ õ wa, niha wamhã, duré isibrob'õ zô.

¹¹ Tahawa, ãhã na hã aipahi tõ. 'Ri nho'õmo ãma hã dama aiwaihu'u pese di, a hã pi'õ, rob'uwaibaba na si 're i'aihâimana mono zém na hã. Tahawa, uburé wa za ab'manha, ĩwi iwaptẽrẽzéb zarina.

¹² Sena tô wa hã asisãnawã norĩ siwadi. Tahawa, duré a hã za oto ĩnhimi'madâ. Tane nherẽ, iré hã aibâ asisãnawã siwadi 'râwimhã, ĩnhipai u hã.

¹³ Ãme a'â aihâimana za, awẽ u hã, mararé wa te sadaihu'u da, te te sima wẽ zô, te te i'ai'madâ'â da hã. Te te sima wẽ wamhã, wẽ di. Duré te te sima wẽ õ wamhã, wa hã Uburé Danhib'apito ma, 'Re ihâimana u'âsi mono ma, wa za ropisutu ĩsi'ãma hã, ai'madâ'â'wa na 're ĩhâimana mono da. Tahawa, ma'ãpé apâ anomro, asõtõ da.

¹⁴ Tawamhã Rutihi ãma ma tô ti'awẽ, Buazihi para ãma nomro ré. Tawamhã zahadu robza'rã ré mara hâ prãi ré, ma tô udu Ruti hã, morĩ da, morĩ ré, da te dasiwi 'madâ'â tõ da. E marĩ wa. Buazi hã te te sima wẽ õ di duré, pi'õ itẽme imorĩ na hã da te iwaihu'u da hã.

¹⁵ Tawamhã Buazi ma tô tãma tinha, Rutihi ma, ãne: — Asi'ubuzé hã wazere, ti'ai wa hiri da, hâparapo na. Tawamhã ma tô tihi, hâparapo na tisi'ubuzé hã. Tawamhã Buazi ma tô oto sa'wa amnho hã iwa, 20 na ipire pibuzé hã. Taha pari, ma tô duré ti'â, isisé te te tãma hiri da. Tawamhã Ruti te oto apâ mo, 'ri nho'õmo u.

¹⁶ Tawamhã tinhorõwa u oto wisi wamhã, ma tô imaprewa hã sadanha, ãne: — Ĩsani'wa, e niha ma tô tiromhâiba. Tawamhã Ruti te tãma rowasu'u, Buazi hã uburé marĩ hã te te tãma i'ab'manharĩzém na hã. Te duré tãma rowasu'u a'â:

¹⁷ — Ã hã uburé ma tô ĩma tisõ, amnho hã. Tahawa, te ãne ĩma tinha: “Asõrõwa u, ai'uba na apâ asina siri õ di za, marĩ hã âri ãna hã aimaprebaba ma.”

¹⁸ Tawamhã Noẽmi te tãma tinha, ãne: — Tahawa, ĩsani'wa, a'â asimipari atãma, pé niha ai'ãma romhâimana zô. E tihai wa. Buazi hã ã bâtâ na tiha na te te arowairébé õ nherẽ, iwa'utu da hã maze di.