Ruti 2 - ꞌRe Ihâimana Uꞌâsi Mono Zadawa Wasuꞌu

Ruti hã amnho 'rã'a'a te te i'awaibuzé wasu'u

¹ Noẽmihi mro sisãnawã siwadi te 're 'maihâimana, Elimelequihi sisãnawã, Buazi na isisi hã. Ta hã aibâ isibro pese uptabi. Dama pire na te duré 're hâimana.

² Tawamhã nimahã bâtâ na ma tô Ruti tãma tinha, Noẽmihi ma, ãne: — E ĩma waprosi õ di za, ĩmorĩ da, daburu na amnho 'rã a'a ti'ai baba irere'e mono hã te 're awaibui mono da. Ãté ni'wa hã buru na romhuri'wa hã te za sima ĩwẽ, isarina te awaibui mono da amnho 'rã'a'a hã. Tahawa, Noẽmi hã ma tô oto satõ, tisani'wa hã: — Saihi, mo oto pé aimorĩ.

³ Tawamhã Ruti ma tô mo, daburu u amnho te te itehâri za'ra mono norĩ zarina, i'rã'a'a mono hã te te awaibui mono da. Tawamhã tãma waihu'u õ nherẽ, ma tô ãzé Buazihi buru na da te 're irobzuri za'ra mono u hã, Elimelequihi sisãnawã buru u.

⁴ Tawamhã Buazi ma tô Rutihi ãma ronomro pesere õ ré, isãna're pesere wi, Belẽ hawimhã. Wisi wi, romhuri'wa norĩ ma, ma tô nharĩ za'ra, ãne: — Uburé Danhib'apito hã asiré 're hâimana za'ra wa'aba mono da, wa hã wa tô ĩsima te 're wẽ. — Uburé Danhib'apito hã rowẽ si te te aima 're pisutu mono da, wa wasima wẽ za'ra ni. — Ãne ma tô ãma tãma wa'rãmi za'ra, romhuri'wa norĩ hã.

⁵ Tawamhã Buazi ma tô romhuri'wa norĩ 'madâ'â'wa hã sadanha, ãne: — E 'wa hã õ hã, pi'õ ihâiba té hã.

⁶ Tawamhã ma tô tãma wasu'u: — Õ hã moabita norĩ nhipi'õ we imorĩ, Noẽmihi siré, Moabi hawi.

⁷ Ta hã ma tô ĩwi rowaptẽ, amnho tehâri'wa norĩ zarina, te te awaibui mono da, amnho 'rã'a'a hã. Ãne ma tô romhu, bâdâ 'rãiwatobro hawim haré ã bâtâ u hã. Awã zahâpâ wa'utu da wapsi, ma tô a'â sazâ, suru na.

⁸ Tawamhã Buazi ma tô Rutihi ma tinha, ãne: — Pi'õ, ĩwapari, ãne. Buru na da te 're irobzuri za'ra mono hâiba amoi u hã 're awaibui mono õ di za, amnho 'rã'a'a hã. Ãmep si romhuri, ĩma romhuri'wa norĩ sipi'õ 'rata.

⁹ Asima ab'madâ'â pese mono, ta norĩ siré aihâimana u'âsi za'ra da, te te tehâri za'ra mono ré, buru nho hã. Wa tô duré tãma roti za'ra, ĩma romhuri'wa norĩ ma, aibâ norĩ ma hã, te te siwi aiwamnarĩ tõ da. Duré 'rubu wamhã, te za nasi ihâsi, ĩma romhuri'wa norĩ te te nasi â sima i'amrami za'ra hã.

¹⁰ Tawamhã Ruti ma tô hi'rãtitõ nhamra. Ti'ubu na ma tô ropto, ti'ai u hã. Tawamhã te Buazihi ma tinha, ãne: — E tihai wa, ma tô ĩwẽsã, tiha hã ĩma i'manharĩ wẽ zéb da hã, wa hã dasiré a'uwẽ õ nherẽ.

¹¹ Tawamhã te Buazi tãma tinha asa: — Wa tô wapa, aimaprebaba ma, aimro hã idâ'âzém hawi uburé marĩ hã 're i'ab'manharĩ mono zém na hã. Ĩma waihu'u pese di duré, aimama norĩ hã ana me irẽme zahuré zém na hã duré asa'ru zama irẽmezém na hã. Tahawa, ãwa ma tô we aimo, aima idawaihu'u'õ norĩ wazari, 're aihâimana mono da.

¹² Uburé Danhib'apito si te za uburé aima wa'â, marĩ hã 're i'ab'manharĩ mono zé hã. Ta hã Izaraéu nhihudu norĩ nhib'apito isimi'madâ'â wẽ zéb zarina we aimorĩ hã sa'ẽtẽ na te te aima wa'âbâ da, wa ĩsima wẽ.

¹³ Tawamhã Ruti ma tô Buazihi ma tinha, ãne: — Apito, wẽ na te ĩpawapto mo. Ĩma inharĩ wẽ mono zém na ma ãma ĩma irowẽ waze, wa hã aima romhuri'wa norĩ sipi'õ norĩ ma, ĩwapure nherẽ.

¹⁴ Tawamhã abzuma dasaihurizéb da, iwa waptã'ã wamhã, ma tô Buazi hã Rutihi ma tinha, ãne: — We ãwa aimorĩ, i'u'ẽtẽ wapu wa'õno hã 'mai'âri da, duré uwa 'rãi wa'u isé na asima di'i da. Tawamhã ma tô oto nhamra, romhuri'wa norĩ zababa. Tahawa, Buazi ma tô duré tãma tisõ, amnho 'rã zebre hã. Tawamhã ma tô ti'rẽ, te te i'mahâiwĩrĩzéb u. Te te 'mahâiwĩrĩ wamhã, ma tiwi si'azazâ, amnho 'rã zebre hã.

^15-16 Tawamhã Ruti hã amnho 'rã'a'a te te awaibui mono da, apâ oto wahutu wamhã, ma tô Buazi hã tite romhuri'wa norĩ ma roti za'ra, ãne: — Iteihi iwasisi za'ra wa'aba mono 'remhã te te duré tô awaibu mono, amnho 'rã'a'a hã. Tahawa, tiwi sawi za'ra wa'aba õ di za, siséb tõ da. Te za duré iteihi wasisi hawimhã isani za'ra wa'aba mo, tãma sãmra za'ra wa'aba mono da, taha zama te te awaibui mono da.

¹⁷ Ãne ma tô Ruti, amnho 'rã'a'a hã hâiwahâzéb u nherẽ te te 're awaibu. Taha pari, ma tô duré pré'é, i'rãi uptabi si te te ubumro da. Tawamhã i'rã pire pibuzé hã 25 kilu u ma aré watobro.

¹⁸ Tawamhã amnho hã te oto tidu 'ri tẽme, 'ri ahâ u hã. Te te ãwisi wamhã, timaprebaba ma, sa'u te te iduri hã ma tô tãma hâi'ré, sa'ẽtẽ na te te i'awaibui mono zé hã te te waihu'u da. Abzuma tisa si'atarẽme zama ma tô duré tãma tisõ.

¹⁹ Tawamhã Noẽmi te oto sadanha, ãne: — E ma niwĩmhã ma tô ã bâtâ na amnho 'rã'a'a hã i'awaibui mo. E ma niwĩ te iromhu, duré. 'Re ihâimana u'âsi mono wi, wa za waptẽ, aibâ hã ai'ãma ipẽ'ẽzézé wa'rãmi, iwẽ hã te te tãma pisutu da, rowẽ na 're hâimana mono da. Tawamhã Ruti hã te Noẽmihi ma rowasu'u, Buazi na aibâ nhisi buru ãma te te iromhuri na hã.

²⁰ Tahawa, te Noẽmi hã duré tinha: — Wa ĩsima wẽ, Uburé Danhib'apito iwẽ hã te te tãma 're pisutu u'âsi mono da, Buazihi ma hã. Ta hã te te dama 're rob'manharĩ wẽ u'âsi, hâiba ré 're ihâimana za'ra mono norĩ ma hã, duré 're idâ'â za'ra mono norĩ ma zama. Tawamhã Noẽmi te timreme na a'â ãma uzusi, ãne: — Ta hã ĩmro sisãnawã siwadi, ãma wati prã na romhâ na hã. Ma tô wanho'reptui'wa za'ra 'wa na wama tihâimana za'ra.

²¹ Tawamhã te Ruti hã tãma rowasu'u, ãne: — Ãhã nhipai u hã romhuri na te ãma uzusi da, te ĩma tinha, tãma romhuri'wa norĩ siré, amnho tehâri hã isi'utõrĩzéb u.

²² Tawamhã Noẽmi ma tô ãma sada'â: — Wẽ di tô, aimorĩ da hã tãma iromhuri'wa norĩ sipi'õ norĩ siré. E tihai wa. Aibâ aimawi buru ãma, romhuri 'wa'âhã, te aré siwi aiwamna.

²³ Tawamhã Ruti te oto romhu, Buazihi ma, romhuri'wa norĩ sipi'õ norĩ siré. Amnho trigu 'rã'a'a hã ma tô te te awaibu, itehâri hã isi'utõrĩzéb u, trigu tehâri hã duré trigu teihi ne tehâri zama. Tawamhã te duré timaprebaba siré 're sãmra u'âsi.